کس کی آگ میں کون جلا؟

سینکڑوں خاندانوں کو مالی طور پر برباد کر دینے والی کراچی ٹمبر مارکیٹ کی آگ کے شعلے ابھی ٹھنڈے نہیں ہوئے تھے کہ لاہور انارکلی میں لگنے والی آگ نے 15افراد کی زندگیاں چھین لیں۔ سانحہ پشاور کی اذیت ابھی کم نہ ہوئی تھی کہ ان اندوہناک واقعات نے روح کو گھائل کر دیا۔ یہاں ہر روز کوئی صدمہ ، کوئی نیا سانحہ مفلوک الحال محنت کش عوام کی نفسیات پر نئے زخم داغ جاتا ہے۔

30 دسمبرکو روزنامہ دنیا میں شائع ہونے والی راجہ محبوب صابر اور محمد حسن رضا کی رپورٹ کی مطابق ''صوبائی دارالحکومت سمیت پورے پنجاب میں 88 فیصد پلازوں اور سرکاری عمارات میں آگ لگنے یا کسی دوسری ہنگامی صورت حال سے نمٹنے کے لئے کوئی انتظام موجود نہیں ہے۔ لاہور میں آگ سے نمٹنے کے انتظامات نہ کرنے والے پلازوں کے خلاف کارروائی غیر موثر ہو کے رہ گئی ہے۔ ایل ڈی اے کی تمام تر توجہ کمرشلائزیشن فیس اور واجبات کی وصولی تک ہی محدود ہے۔ جن پلازوں کو سیفٹی انسپیکشن کے بعد سربمہر کرنے کا فیصلہ کیا گیا تھا اس پر عمل درآمد نہیں ہوسکا‘ صرف اندرون لاہور میں ایسی سینکڑوں عمارتیں ہیں۔ شاہ عالم مارکیٹ، رنگ محل، اعظم کلاتھ مارکیٹ، نوگراں، بازار تیزابیاں، چونا منڈی، موچی دروازہ، سوہا بازار، اندرون شاہ عالمی، پاپڑ منڈی اور کشمیری بازار سمیت بیشتر بازار ایسے ہیں جہاں فائر بریگیڈ کی گاڑیاں پہنچ ہی نہیں سکتیں۔ سرکاری اداروں کی غفلت اور لاپروائی کے باعث آگ لگنے کی صورت میں بڑے جانی اور مالی نقصان کے خدشات ہر وقت موجود ہیں‘‘۔ اگر لاہور کی صورت حال یہ ہے تو باقی شہروں کی حالت زارکیا ہوگی؟ اور پھر پسماندہ صوبوں کے سیکڑوں شہروں اور قصبوں کو مدنظر رکھا جائے تو سنگین صورت حال کا ادراک بخوبی ہوجاتا ہے۔

11ستمبر 2012ء کو بلدیہ ٹائون کراچی میں جس گارمنٹ فیکٹری کو آگ لگی تھی اس کے دروازوں پر تالے لگے ہوئے تھے اور کھڑکیوںکو آہنی سلاخوں سے بندکیا گیا تھا۔ ہنگامی راستہ یا سیفٹی انتظامات تو دورکی بات ، یہ فیکٹری کسی جیل خانے کا منظر پیش کرتی تھی جہاں شرمناک حد تک قلیل اجرتوں پر محنت کشوں (بچوں اور خواتین سمیت) سے 12سے 16گھنٹے کام لیا جاتا تھا۔ مزدوروں کی کوئی رجسٹریشن یا ریکارڈ موجود نہ تھا جس کی وجہ سے ہلاک ہونے والوںکی درست تعداد کا آج تک پتا نہیں چل سکا۔ محتاط اندازوںکے مطابق کم از کم تین سو محنت کش لقمہ اجل بنے۔ اسی روزگلشن راوی لاہور میںجوتے کی فیکٹری میں آگ لگنے سے 100 سے زائد محنت کش زندہ جل گئے۔ 9مئی 2013ء کو ایجرٹن روڈ لاہور پر واقع ایل ڈی اے پلازہ میںکئی ملازمین کو نگل جانے والی آگ کے شعلے کئی دنوں تک بھڑکتے رہے۔ فائر بریگیڈکے پاس اتنی بلندی تک پانی پھینکنے کا سازو سامان ہی نہ تھا، کئی افراد نے ساتویں منزل سے کود جانے کو زندہ جلنے پر فوقیت دی۔ دردناک واقعات کا ایک تسلسل ہے لیکن آج تک کتنے سرمایہ دار مالکان کو سزا ہوئی؟ کس سرکاری ادارے کی جواب طلبی ہوئی؟ فیکٹریوں میں سیفٹی انتظامات کو یقینی بنانے کے لئے کیا اقدامات کئے گئے؟ یہ سوال حکمران طبقے کی ریاست کے منہ پر طمانچے سے کم نہیں ہیں۔ جھلس کر کوئلہ ہوجانے والے محنت کشوں کے خاندان آج بھی یہ سوالات اپنی اداس آنکھوں میں سجائے ہوئے ہیں۔

