بہت کام کرنا ہے،تمام سکیموں کے پی سی ون 15جولائی تک جمع کرائیں:مریم نواز
لاہور(اے پی پی)وزیر اعلیٰ مریم نواز نے جاری ترقیاتی منصوبوں کیلئے 40کروڑ روپے فوری طور پر ریلیز کرنے کا حکم دیتے ہوئے کہا بہت کام کرنا ہے ، تمام سکیموں کے پی سی ون15 جولائی تک جمع کرائیں،وزیراعلیٰ کی زیر صدارت پلاننگ اینڈ ڈویلپمنٹ بورڈ کے کمیٹی روم میں اجلاس ہوا۔
جس میں سالانہ ترقیاتی پروگرام 25-2024 کا تفصیلی جائزہ لیا گیا۔ اجلاس میں تمام محکموں کے ترقیاتی پراجیکٹس پر تبادلہ خیال کیا گیا،مریم نواز نے گوشت،جھینگوں،جانوروں اور گارمنٹس کی برآمدات کے لئے کمپنی بنانے اور پراجیکٹس کی بر وقت تکمیل ہر صورت یقینی بنانے اور تمام پراجیکٹس کی رئیل ٹائم مانیٹرنگ کیلئے پی آئی ٹی بی کو ڈیش بورڈ تشکیل دینے کی ہدایت کی۔ مریم نواز نے کہا بہت کام کرنا ہے ، تمام سکیموں کے پی سی ون15 جولائی تک جمع کروائے جائیں، تمام سکیموں کو وقت پر مکمل کرنا ہم سب کی ذمہ داری ہے ،پراجیکٹ میں شفافیت،معیار اورمیعاد کی مانیٹرنگ پر خصوصی توجہ دی جائے ، انہوں نے کہا گاڑیوں اور دفاتر پر پیسے خرچ ہوتے ہیں تو ہسپتالوں پر کیوں نہیں،انہوں نے مراکز صحت کی ری ویمپنگ اور تعمیرو بحالی کی جلد تکمیل کیلئے ہنگامی اقدامات کی ہدایت کی،اجلاس کو بریفنگ میں بتایاگیا کہ پنجاب میں موٹرویز کے ہر انٹرچینج پر ایمبولینس شروع کی جارہی ہے ، 106ترقیاتی منصوبے غیر ملکی اداروں کی معاونت اوراشتراک کے ساتھ مکمل کیے جائیں گے ،وزیر اعلیٰ نے فنڈز کے استعمال کی بنیاد پر باقی مختص فنڈز بھی جاری کرنے اور یونیورسل ہیلتھ انشورنس کے 25 فیصد فنڈ سہ ماہی بنیاد پر جاری کرنے کی ہدایت کی۔اجلاس میں ڈسٹرکٹ ڈویلپمنٹ کمیٹی کے 83 اور ڈویژنل ڈویلپمنٹ ورکنگ پارٹی کے 431 پراجیکٹ کی تفصیل پیش کی گئی۔
ڈیپارٹمنٹل ڈویلپمنٹ سب کمیٹی کے 282 اورصوبائی ڈویلپمنٹ ورکنگ پارٹی کے 378 منصوبوں پر پیش رفت کا جائزہ لیا گیا،مریم نوازنے ہرڈیپارٹمنٹ کی خصوصی سکیموں پر تفصیلی بریفنگ لی اورہدایات جاری کیں،وزیر اعلیٰ نے چیچہ وطنی تا لیہ 189کلو میٹر سڑک اورملتان تا وہاڑی 93کلو میٹر روڈکی تعمیر شروع کرنے کیلئے 13 اگست تک کی ڈیڈ لائن دے دی۔بریفنگ میں بتایا گیا کہ ساہیوال تا سمندری اوربہاولنگر تا جھانگرا شرقی انٹرچینج روڈ کی تعمیر کا آغاز بھی 13اگست تک کردیا جائے گا۔فیصل آباد چنیوٹ سرگودھا روڈ کی تعمیراتی سرگرمیوں کا آغاز31جولائی کو ہوگا۔دریں اثنا مریم نواز نے مائیکرو،سمال اینڈ میڈیم انٹرپرینیورشپ کے عالمی دن پراپنے پیغام میں کہاکاروبار دوست پالیسیوں کے ذریعے ایس ایم ایز کو ترقی دینے اور سازگار ماحول پیدا کرنے کیلئے پرعزم ہیں،چھوٹے کاروباروں میں سرمایہ کاری اقتصادی استحکام اور معاشی خوشحالی کیلئے ضروری ہے ،حکومت ایم ایس ایم ایز کو درپیش چیلنجز پر قابو پانے اور مدد فراہم کرنے کے لیے اقدامات کر رہی ہے ۔چھوٹے اور درمیانے درجے کے کاروباروں کیلئے لاجسٹک سپورٹ، ٹیکنالوجی اور منڈیوں تک رسائی بڑھانے پر خصوصی توجہ کی ضرورت ہے ۔ایس ایم ایز کا مینوفیکچرنگ، خدمات اور تجارت میں متنوع آپریشنز کے ذریعے پنجاب کی جی ڈی پی میں نمایاں شیئر ہے ۔
