درخت کاٹنے میں ملوث پی ایچ اے افسر کو گرفتار کرائینگے :ہائیکورٹ
ناصر باغ کا معاملہ عدالت کی نگرانی میں مکمل ہوگا :جسٹس شاہد، تفصیلی رپورٹ طلب گلی محلوں میں واشنگ سٹیشنز پر کارروائی کیوں نہیں کی جارہی،ریمارکس، سماعت ملتوی
لاہور (کورٹ رپورٹر )لاہور ہائیکورٹ میں سموگ کے تدارک کے حوالے سے درخواستوں پر سماعت کے دوران عدالت نے ڈاکٹرز ہسپتال کے قریب نہر سے درختوں کی کٹائی پر اظہار برہمی کرتے ہوئے ریمارکس دئیے کہ درخت کاٹنے میں پی ایچ اے کا جو افسر ملوث ہوا اس کو گرفتار کراؤں گا، عدالت نے پی ایچ اے سے تفصیلی رپورٹ طلب کرلی۔ جسٹس شاہد کریم نے شہری ہارون اور دیگر کی درخواستوں پر سماعت کی، وکیل اظہر صدیق نے بتایا کہ ڈاکٹرز ہسپتال کے سامنے نہر سے درختوں کی کٹائی کی گئی ہے عدالت نے ریمارکس دیے کہ متعدد بار درختوں کی کٹائی سے روکنے کا حکم دیا ہے درختوں کی کٹائی پر ایس ایچ او کو بلا کر پرچہ درج کراؤں گا،اس معاملے کی تحقیقات کرائی جائیں گی سوموار کو اس معاملے کی تفصیلی رپورٹ پیش کی جائے جسٹس شاہد کریم نے کہا متعدد بار کہا کہ پارکس کو ریسٹورنٹس کیلئے استعمال نہ کریں پی ایچ اے کو پارکس کے حوالے سے پالیسی بنانے کا کہا ہے عدالت نے استفسار کیا کہ ناصر باغ کے بارے میں کیا رپورٹ ہے ؟وکیل نے بتایا کہ ناصر باغ میں پارکنگ پلازہ کی آئینی حیثیت چیلنج کردی گئی ہے ، عدالت نے ماہرین کو ناصر باغ کے حوالے سے آئندہ سماعت پر تفصیلی رپورٹ پیش کرنے کی ہدایت کرتے ہوئے کہا ناصر باغ کا معاملہ عدالت کی نگرانی میں مکمل ہوگا ،عدالت نے ریمارکس دئیے کہ گلی محلوں میں واشنگ سٹیشنز پر کارروائی کیوں نہیں کی جارہی،کیوں ان سروس سٹیشنز کو جرمانے نہیں کئے جارہے ،عدالت نے محکمہ ماحولیات سے صنعتی یونٹس کی آلودگی سے متعلق رپورٹ طلب کی، محکمہ ماحولیات کے وکیل نے بتایا کہ عدالتی حکم پر 141 صنعتی یونٹس کو بند کیا گیااب آلودگی یا دھواں چھوڑنے کی کوئی شکایت نہیں ، عدالت نے ریمارکس دئیے کہ ڈی جی ماحولیات اچھا کام کر رہے ہیں ، بڑی مشکل سے صنعتی یونٹس میں ٹریٹمنٹ پلانٹ لگوائے گئے ،ان یونٹس کی فزیکل انسپکشن لازمی ہونا چاہیے عدالت نے مختلف محکموں سے رپورٹ طلب کرتے ہوئے کارروائی آئندہ ہفتے تک ملتوی کردی۔
