فضا سے عرش تک کے نظارے

اللہ تعالیٰ نے سورۃ ''الذاریات‘‘ میں پہلے فضا کا ذکر فرمایا ہے اور پھر خلا کی بات کی ہے۔ زمین کے اردگرد ہوا کا غلاف ہے۔ اسی سے زمین پر زندگی رواں دواں ہے چنانچہ اللہ تعالیٰ اڑانے والی ہوائوں کی قسم کھا کر سورت کا آغاز فرماتے ہیں۔ جی ہاں! یہ ہوائیں ہی ہیں جو پرندوں وغیرہ کو اڑائے پھرتی ہیں اور ہمارے دور میں جہازوں کو اڑائے پھرتی ہیں۔ اگلی آیات میں اللہ تعالیٰ نے ان ہوائوں کی قسم کھائی ہے جو پانی سے بوجھل بادلوں کو اٹھائے پھرتی ہیں، فضا میں ان کو لئے پھرتی ہیں اور پھر جہاں جہاں بارش مقصود ہوتی ہے وہاں بارش کو برسانے کا سبب بنتی ہیں۔ یہ سارا کچھ ''ہوائی کرّے‘‘ میں ہوتا ہے، فضا میں ہوتا ہے۔ اس کے بعد اللہ تعالیٰ خلاء کا رخ کرتے ہوئے ایک زبردست انکشاف فرماتے ہیں، ایسا انکشاف کہ جو آج کے دور میں ہوا ہے۔ ملاحظہ فرمائیں!

موجودہ دور میں نظریاتی طبیعات کا سب سے بڑا سائنسدان ''سٹیفن ہاکنگ‘‘ ہے۔ انہیں آئن سٹائن کا جانشین تسلیم کیا جاتا ہے۔ انہوں نے کچھ عرصہ پہلے ایک کتاب لکھی اس کا نام ہے "The Universe in a Nutshell" یعنی یہ کائنات ایک خول میں بند ہے۔ سٹیفن ہاکنگ نے اس کتاب کے صفحہ سات، اٹھارہ اور بیس پر خلاء کا تذکرہ کیا ہے۔ خلاء وہ مقام ہے جو ہوائی کرّے یا فضاء کے بعد ہے، یہاں ہوا موجود نہیں ہے۔ زمین کی کشش بھی ختم ہو جاتی ہے۔ سٹیفن ہاکنگ نے مندرجہ بالا صفحات پر جالیاں بنا کر سائنسی حقائق سے ثابت کیا ہے کہ خلائی آسمان جالی دار ہے۔ یہ وہ حقیقت ہے جو اب جدید سائنس میں تمام سائنسدانوں کے ہاں مسلمہ حقیقت ہے۔ جناب سٹیفن ہاکنگ اپنے اور کائنات کے خالق کو ماننے میں تذبذب کا شکار ہیں مگر یہ کیسا حسین اتفاق ہے کہ وہ اپنی کتاب کے آغاز ہی میں صفحہ سات پر خلاء کی پہلی جالی بناتے ہیں کہ سورج بھی خلاء کی اسی جالی پر اپنی منزل کو رواں دواں ہے اور اس کے گرد ہماری زمین بھی خلاء میں اسی جالی پر ہی سورج کے گرد گھوم رہی ہے جبکہ آج سے چودہ سو پچاس سال قبل نازل ہونے والے قرآن کی سورۃ ''الذاریات‘‘ کی آیت سات میں اللہ تعالیٰ نے ایک قسم کھائی، فرمایا! ''وَالسَّمَآئِ ذَاتِ الْحُبُکْ‘‘ قسم ہے مجھے مضبوطی سے بُنے ہوئے جالی دار آسمان کی۔ ''اَلْحُبُکْ‘‘ جمع ہے۔ اس کا واحد ''حَبِیْکَۃٌ‘‘ ہے۔ اس کے معنی ہیں، کسی چیز کو باندھنا، مضبوط بنانا، مضبوطی اور خوبصورتی کے ساتھ کپڑے کی بنائی کرنا یعنی یہ آسمان میں جس جالی کی بنتی کی گئی ہے وہ بڑی مضبوط ہے، باہم بندھی ہوئی ہے اور بُنتی انتہائی خوبصورت ہے۔

