پختونخوا حکومت ریاست کو سپورٹ نہیں کریگی تو گورنر راج :کنڈی
پی ٹی آئی کو احتجاج سے کچھ نہیں ملے گا، اس بار اسلام آباد میں کچھ نہیں کرسکے گی فیصلہ عدالتوں کو کرنا ہے سڑکوں پر کوئی فیصلے نہیں ہوتے :میڈیا سے گفتگو
پشاور(مانیٹرنگ ڈیسک)گورنر خیبرپختونخوا فیصل کریم کنڈی نے کہا ہے کہ صوبائی حکومت اگر ریاست کو سپورٹ کرتی ہے تو ٹھیک ہے ورنہ مجبوراً گورنر راج لگے گا۔میڈیا سے گفتگو کرتے ہوئے انہوں نے کہا کہ گزشتہ روز پی ٹی آئی جلسے کا کیا مقصد تھا یہ علم نہیں ہے، صوبے کے حالات جب خراب ہوجائیں تو پھر گورنر راج لگ سکتا ہے، ان کا کہنا تھا کہ پی ٹی آئی کو احتجاج سے کچھ نہیں ملے گا، اس بار پی ٹی آئی اسلام آباد میں احتجاج نہیں کرسکے گی، فیصلہ عدالتوں کو کرنا ہے سڑکوں پر کوئی فیصلے نہیں ہوتے ۔گورنر کا کہنا تھا کہ جیل جانا کوئی بڑی بات نہیں، پاکستان کی تقریباً ہر سیاسی شخصیت جیل گئی ۔گورنر فیصل کریم کنڈی کا مزید کہنا تھا کہ پی ٹی آئی والے ریہرسل کریں پھر انہیں پتا چلے گا کہ کیسے گورنر ہاؤس آتے ہے ، یہ لوگ پہلے بھی گورنر ہاؤس کا تیل بند کرنے کی دھمکی دے رہے تھے اب ان کی خود بولتی بند ہوگی۔
