قرآن‘ کورونا وائرس اور میڈیکل سائنس

قرآن میں شفاء کا لفظ چار بار آیا ہے۔ حیران کن بات یہ ہے کہ قرآنی ترتیب میں پہلی دو آیات کا تعلق عام انسانیت سے ہے ‘ جبکہ اگلی دو آیات کا تعلق ان لوگوں سے ہے‘ جو قرآن کو اللہ کی طرف سے حضرت محمد کریمؐ پر نازل ہونے والی آخری کتاب مانتے ہیں۔ قرآنی ترتیب کے مطابق ‘ہم پہلے ان دو آیات کا ذکر کرتے ہیں‘ جس میں عام انسانیت کو مخاطب کیا گیا ہے۔ فرمایا ''اے انسانو! تمہارے رب کی جانب سے تمہارے پاس ایک خیرخواہی کا حامل کلام آ چکا ہے۔ سینوں میں موجود بیماریوں کے لیے یہ سراسر شفاء ہے‘‘ (یونس:57)۔ایک دوسری جگہ فرمان ِ باری تعالیٰ ہے کہ ''شہد کی مکھیوں کے پیٹوں سے مختلف رنگوں کا شہد نکلتا ہے۔ اس میں انسانوں کے لیے شفاء ہے‘‘ (النحل:69)۔

قارئین کرام! اللہ تعالیٰ نے قرآن کو عام انسانوں کے لیے شفاء قرار دیا‘ اسی طرح قرآن میں ہی شہد کو بھی عام انسانوں کے لیے شفاء قرار دیا۔ اب‘ شہد کی بہت ساری اقسام کا بھی قرآن نے ذکر فرما دیا۔ ظاہر ہے ہر قسم کی تاثیر الگ ہوگی۔ آموں کے باغ میں شہد کی تاثیر الگ ہوگی۔ مالٹے کے باغ میں لگے شہد کا مجھے ایک بھائی نے تحفہ دیا اس میں سے مالٹے کی خوشبو آ رہی تھی۔ طبیعت کو فرحت بخشنے میں اس کی تاثیر نرالی تھی‘ پھر شہد میں دیگر چیزیں ملا کر مختلف امراض کا علاج کیا جاتا ہے۔ ظاہر ہے یہ ماہرین اور حکماء کا کام ہے۔ الغرض! شہد اور اس کی مختلف مصنوعات سے عام انسانوں کو شفاء ملتی ہے اور بعض کو شفاء نہیں بھی ملتی‘ اسی طرح قرآن عام انسانوں کے لیے شفاء ہے۔ اب ‘یہ قرآن کے عالموں کا کام ہے کہ کون سی آیات کس مرض میں شفاء کا تیربہدف علاج ثابت ہوں گی۔ ساتھ اللہ کے رسولؐ سے ثابت کون سی دعائیں اور مناجات شامل کی جائیں ‘تو شفاء ملنے کے مواقع کس قدر زیادہ ہو جائیں گے؟۔ جی ہاں! قرآن تو سارے کا سارا شفاء ہے‘ مگر قرآن سننے اور پڑھنے سے کس کو شفاء کامل ملتی ہے‘ کس کو شفاء کا ایک حصّہ ملتا ہے اور کون محروم رہتا ہے؟ یہ سب اللہ تعالیٰ کے ہاتھ میں ہے۔ قرآن اور شہد ہر انسان کے لیے شفاء کا باعث ہیں ‘مگر شفاء اللہ کے پاس ہے۔