سلنڈر پھٹتے ہیں، ٹریفک حادثات ہوتے ہیں اور ان کھٹارہ گاڑیوں میں اذیت ناک سفر کرنے پر مجبور غریب اور محنت کش ہی مرتے ہیں۔ پھر زخمیوں کے علاج کا کوئی انتظام نہیں ۔ سرکاری ہسپتال موت کی فیکٹریاں بنے ہوئے ہیں۔ نرسوں اور ڈاکٹروں کی شدید قلت ہے، ادویات ناپید ہیں۔ مریض اتنے ہیں کہ بستر تو کیا فرش پر بھی جگہ مل جائے تو غنیمت۔ نظام صحت پر ریاستی اخراجات کی فہرست میں یہ ملک خداداد دنیا میں سب سے نیچے ہے۔ ایک موٹروے ہے جس کے قصیدے سنتے سنتے کان پک گئے ہیں۔ موٹر وے سے نیچے اتریں تو یوں لگتا ہے کہ کسی اور ملک میں آگئے ہیں۔ سڑکیں ٹوٹی ہوئی، عمارتیں بوسیدہ، عوام بدحال اور ٹریفک پُرانتشار۔ حادثات میں مرنے والوں کی تعداد مہلک بیماریوں کی اموات سے بھی زیادہ ہے۔ آگ بجلی کے شارٹ سرکٹ سے لگے یا گیس سلنڈر کے پھٹنے سے، مرتے غریب ہی ہیں جو ویسے ہی بجلی اور گیس سے محروم ہیں۔

ہر حادثے کے بعد حکمرانوں کا رد عمل زخموں پر نمک چھڑکتا ہے۔ حکومت رسمی کارروائی کے طور پر لواحقین کو جو ''امداد‘‘ دیتی ہے اس سے کئی گنا زیادہ رقم کا اعلان کچھ دوسرے لوگ بھی کر دیتے ہیں۔ غریب کا مقدرکیوں نہیں بدلتا اور زرداروں کے مقدر میں نہ ختم ہونے والی امارت اور عیاشی آخر کس نے لکھی ہے؟ حکمرانوں کے یہ خیراتی ناٹک بے مقصد نہیں ہیں !

بے خودی بے سبب نہیں غالب

کچھ تو ہے جس کی پردہ داری ہے

ایسے حادثات اور سانحات پر کارپوریٹ میڈیا اور حکمرانوں کی جانب سے ''غم‘‘ اور ''دکھ‘‘ کی شورش اس لیے بپا کی جاتی ہے کہ حقیقی وجوہ اوراصل مجرموںکی پردہ داری کی جاسکے۔ یہ سوال نہ اٹھے کہ آخر اس کا ذمہ دار کون ہے؟ اور سب سے بڑھ کر اس نظام پر بحث نہ کھلے جس میں امیر، امیر تر ہوتا جارہا ہے اور غریب کیڑے مکوڑوں کی طرح ہر روز مر رہے ہیں۔

