گورنرراج سے پہلے کچھ سوچ لیجئے!

سندھ کے حوالے سے خبریں گرم ہیں کہ سندھ میں جلد ''گورنرراج‘‘ آنے والا ہے اور ایک غیر جانبدار حکومت آئے گی۔ خبر بہت اچھی ہے، اسے ہم ''گڈ نیوز‘‘ بھی کہہ سکتے ہیں۔ اِس سے دل کو تسکین اور جان کوفرحت انگیز ہوا کا جھونکا آتا محسوس ہوتا ہے۔ آئیڈیل باتوںکی خوبی یہ ہے کہ انسان خوابوںکی دنیا میں چلا جاتا ہے اور لگتا ہے کہ ''سب کچھ ٹھیک ہونے والا ہے‘‘ لیکن سیاسی تجزیہ نگاروں کا کہنا ہے کہ سندھ کے ''زخم‘‘ اور ''بیماری‘‘ اتنی معمولی بھی نہیں کہ ''او پی ڈی‘‘میں ہی مرہم پٹی سے ٹھیک ہوجائے اور''فٹنس‘‘کا سر ٹیفکیٹ دے دیا جائے۔ سندھ اس وقت اپنی تاریخ کے تباہ کن دور میں داخل ہوچکا ہے۔ اندرون سندھ کی خبریں خراب کمیونیکیشن کے باعث قومی افق تک پہنچنا بند ہوگئی ہیں۔ اسلام آباداندھا‘بہرا اورگونگا بن چکا ہے۔ اُسے ملک سے زیادہ پارلیمنٹ میں عددی تائید کی ضرورت ہے ۔اب صرف کراچی نشانے پر رہتا ہے۔ کراچی بھی دو طرح کا ہے۔۔۔۔ ایک شہری کراچی اور دوسرا کچی آبادی میں پھیلا ہوا کراچی ۔ دونوں کراچی مختلف ہیں، زیادہ تر جرائم کچی آبادیوں والے کراچی میں ہوتے ہیں اور یہ بات تو اب قانون نافذ کرنے والے ادارے بھی تسلیم کرنے لگے ہیں کہ دہشت گردوں اور خود کش حملہ آوروں کے گروہ کچی آبادیوں میں روپوش رہتے ہیں۔ رینجرز نے اورنگی ٹائون‘ لیاری‘سہراب گوٹھ اور منگھوپیرکی آبادیوں میں یکے بعد دیگرے کئی ایک مقابلوں میں دہشت گردوں اور جرائم پیشہ افراد کا بڑی حد تک قلع قمع کیا ہے، لیکن ہر دوسرے آپریشن کے بعد یہ لگتا ہے کہ پہلے والا آپریشن کچھ بھی نہیں تھا۔ دوسری طرف اندرون سندھ آوے کا آوا ہی بگڑا ہوا ہے۔۔۔۔ ڈکیتی ‘بھتہ خوری‘مال بردار گاڑیوں پر حملے‘اغوا برائے تاوان ‘راہداری ٹیکس اورروزانہ نجی عقوبت اور جیل خانوں کی دریافت اورخاندانوں کو حبس بے جا میں رکھ کر ان سے کھیتوں میں بیگار لینااب جرم تصورہی نہیں کیا جاتا۔ سندھ حکومت کے اعلیٰ افسران اور وزراء تک اس کا اعتراف کرتے ہیں۔ پانچ سے چھ ہزار جعلی سکولوں کے گھوسٹ استادوں کی تنخواہیں اور تعلیمی فنڈز دھڑلے سے ہڑپ کئے جاتے ہیں ۔ سندھ میں لوٹ مار کرنے والوں کی اداکاری زیادہ اچھی ہے اور یہ ''لٹیرے‘‘سندھ میں لوٹ مار کرتے ہیں، انسانوں کو غلام بناتے ہیں اور کراچی واسلام آباد میں کلف لگے کپڑے پہن کر جمہوریت کے فضائل پر ''عالمانہ‘‘ پریس کانفرنسیں کرتے ہیں۔ جمہوریت کی یہ خوبی ہے کہ کراچی ہو یا اندرون سندھ، ہر جگہ عوام کوجمہوریت کے حسین نام پر غلام بننے پر''راضی‘‘کرلیا گیا ہے۔ گورنرراج کی مخالفت بھی اسی لیے کی جارہی ہے کہ یہ جمہوریت کے خلاف ہے اورآئین میں اس کی گنجائش نہیں ہے ۔ لیکن کوئی یہ کیوں نہیں پوچھتا کہ سینیٹ کے لیے ووٹ ‘ وزارتیں اورنوکریاں بیچنے کی اجازت کون سے آئین میں ہے؟ ہمیں بھی وہ آئین لاکر دکھادوجس میں لکھا ہوکہ غریب اور بد حال علاقے کا ایم پی اے ہاتھی سے بڑی سائزکی پانچ دروازوں والی جیپ خرید سکتا ہے اور اپنے حلقہ انتخاب میں اِس طرح دندناتا پھرتا ہے کہ اگرکوئی مخالف سامنے آیا تو وہ کچلا جائے گا۔ سندھ میں گورنر راج کی بات خوب زور شور سے کی جارہی ہے لیکن کوئی یہ نہیں سمجھ رہا کہ یہ گورنر راج بھٹو دور میں بلوچستان میں لگائے جانے والے گورنر راج جیسا ہوگا یا میاں نواز شریف کے سندھ میں لگائے جانے والے گورنر راج جیسا ہوگا جو کوئی بھی رزلٹ نہ دے سکا اور آخرکار میاں نواز شریف کی حکومت کو کھا گیا۔کیایہ 1976ء میں مشرقی پاکستان میں لگائے گئے عبدالمالک کے گورنر راج جیسا تو نہیںہوگا؟ یہ گورنر راج کون لگائے گا؟ سول حکومت یا فوج؟ اگر فوج لگائے گی تو سول قوانین کے تحت بیوروکریسی‘ پولیس اور انصاف کے اداروں میں ''چپکے چپکے‘‘ بھرتی کیے جانے والے ''وفادارکارکنوں‘‘ سے مطلوبہ رزلٹ کیسے حاصل کیا جائے گا؟ مشرقی پاکستان کے آخری دنوں میں یہی غلطی ہوگئی تھی پوری کی پوری پولیس بنگالی تھی اور فوج غیر بنگالی۔ زبان اور تہذیب کے ٹکرائو نے اتنے فاصلے پیدا کردیے کہ مشرقی پاکستان بنگلہ دیش بن کر ہمیشہ کے لیے فاصلے پر چلا گیا۔ آج سندھ کی بھی تقریباً وہی ملتی جلتی صورت حال ہے۔ پولیس اور سول سروس میں آدھے لوگ ''رشوت‘‘ دے کر ملازمت اختیار کرتے ہیں ان کو اپنی ''ریکوری‘‘بھی کرنا ہوتی ہے اور باقی اہلکار وہ ''خفیہ بارودی سرنگیں‘‘ہیں جنہیں مناسب وقت پراشارہ کیا جائے گا اور دھماکہ خیز کھیل شروع ہوجائے گا۔ اِس وقت سیاست دانوں کی سب سے بڑی اسٹریٹیجی یہ ہے کہ ''خاموش‘‘ رہو یعنی ''ویٹ اینڈ سی‘‘!

جب پانچ ''بڑوں‘‘کا کراچی میں اجلاس ہوا تو وہاں آرمی چیف کو نمایاں کیا گیا۔ایک طرف وزیراعظم تھے تو دوسری طرف سابق صدر زرداری ، ایک طرف وزیر اعلیٰ سندھ تو دوسری طرف گورنر سندھ تھے۔ یہ اجلاس کراچی آپریشن کے حوالے سے تھا اوراس میں کراچی کی پارلیمانی لیڈر شپ کو نکال باہرکیا گیا تھا۔ گورنرتو ایم کیو ایم کا ''اُدھار‘‘ دیا ہوا ہے، وہ ایم کیو ایم کی پالیسی کی نمائندگی نہیں کرتا، وفاق کا نمائندہ ہے اوروفاق کی بات کرتا ہے۔ اگر اِس اجلاس میں فاروق ستاریا ایم کیو ایم کا کوئی اور پارلیمانی لیڈر ہوتا تو یہ زیادہ بھر پور ہوتا اور اہلِ دانش کو مشرقی پاکستان کے غیر متوازن اجلاسوں کی یاد تازہ نہ ہوتی ۔ نہ جانے یہ کوئی غلطی تھی یا کسی نئے کھیل کا حصہ ! کیا گورنر راج اسی طرح غیر متوازن انداز میں لگانے کی افواہیں پھیلائی جارہی ہیں،کیا گورنر راج میںیہی بیور کریسی ‘ سندھ پولیس اور انتظامیہ ''امن کی فصل‘‘ اگائیں گے؟سچ لکھنے کو دل تو بہت چاہتا ہے لیکن سقراط کے حشرکے بعد سیانوںکی یہ بات سمجھ آتی جارہی ہے کہ زیادہ سچ نہیں بولنا چاہیے۔ خاموش آدمی زیادہ ''سُکھی‘‘ رہتا ہے۔