قارئین کرام! قرآنی ترتیب میں اب ان دو آقات کا ترجمہ ملاحظہ فرمائیں‘ جن میں شفاء کا تعلق صرف ایمان والوں سے ہے۔ فرمایا ''یہ قرآن جو ہم نازل کر رہے ہیں۔ مومنین کے لیے سراسر شفاء اور رحمت ہی رحمت ہے‘‘ (بنی اسرائیل:82)۔ شفاء سے قرآن کی چوتھی اور آخری آیت کا ترجمہ اس طرح ہے۔ فرمایا ''(میرے رسولؐ) کہہ دو کہ یہ (قرآن) تو مومنوں کیلئے سراسر ہدایت اور شفاء ہی شفا ہے‘‘ (حٰم السجدہ:44)۔ ثابت یہ ہوا کہ وہ لوگ جو قرآن پر ایمان رکھتے ہیں ‘وہ روحانی ہدایت بھی حاصل کرتے ہیں۔ جسمانی شفاء بھی پاتے ہیں اور اللہ تعالیٰ کی رحمت کے حصہ دار بھی بنتے ہیں۔ یاد رہے! میڈیکل کی دنیا میں اس اصول کو تجرباتی بنیادوں پر تسلیم کیا گیا ہے کہ شفاء کے حصول میں آدھا کام دوائی کا ہوتا ہے ‘جبکہ آدھا کام مریض کا اعتقاد اور نظریہ کرتا ہے کہ مجھے شفاء مل جائے گی۔ اس میں ڈاکٹر کی مہارت اور خوش اخلاقی کا بھی حصہ ہوتا ہے۔ تیمار داری کا بھی عمل دخل ہوتا ہے۔ اب‘ اگر ڈاکٹر بھی اللہ تعالیٰ کی طرف سے امید کی بات کرے۔ تیماردار بھی اللہ کی رحمت کا یقین دلا کر حوصلہ دیں تو بات آخر کار اعتقاد اور نظریے پر ہی ختم ہو گی۔ ایک تحقیق یہ بھی ہے کہ اچھا ماحول اور اس میں اچھی آوازیں بھی صحت پر مثبت اثرات مرتب کرتی ہیں۔ اس میں پرندوں کی آوازیں‘ چڑیوں کے چہچہانے کی آوازیں‘ آبشاروں‘ جھرنوں اور پہاڑی علاقوں میں پتھروں کو چھو کر گزرنے والے دریاؤں کی آوازیں‘ سمندر کی لہریں‘ رِم جِھم کرتی یا موسلادھار بارش کی آوازیں‘ درختوں کے پتّوں کو چھو کر گزرنے والی ہوا کی آوازیں ‘بھی انسانی صحت پر خوشگوار اثر ڈالتی ہیں۔ قارئین کرام! میں کہتا ہوں کہ ان آوازوں میں بھی تو ''سبحان اللہ‘‘ کا ذِکر ہے۔ قرآن کہتا ہے ''آسمان اور زمین اور جو کچھ ان میں ہے‘ سب سبحان اللہ کہہ رہے ہیں ‘لیکن تم لوگ ان کی تسبیح کو نہیں جانتے‘‘ اسی طرح پرندوں کے بارے میں بھی فرمایا کہ وہ اللہ کا ذکر کرتے ہیں۔ آپ مغرب سے ذرا پہلے کسی باغ میں‘ پارک وغیرہ میں جائیں تو چڑیوں کی چہچہاہٹ سنیں۔ جونہی سورج غروب ہوگا۔ یہ خاموش ہو جائیں گی اور پھر صبح جب فجر طلوع ہوگی تو یہ سورج کے نکلنے سے پہلے پھر شروع ہو جائیں گی اور سورج نکلنے سے ذرا پہلے بند ہو جائیں گی۔ قرآن پاک نے یہی ٹائم مومنوں کو ذکر کرنے کا بتایا ہے۔ سبحان اللہ! مومن کے عمل اور فطرت میں کس قدر ہم آہنگی اور یکسانیت ہے۔