اس ملک میں الجھے ہوئے تاروں اور ہزارہا بوسیدہ کھمبوں پر مشتمل بجلی کی ترسیل کے ناقابل اعتبار نظام کو اب تک ترقی یافتہ ممالک کی طرح زیر زمین کیوں منتقل نہیں کیا گیا؟ گیس کی سپلائی ناقص کیوں ہے؟ فیکٹریوں، ملوں، بازاروں، دفاتر اور غریب طبقے کی آبادیوں میں ہنگامی حالات سے نمٹنے کا کوئی انتظام کیوں موجود نہیں ہے؟ سول ڈیفنس کا ادارہ سرے سے ناپید کیوں ہے؟ ہسپتال کیوں ادویات اور سہولیات سے خالی ہیں؟انفراسٹرکچرکیوں منصوبہ بندی سے عاری ہے؟ ان تمام تر سوالات کا مشترک جواب بالکل سادہ ہے: چھ دہائیاں گزر جانے کے بعد بھی اس ملک کا حکمران طبقہ ایک جدید صنعتی سماج اور قومی ریاست کی تشکیل میں مکمل طور پر ناکام رہاہے۔

سامراج کا کمیشن ایجنٹ یہاں کا سرمایہ دار طبقہ اپنی تاریخی متروکیت، تکنیکی پسماندگی اور مالیاتی کمزوری کی وجہ سے روز اول سے ریاستی خزانے کو لوٹنے میں مصروف ہے۔ ٹیکس، بجلی اور گیس کی چوری کے بغیر تیسری دنیا کے یہ سرمایہ دار اپنا اقتصادی وجود ہی برقرار نہیں رکھ سکتے۔ محنت کشوں کے تحفظ کے انتظامات اوردوسری سہولیات فراہم کرنے کی صورت میں ان سرمایہ داروں کی شرح منافع گر جائے گی۔ ریاست کے کردار کا تعین حکمران طبقہ کرتا ہے۔ جہاں حکمران طبقہ ازلی طور پر کرپٹ، حریص اور نا اہل ہو وہاں صحتمند ریاست بھلا کیسے تعمیر ہوسکتی ہے؟چنانچہ بالائی بیوروکریسی سے لے کر نچلی سطح کے ٹیکس افسران، لیبر انسپکٹر اور میٹر ریڈرز تک سب کے سب بدعنوانی کی اس معیشت میں حسب توفیق حصہ دار ہیں۔ پھر اسی حکمران طبقے کے دانشور، مبلغ اور مذہبی پیشوا ہمیں اس نظام میں کرپشن کے خاتمے کا درس دیتے ہیں جو چل ہی کرپشن اور کالے دھن پر رہا ہے! وعظ و نصیحت کرنے والے یہ خواتین و حضرات اچھی طرح جانتے ہیں کرپشن کی وجہ سے یہ نظام خراب نہیں ہے بلکہ کرپشن اس نظام کی پیداوار، ضرورت اور قوت محرکہ ہے۔

یہاں توکوئی اس نظام کا نام لینے کو بھی تیار نہیں ہے۔ کوئی ''جمہوریت‘‘ کو نظام کہتا پھرتا ہے توکسی نے آمریت کو ''نظام‘‘ بنا رکھا ہے۔ اور تو اور یہاں مذہبی قدامت پرستی یا''لبرل ازم‘‘کو بھی ''نظام‘‘ بنا دیا گیا ہے۔ ذرائع پیداوارکی نجی ملکیت اور محنت کش طبقے کے استحصال پر مبنی اس نظام کا نام ''سرمایہ داری‘‘ ہے جس میں ہر چیز منافع کے لیے پیدا کی جاتی ہے۔ ہر رشتے، ہر معاشی سرگرمی کو شرح منافع کے معیار سے پرکھا جاتا ہے۔ آج یہ نظام گل سڑکر انسانی سماج کے لیے ایک ناسور بن گیا ہے جسے انقلابی جراحی کے ذریعے کاٹ پھینک کر ہی نسل انسان کی بقا کی ضمانت فراہم کی جاسکتی ہے!