زبیدہ آپا

ہمیشہ سے ایسے لوگ آٹے میں نمک کے برابر ہوتے ہیں۔ اگر پورا سماج ایک بوری آٹا سمجھ لیا جائے‘ تو اس میں پائوبھرنمک ڈالے بغیر روٹی میں لذت پیدا نہیں ہو سکتی۔ کھانے پینے کی دنیا میں جو محفل آرائی زبیدہ طارق مرحومہ نے زبیدہ آپا بن کر کی وہ کسی اور کے نصیب میں نہیں آسکی۔ زبیدہ آپا پاکستان کا ایسا گھریلو نام ہے‘ جو دعائیں دیتا ہوا ٹی وی سکرین پر نمودار ہوا اور دعائیں لیتا ہوا ملکِ عدم کو سدھار گیا۔

گئی تُو ایک مگر یوں کہ کر گئیں تنہا

تمہارے ساتھ گئیں خوبیاں مقدر کی

کہتے ہیں ہر ماتم کدے میں سارے رونے والے صرف مرنے والے کے لئے نہیں روتے ‘ بلکہ لوگ ہر ماتم میں اپنا غم تلاش کرکے اسے شیئر کرنے کے لئے بھی آنسو بہاتے ہیں۔ آپا زبیدہ سے نہ میر ی کبھی کوئی ملاقات ہوئی‘ نہ بات چیت اور نہ ہی ذاتی تعارف ۔ اس کے باوجود بھی مجھے یہ کہنے میں کوئی عار نہیں کہ میں نے فیملی کے ساتھ بیٹھ کر ان کے شو دیکھے ، ان کی باتیں سنیں۔ اسی لئے ان کی رِحلت پر یوں لگاجیسے ہم سب سے پاکستان کی اچھی آپا دور ہوگئی ہیں۔

ان کے غم میں میرے گھر والوں کو دو چہرے دکھائی دیئے۔ پہلا چہرہ میرے بچوں کی نانی نذیر بیگم صاحبہ کا تھا جو پوٹھوہار کی معروف ماہر تعلیم تھیں۔ جبکہ دوسرا میرے بڑے بھائی خالد اعوان صاحب مرحوم کا۔ بھائی صاحب سال 2010ء میں کینسر کے خلاف تین سالہ جنگ ہار کر راہیِ ملکِ عدم ہوئے۔ والد صاحب ملک علی حیدر کی طرح بھائی خالد صاحب کو وفات کے لئے مغفرت کا عشرہ اور 13 رمضان المبارک کا دن نصیب ہوا۔ بھائی صاحب نے زندگی کی آخری 7 راتیں وینٹی لیٹر پر گزاریں۔ وینٹی لیٹر کا مطلب آپ جانتے ہی ہیں۔ مشین کے ذریعے مصنوعی سانس۔ ان سات دنوں میں نہ انہوں نے آنکھ کھولی اور نہ کوئی بات چیت کرسکے۔ ہم جاتے اور ہر روز ان کی آواز، گفتگو اور نظر اُٹھنے کا انتظار کر کے آئی سی یو سے دل گرفتہ واپس آجاتے۔ لیکن ساتویں شب کو عجیب واقعہ ہوا۔ میں رات 10بجے تک ڈاکٹرز اور خاندان کے افراد سمیت آئی سی یو میں رہا۔ بھائی صاحب کی آواز‘ نہ حرکت اور نہ ہی آنکھ کھلتے نظر آئی۔ رات تقریباً اڑھائی بجے میرا بھتیجا ہسپتال سے آیا۔ اس کی گفتگو سن کر ہم سارے خوشگوار حیرت میں ڈوب گئے۔ اس نے بتایا کہ ابھی15 منٹ پہلے بھائی خالد صاحب کے ہونٹ ہلے اور آنکھ کی پتلیاں کھلیں ۔ انہوں نے ہاتھ کے اشارے سے کمرے میں موجود لوگوں کو پاس بلایا اور انتہائی دھیمی آواز میں کہنے لگے ''بلائو‘‘۔ گھر والوں نے ان کے بچوں، بیگم اوردیگر بھائیوں کے نام لیے جس پر وہ نفی میں سر ہلاتے رہے۔ جب میرا نام آیا تو انہوں نے کہا: ہاں بلائو۔ میں پاکستان انسٹیٹیوٹ آف میڈیکل سائنسز کے آئی سی یو وارڈ میں پہنچا۔ ان کا ہاتھ دونوں ہاتھوں میں لیا، منہ سے منہ لگا دیا۔ ان کا چہرہ آنسوئوں سے تر تھا۔ جو گفتگو ہوئی وہ خالص گھریلو تھی‘ جسے بیان کرنے کا یہاں محل نہیں۔ اس گفتگو کے تھوڑی دیر بعد بھائی صاحب نیند کی وادی میں جا بسے ''ابدی نیند‘‘۔ ہم بھائیوں میں وہ سب سے بڑے تھے‘ لیکن خاندان، جرگہ اور سیاست ہر جگہ بڑے ہونے کے باوجود میرے ہر فیصلے کی تائید نہیں بلکہ رکھوالی کیا کرتے تھے۔