مکہ میں نازل ہونے والی اس سورت کی مندرجہ بالا آیت نمبر سات نے واضح کر دیا کہ یہ قرآن جس ہستی نے نازل فرمایا ہے وہ کائنات کا خالق ہے اور جس ہستی پر یعنی حضرت محمدکریمؐ کی پاک ذات پر یہ کتاب نازل ہوئی ہے وہ اللہ کے سچے اور آخری رسول گرامی ہیں۔ اگلی ہی آیت یعنی آیت نمبر آٹھ میں شک میں پڑے لوگوں کو اللہ تعالیٰ مخاطب کرتے ہیں! ''بے شک تم اختلاف والی بات میں مبتلا ہو‘‘ یعنی کبھی کہتے ہو کہ کائنات کے خالق کا امکان ہو سکتا ہے کبھی کہتے ہو، یہ کائنات خودبخود ہی چل رہی ہے۔ پھر کہتے ہو، قیامت ضرور آئے گی اور کبھی کہتے ہو کہ دنیا یونہی چلتی رہے گی یعنی تم اپنی بات کے اندر ہی شک میں پڑے ہوئے ہو۔ سٹیفن ہاکنگ جیسے سائنسدانوں کا یہی حال ہے اور آج بھی ان کی معروف کتاب "The Grand Design" میں اسی طرح کی متذبذب باتیں ہیں۔ میں کہتا ہوں جس اللہ نے ساڑھے چودہ سو سال قبل آسمان کے خلاء کی حقیقت بیان کرنے کے بعد سٹیفن ہاکنگ جیسے انسانوں کے دل کی کیفیت کو بیان فرمایا ہے۔ اس اللہ، اس کے قرآن اور اس کے رسولؐ کو مانے بغیر اب کیا چارہ رہ جاتا ہے؟ مگر بات قسمت کی ہے۔ قارئین کرام! اب آیئے! اس جالی دار خلائی آسمان کی کیفیت ملاحظہ کریں کہ جس کے بارے میں اس عظیم ہستی نے ہمیں آگاہ فرمایا ہے کہ جن کی زبان مبارک پر اللہ کی مرضی کے بغیر کوئی جملہ ادا ہوتا ہی نہیں۔ آپؐ فرماتے ہیں! میرے صحابیو! میں وہ کچھ دیکھتا ہوں جو تمہیں دکھائی نہیں دیتا۔ میں وہ کچھ سنتا ہوں جو تم لوگوں کو سنائی نہیں دیتا۔ ''سنو! آسمان چرچراتا ہے اور وہ چرچرائے نا تو کیا کرے؟ صورتحال یہ ہے کہ اس آسمان میں چار انگلیوں جتنی جگہ بھی خالی نہیں کہ جہاں کوئی فرشتہ اپنی پیشانی رکھے اللہ کے حضور سجدہ ریز نہ ہو۔‘‘ (ابن ماجہ: 4190 حسن)

قارئین کرام! ثابت ہوا اللہ تعالیٰ نے اپنے پیارے اور آخری رسولؐ کو جالی دار آسمان دکھا بھی دیا۔ اس پر فرشتوں کو سجدے کی حالت میں پڑے بھی دکھا دیا اور آسمان کے چرچرانے کی آواز کو بھی سنوا دیا۔ ہمارے مکانوں پر جب سادہ چھتیں ڈالی جاتی تھیں تو سرکنڈے کی بُنتی کر کے ان کو ڈالا جاتا تھا پھر اس کے اوپر بنتی کی ہوئی سرکیاںڈالی جاتی تھیں، اوپر مٹی ڈال کر لپائی کر دی جاتی تھی، اس چھت پر جب کوئی وزنی آدمی چڑھ جاتا تھا تو کمرے میں بیٹھا آدمی چھت کے چرچرانے کی آواز سنتا تھا۔ یہی آواز چرچرانے کی آواز ہے۔ اس جیسی آواز آسمان کے خلاء کی جالی دار چھت سے آتی ہے کیونکہ اس چھت کی کوئی جگہ خالی نہیں جہاں کوئی فرشتہ اپنے رب کے حضور سجدہ ریز نہیں ہے۔ طبرانی کبیر میں حسن سند کے ساتھ جو حدیث ہے اس میں آپﷺ واضح طور پر بتلاتے ہیں کہ میں آسمان کے چرچرانے کی آواز سن رہا ہوں۔ ''سورۃ الصّافات‘‘ میں اللہ تعالیٰ نے فرشتوں کا قول نقل فرمایا ہے وہ کہتے ہیں ہم میں سے ہر ایک کی عبادت کا مقام متعین ہے۔ ہم سب صفیں بنائے ہوئے ہیں اور ہم سب سبحان اللہ کا ورد کر رہے ہیں۔‘‘ طبرانی ہی کی ایک دوسری روایت میں ہے کہ ساتوں آسمانوں میں کوئی جگہ خالی نہیں جہاں فرشتے قیام، رکوع اور سجدے میں نہ پڑے ہوں۔ قارئین! آیئے، اب ساتوں آسمانوں کے اوپر کا نظارہ کرتے ہیں!ساتوں آسمانوں کے اوپر اللہ تعالیٰ کا عرش ہے۔ قرآن نے بتلایا ہے کہ اللہ کے عرش کو آٹھ فرشتوں نے اٹھا رکھا ہے۔ ان فرشتوں کو قرآنی اصطلاح میں ''حَمَلَۃُ الْعَرْش‘‘ کہا جاتا ہے۔ ان آٹھ میں سے دو فرشتوں کی عظمت کے بارے میں اللہ کے رسولﷺ نے بتلایا کہ ''ایک فرشتے کے کان کی کونپل سے لیکر کندھے تک کا جو رقبہ ہے وہ سات سو سال کی مسافت پر مبنی ہے۔‘‘ (ابودائود: صحیح)

