کیاایم کیو ایم کا مستقبل ماضی میں پوشیدہ ہے؟

تاریخ خود کو نہیں دہراتی، یہ آدمی ہے، جو اپنے مفاد کے لیے وقت کی بساط پر یکساں چالیں چلتا آیاہے۔ جسے کمزورجانا،اس کا استحصال کیا، خود سے طاقتور کی پرستش کی۔ اور یوں تاریخ کے اوراق پر یکساں کہانیوں کا جنم ہوا۔

ایم کیو ایم، جو اندرون سندھ اور پنجاب میں یکساں طور پر غیرمقبول ہے، آج اپنی سیاسی تاریخ کے کٹھن ترین دور سے گزر رہی ہے۔ 84ء میں ایک طلبا تنظیم سے سیاسی جماعت میں ڈھلنے والی اس پارٹی کو۔۔۔ جس کے اولین رہنمائوں میں '' بانی قائد‘‘ کا نام شامل نہیں تھا، 86ء میں بشریٰ زیدی کے واقعے کے بعد جوعروج ملا، اس کے لیے اس شہر اور جماعت دونوں کو بھاری قیمت ادا کرنی پڑی۔ تین عشروں میں بہت خون بہا۔ لسانی فسادات میں شہری کام آئے، آپریشن میں ایم کیو ایم کے کارکن۔ 87ء کے بلدیاتی اور 88ء کے عام انتخابات میں قوت بن کرابھرنے والی اِس جماعت کو، جو آنے والے عشروں میں شہر کی باگ ڈور سنبھالنے والی تھی، بغاوتوں کا بھی سامنا رہا۔ پہلی بغاوت 91ء میں ہوئی تھی، جب آفاق احمد اور عامر خان اس پارٹی سے الگ ہوگئے۔ مستقبل میں اس نوع کی بغاوتوں سے نمٹنے ہی کے لیے منزل پر رہنما کو ترجیح دینے کی سوچ پروان چڑھی۔ مگر یہ سوچ ہمیشہ نہیں رہنے والی تھی۔

بے شک، یہ آدمی ہے، جو اپنے مفاد کے لیے وقت کی بساط پر یکساں چالیں چلتا آیاہے۔۔۔

کل تک جس پارٹی کی مرضی کے بغیرکراچی میں ایک پتا بھی نہیں ہلتا تھا، آج وہ دھڑوں میں بٹ چکی ہے۔ بکھری ہوئی ہے۔ ایک طرف عشروں قبل بغاوت کرنے والے آفاق احمد ہیں، جو فی الحال خاموش بیٹھے ہیں۔ دوسری طرف تازہ تازہ اپنے ضمیرکا ادراک کرنے والے مصطفی کمال ہیں، جو'' الزام، آنسواور امید‘‘ کی سیاست کر رہے ہیں۔ ان کے لیے آسانیاں ہیں۔ ماسوائے پاکستانی جھنڈے کو پارٹی پرچم کے طور پر استعمال کرنے کی ممانعت کے، اُن کی راہ میں کوئی رکاوٹ حائل نہیں ۔ مخالفین کا الزام ہے کہ ُانھیں ''کچھ حلقوں‘‘ کی سپورٹ حاصل ہے۔ ممکن ہے ایسا ہو، مگر سمجھنے کی بات یہ ہے کہ دو کروڑ کے اس شہر میں، ٹھپا مافیا اورزور زبردستی کے باوجود، انتخابات والے روز عوام کی سپورٹ ہی Game Changer ثابت ہوتی ہے، اور اِس محاذ پر پی ایس پی کومزید کام کرنے کی ضرورت ہے۔

22 اگست کوپاکستان مخالف تقریر کے بعد بانی متحدہ سے راہیں جدا کرنے والا فاروق ستار گروپ اپنے برسوں کے تجربے، تنظیمی سیٹ اپ اور سیکڑوں منتخب نمائندوں کی وجہ سے مشکلات کامقابلہ تو کر رہا ہے، مگریہ واضح ہے کہ جو طاقت اور اختیار ماضی میں اِسے حاصل تھا، اب اس سے یکسر محروم ہوچکا ہے۔ جو وسیم اختر 12 مئی کے دن کنٹینر پر کھڑے دبنگ لہجے میں بیانات داغ رہے تھے، اب سوٹ پہنے اختیارات مانگتے نظر آتے ہیں۔ یہ کہنا غلط نہیں کہ انتخابات کے قریب، جب فاروق ستار گروپ کے قومی اور صوبائی اسمبلی کے ارکان اپنے عہدوں اور مراعات سے محروم ہوجائیں گے، تب انھیںدشوار گزار گھاٹیوں سے گزرنا پڑے گا۔