مرے ماضی کے اے سرسبز لمحو

پلٹ آئو کہ تنہا رہ گیا ہوں

اگلے دن عید گاہ والے پیر نقیب الرحمٰن صاحب کی بیٹی کی شادی تھی۔ آج کل شادیوں میں جس چیز کی کوئی پروا نہیں کرتا‘ اسے ''وقت‘‘ کہتے ہیں۔ شادیوں کے اس سیزن میں ہر روز کئی کئی دعوت نامے نبھانے پڑتے ہیں۔ اکثر ایسا ہوتا ہے کہ کئی شادیاں بھگتا کر گھر دیر سے پہنچے اور سوال کیا کھانے کے لئے کچھ ہے؟ اس دعوتِ شادی خانہ آبادی میں سے بھی کھانا کھانے سے پہلے نکلنے لگا تو نقیب الرحمٰن صاحب نے ہاتھ پکڑ لیا اور بولے بیٹی کو دعا تو دے جائیں۔ مجھے یہاں بھی زبیدہ آپا یاد آئیں۔ینگ مدرز اکثر چھوٹے بچوں کے لیے زبیدہ آپا سے ٹی وی پر آن لائن مشورے مانگتی تھیں۔ پہلے بچے کی پرورش کے وقت ہر نوجوان ماں مامتا سے بھرپور مگر رموز ِافزائش میں نا تجربہ کار ہوتی ہے‘ لہٰذا بچوں کے حوالے سے ینگ مدرزٹی وی پر گفتگو کرنے والے ہر مرد کو افلاطون اور ہر خاتون کو دیوی ماتا سمجھ کر فون کرتی ہیں۔ جواب میں ینگ مدرز کو طنز، طعنے اور ڈانٹ ڈپٹ ،وہ بھی انتہائی رعونت کے ساتھ سننے کو ملتے ہیں۔ زبیدہ آپا ان نو آموز مائوں کے لئے ٹوٹکوں کا بینک آف دولت پاکستان تھیں۔ نہ صرف مفت ماہرانہ مشورہ دیتیں بلکہ ساتھ دل کشا دعائوں کا تحفہ پیش کرنا بھی اُن کی فطرت میں شامل تھا۔