دوسرے فرشتے کے بارے میں فرمایا ''اس کے دونوں پائوں ساتویں زمین پر ہیں جبکہ عرش اس کے کندھے پر ہے اور وہ (اللہ کی تسبیح) اس طرح کر رہا ہے: (اے اللہ!) آپ جہاں تھے اور جہاں (جس جلالتِ شان) میں ہوں گے پاک ہیں۔ (مسند ابی یعلیٰ:6588صحیح)جی ہاں! عرش تو اللہ تعالیٰ کی مخلوق ہے۔ اپنے اس عرش کے اوپر اللہ تعالیٰ کس جلالی شان میں ہیں اس بے چارے فرشتے کو بھی معلوم نہیں جس کی اپنی جسامت اتنی بڑی ہے کہ کان کی کونپل سے کندھے تک کا فاصلہ کھربوں نوری سال میں طے ہو۔

قارئین کرام! حضرت جبریل علیہ السلام ان سب فرشتوں کے سردار ہیں۔ اللہ کے رسولﷺ نے ان کو اصلی حالت میں دوبار دیکھا ہے۔ ایک بار مکہ میں کہ جب حضورﷺ نے آنکھ اٹھا کر آسمان کی جانب دیکھا تو سارا آسمان ان کے وجود سے بھرا پڑا تھا۔ دوسری بار ساتویں آسمان سے اوپر سدرۃ المنتہیٰ کے پاس کہ جب انہوں نے چھ سو پَر پھیلائے تو نور اور نورانی ہیرے، یاقوت اور موتی ان کے وجود سے جھڑ رہے تھے۔ وہیں آپﷺ کو ''بیت المعمور‘‘ دکھلایا گیا۔ آپﷺ نے فرمایا! اس میں روزانہ ستر ہزار فرشتے عبادت کر کے نکلتے ہیں۔ جو جماعت عبادت کر کے نکل گئی پھر اس کی باری نہیں آئے گی۔ (بخاری و مسلم) جی ہاں! ان سب کے سردار حضرت جبریل علیہ السلام ہیں، ان کی اہم ترین ڈیوٹی حضرت آدم علیہ السلام سے حضرت محمد کریمﷺ تک رسالت کی پیغام رسانی تھا۔ ہمارے حضورﷺ کے اس دنیا سے تشریف لے جانے کے بعد حضرت جبریلؑ کی آمد بھی موقوف ہو گئی تاہم سال میں ایک رات ان کی آمدِ مبارکہ ثابت ہے۔ یہ رات قدر والی رات ہے، اللہ تعالیٰ نے آگاہ فرما دیا کہ یہ رات جو (عبادت کے اعتبار سے) ہزار مہینوں سے افضل رات ہے، اس رات میں فرشتے اور جبریلؑ نازل ہوتے ہیں۔ یہ رات حضورؐ کے فرمان کے مطابق رمضان کے آخری دس دنوں کی طاق راتوں میں سے کوئی ایک رات ہے۔ چنانچہ اسے 21، 23،25، 27 اور 29ویں میں غروب آفتاب کے بعد طلوع فجر تک تلاش کرنا ہو گا۔ وہ کیا ہی خوش قسمت ہو گا جو اس رات کو پا لے اور حضرت جبریلؑ کے ساتھ اس رات کو گزارے۔قارئین کرام! پاکستان 27ویں شب کو معرض وجود میں آیا تھا۔ اللہ بہتر جانتے ہیں دل کہتا ہے کہ یہ ''لیلۃ القدر‘‘ ہو گی۔ آیئے! پھر اس رات کو پا کرمسلمانوں اور ساری انسانیت کے امن کے لئے دعا کریں۔ اپنے کردار کی اصلاح کریں۔ (وما علینا الا البلاغ)

روزنامہ دنیا ایپ انسٹال کریں