قارئین کرام! سب سے خطرناک مرض سرطان‘ یعنی کینسر ہے۔ کسی جگہ انسانی خلیات میں خلل پیدا ہوتا ہے۔ وہ کنٹرول سے باہر ہوتا چلا جاتا ہے۔ جسم کا دفاعی نظام جسے ''امیون سسٹم‘‘ کہا جاتا ہے ‘وہ دفاع میں ناکام ہوتا چلا جاتا ہے تو آخر کار انسان مفلوج ہو کر موت کے منہ میں چلا جاتا ہے۔ کورونا وائرس بھی ایسا ہی ایک وائرس یا جراثیم ہے‘ جو انسانی خلیے پر حملہ آور ہوتا ہے۔ دفاعی نظام ناکام ہوتا چلا جاتا ہے اور آخر کار انسان موت کے منہ میں چلا جاتا ہے۔ یاد رہے! انسانی جسم میں کوئی دس کھرب خلیات ہوتے ہیں۔ ہر خلیہ ڈی این اے اور ڈی این میں ''جین‘‘ پر مشتمل ہوتا ہے۔ ہارورڈ یونیورسٹی کے ترجمان میگزین (The Harvard Gazette) نے یکم فروری 2013ء کو انسانی جینوم کے بارے میں بھی اپنی تحقیق میں چارلس واٹس کے حوالے سے لکھا تھا کہ جین کے ایک حصے میں خالق کا پیغام دریافت ہوا ہے۔ ہمارا خالق ہم سے جینوم کی تحریر کے ذریعے ہم سے باتیں کر رہے ہیں‘اسی طرح یہ تحقیق بھی سامنے آ چکی ہے کہ انسانی ڈی این اے میں الحاد کا عقیدہ اجنبی ہے‘ جبکہ خالق کو ماننے کا عقیدہ فطری ہے۔ ان حقائق کی روشنی میں میڈیکل سائنس کی مزید حقیقت یہ ہے کہ انسانی خلیات آواز کے ذریعے منفی اور مثبت اثرات قبول کرتے ہیں۔ انسان کی اپنی زبان کی آواز اور دوسرے انسانوں کی مثبت آوازیں کانوں کے ذریعے دماغ تک جاتی ہیں۔ دماغی خلیات آوازوں کے اثرات کو سارے جسم کے خلیات تک پہنچاتے ہیں۔ جی ہاں! قارئین کرام! یہاں ذرا سوچئے کہ جب دوائی ہمارے مرض کے مطابق ہوتی ہے ‘تو شفاء مل جاتی ہے‘ بالکل اسی طرح جب دماغی سوچیں انسانی جسم کے دس کھرب خلیات کے مطابق ہوتی ہیں تو شفاء کا عمل شروع ہو جاتا ہے۔ معروف عالمی سکالر عبدالدائم کحیل اپنی ریسرچ میں واضح کرتے ہیں کہ انسانی خلیات میں سب سے زیادہ شفاء کا اثر قرآن کی آوازوں کا ہوا ہے۔ یہ حقیقت تجربات سے ثابت ہو چکی ہے۔

میں کہتا ہوں ایسا کیوں ہو کہ انسانی خلیات میں بھی اللہ کو ماننے کی تحریر ہے اور قرآن جو آسمانی پیغام ہے‘ اس کا تعلق اللہ سے ہے کہ وہ اللہ کا کلام ہے۔ یوں روحانی کلام کا پیغام جب دماغ کے ذریعے مادی خلیات تک جاتا ہے تو ایسی ہم آہنگی پیدا ہو جاتی ہے کہ باہر کے جراثیم کو وہ کورونا وائرس ہو یا کوئی اور اس کے لیے سروائیو کرنا اور موجودگی کو دوام دینا مشکل ہو جاتا ہے‘ لہٰذا شفاء کا عمل شروع ہو جاتا ہے۔ قرآن کو اللہ کا کلام نہ ماننے والے کا المیہ یہ ہے کہ اس کے خلیات میں ایک خالق کی تحریر تو موجود ہے ‘مگر ماحول اور شیطان نے اس کو اللہ کا منکر بنا دیا ہے‘ لہٰذا اس کے اندر ایک کشمکش ہے اس کشمکش یا جنگ میں شفاء کا اثر کم سے کم تر ہو جاتا ہے‘ جبکہ مومن کے لیے کہ مومن کی بھی ایمانی سیڑھیاں ہیں‘ اسی کے مطابق ہی شفاء ملتی ہے۔

اور آخری بات یہ ہے کہ آخری فیصلہ قرآن بھیجنے والے اور ڈی این اے پر تحریر لکھنے والے اللہ ہی کا ہے۔ اس پر ایمان کس درجے کا ہے۔ شفاء کو حاصل کرنے والے کو سوچنا ہوگا۔ تیربہدف شفائیہ سورت کا ذکر اگلے کالم میں! (اِن شاء اللہ)

وہ لوگ جو قرآن پر ایمان رکھتے ہیں ‘وہ روحانی ہدایت بھی حاصل کرتے ہیں‘جسمانی شفاء بھی پاتے ہیں اور اللہ تعالیٰ کی رحمت کے حصہ دار بھی بنتے ہیں۔ یاد رہے! میڈیکل کی دنیا میں اس اصول کو تجرباتی بنیادوں پر تسلیم کیا گیا ہے کہ شفاء کے حصول میں آدھا کام دوائی کا ہوتا ہے ‘جبکہ آدھا کام مریض کا اعتقاد اور نظریہ کرتا ہے کہ مجھے شفاء مل جائے گی۔

روزنامہ دنیا ایپ انسٹال کریں