مجھے یہ ابھی کل کی بات لگتی ہے‘ جب ہمارے آنگن میں پہلی ننھی پری عائشہ اتری۔ میری بیگم یاسمین نے دوستوں اور عزیزوں کے گھروں میں مٹھائی کے ڈبّے بھجوائے۔ جواب میں اکثر فون کرنے والوں نے یوں دلجوئی فرمائی ''پُتر دیِ مبارک ہووے‘‘۔ عائشہ کے دل میں پیدائشی سوراخ تھا۔ محض 72 دن بعد پولی کلینک ہسپتال اسلام آباد کے بچگانہ وارڈ میں عائشہ کو آخری علاج کے لیے مامتا سے سرشار نرس نے گود میں اُٹھایا‘ تو اس نے گردن موڑی ماں باپ کو دیکھا‘ اور یوں لگا جیسے زبانِ حال سے کہہ رہی ہو بابا مجھے روک لو۔ میں نے ابھی گڑیوں سے کھیلنا ہے۔

جانے والوں کو کہاں روک سکا ہے کوئی

تم چلے ہو تو کوئی روکنے والا بھی نہیں

زبیدہ آپا جیسے لوگوں کے دو خاندان ہوتے ہیں۔ ایک حسبِ ونسب فیملی اور دُوسرے لارجرفیملی۔ دونوں جگہ زبیدہ آپا قسمت کی دھنی نکلیں۔ زہرہ نگاہ، فاطمہ ثریا بجیا اور انور مقصود جیسے نابغہ لوگوں سے خون کا پہلا رشتہ‘ جبکہ اپنے وطن کے 20 کروڑ لوگوں کے ساتھ غذا ، دُعا، وفا اور دوا کا تعلق بھی۔ اسی لیے اس بخت آور خاتون کا نام اور کام دونوں ہی کالم نگاروں‘ ممبرانِ پارلیمنٹ اور تجزیہ کاروں سمیت فنکاروں کے لیے محاورہ بن چکا تھا۔ پارلیمنٹ کے فلور پر جب وزیر صاحب سوال کا جواب دینے سے معزور نظر آئیں تو پیچھے سے آواز آتی ہے: زبیدہ آپا کے ٹوٹکے پڑھ لو۔ زبیدہ آپا سے پہلے فن وادب کی دنیا میں تخیلاتی کردار ہوا کرتا تھا‘ مشورہ خانم کے نام سے موسوم۔ مجھے یقین ہے کراچی میں فرضی خاتون کرداروں پر بہترین ڈرامے تخلیق کرنے والے زبیدہ آپا کو جلد موضوع بنائیں گے۔ ایک انتہائی روایتی سا گھر یلو کام کسی کو اس قدر سربلندی اور عزت سے سرفراز کر سکتا ہے ۔ کھانے پکانے کے شو کرنے والوں کے حوالے سے کوئی سوچ بھی نہیں سکتا تھا ۔ اس کاایک اور ثبوت یہ بھی ہے کہ زبیدہ آپا کے نام پر خواتین کی ضرورت کی اشیاء کے باقاعدہ برانڈ مرچنڈائیز ہو گئے۔ حق تو یہ ہے کہ بعد اَز مرگ ہی سہی ریاست زبیدہ آپا کو سرکاری اعزاز سے نوازے۔ وہ تو اپنی زندگی میں ہی پاکستان کی مشہور ترین محترم خواتین میں شامل ہونے کا اعزاز لے گئیں۔

ــ''حق مغفرت کرے‘‘

ینگ مدرزٹی وی پر گفتگو کرنے والے ہر مرد کو افلاطون اور ہر خاتون کو دیوی ماتا سمجھ کر فون کرتی ہیں۔ جواب میں ینگ مدرز کو طنز، طعنے اور ڈانٹ ڈپٹ ،وہ بھی انتہائی رعونت کے ساتھ سننے کو ملتے ہیں۔ زبیدہ آپا ان نو آموز مائوں کے لئے ٹوٹکوں کا بینک آف دولت پاکستان تھیں۔ نہ صرف مفت ماہرانہ مشورہ دیتیں بلکہ ساتھ دل کشا دعائوں کا تحفہ پیش کرنا بھی اُن کی فطرت میں شامل تھا۔