جہاں تک ایم کیو ایم لندن کا تعلق ہے، جسے اب مخالفین طنزاً ''ایم کیو ایم العالمی‘‘ کہنے لگے ہیں، اس کے لیے حالات کٹھن ہیں۔ کل تک جس قائد سے تعلق کواپنی شناخت ٹھہرایا جاتاتھا، آج اس سے وابستگی ظاہر کرتے ہوئے بھی احتیاط برتی جارہی ہے۔ 22 اگست کے نعرے کے بعدسامنے آنے والی رابطہ کمیٹی کے ارکان زیر عتاب آئے۔ کارکنوں کے خلاف بھرپور آپریشن ہوا۔ یہی سبب ہے کہ کراچی میں لندن سے ہمددردی رکھنے والوں کی اکثریت نے ہونٹوں پر چپ کے تالے ڈال لیے ہیں۔ اور جو رہنما لندن میں ہیں، وہ ڈاکٹر ظفر عارف سمت گرفتار ہونے والے ارکان کے حق میں بیانات داغنے میں مطمئن ہیں، یہاں آکر جدوجہد کرنے میں دلچسپی نہیں رکھتے۔ منی لانڈرنگ اورعمران فاروق قتل کیس بھی ختم نہیں ہوئے۔ سرنگ طویل اور تاریک ہے۔۔۔الغرض ایم کیو ایم کو درپیش حالیہ بحران ماضی کے بحرانوں سے زیادہ گمبھیر ہے۔ وہ جماعت، جس نے 2013 کے انتخابات میں اردو اسپیکنگ ووٹرز کی جانب سے عمران خان کی غیرمتوقع حمایت کے باوجودقومی اسمبلی کی 18 سیٹیں اپنے نام کر لیں تھیں، ماضی میں گم ہوتی معلوم ہوتی ہے۔

معروضی حالات تو یہی کہتے ہیں کہ ایم کیو ایم زوال کا شکار ہے، لیکن اس جماعت کے خاتمے کااعلان قبل ازوقت ہوگا۔ یاد رہے، ماضی میں بھی اس طرح کے کئی دعویٰ کیے گئے ۔ماضی میں بھی آپریشن ہوئے ۔ سخت آپریشن۔ محلوں میں خندقیں کھد گئیں، علاقوں کے داخلی حصوں میں آہنی دروازے لگ گئے۔ ماضی میں بھی اس جماعت کو غدارٹھہرا یاگیا، ٹارچر سیل اور بوری بندلاشوں کے شواہد میڈیا کی زینت بنے، نقشے برآمد ہوئے، مگر تمام آپریشنز، الزامات،انکشافات کے باوجود ایم کیو ایم ہر بار ابھر آئی۔اِس کی ایک وجہ تومخلص ووٹرز اور جانثار کارکن ٹھہرے، دوسرا سبب وہ حکمران تھے ، جنھوں نے اپنے اقتدار کو طول دینے کے لیے، اپنے مفادات کے لیے اُسی ایم کیو ایم سے ہر بارہاتھ ملا، جسے وہ فاشسٹ قرار دیتے تھے، اُسی 90 کا رخ کیا، جہاں، ان کے بہ قول،غیرملکی ایجنٹ بیٹھے تھے، اُن ہی کو اسمبلیوں میں خوش آمدید کہا، جن پرکراچی کو پاکستان سے الگ کرنے کا الزام تھا۔ یہی سچ ہے صاحب، ایم کیو ایم کے خلاف آپریشن کرنے والی پیپلزپارٹی اور ن لیگ نے خود ہی دودو باراس جماعت کو حکومت کا حصہ بنایا۔ پرویز مشرف ، جو سویلین کے برعکس زیادہ باخبر تھے،اُن کی نظر میں بھی ایم کیو ایم پسندیدہ ٹھہری۔

تاریخ خود کو نہیں دہراتی، یہ آدمی ہے، جو اپنے مفاد کے لیے وقت کی بساط پر یکساں چالیں چلتا آیاہے،اور یوں تاریخ کے اوراق پر یکساں کہانیوں کا جنم ہوا۔۔۔

اگر مستقبل میں پھر ایم کیو ایم کی ضرورت پیش آئی، پھر کراچی کی قومی اسمبلی کی نشستیں اہمیت اختیار کر گئیں، پھر مرکز کو سہارادرکار ہوا، تو آپ معجزے رونما ہوتے دیکھیں گے۔ایک دوسرے کو طعنے دینے والے راتوں رات ایک ہوجائیں گے۔غیرفطری اتحاد بنیں گے۔ ضرورت پیش آئی، تو ایم کیو ایم لندن کے لیے بھی آسانیاں پیدا کی جاسکتی ہیں۔'' وطن دشمن‘‘کواقتدار کا ستون بنایا جاسکتا ہے۔

ایم کیو ایم کا مستقبل،بظاہرایم کیو ایم کے ماضی میں پنہاں ہے۔ البتہ کچھ عناصر ایسے ضرور ہیں، جو منظر میں نئے رنگ بھر سکتے ہیں۔ ایک سبب تو یہ ہے کہ آج نہ تو ایم کیو ایم کے پاس پہلے جیسا ووٹر ہے، نہ ہی کارکن ، نہ ہی رہنما۔ دوسری وجہ 2013الیکشن میں عمران خان کو پڑنے والا ووٹ ہے، جس کا ایک حصہ دراصل اینٹی ایم کیو ایم ووٹ تھا۔ تحریک انصاف کراچی میں بے وقعت ضرور ہوئی ،مگر الیکشن سے قبل وہ اور جماعت اسلامی خود کو منظم کرسکتے ہیں۔ تیسری اور سب سے اہم وجہ سول اورملٹری قیادت کے گزشتہ تین برسوں کے فیصلے ہیں۔ ماضی کے برعکس اس بار ن لیگ نے ایم کیو ایم کو اقتدار کا حصہ نہیں بنایا۔فاصلہ رکھا۔دوسری طرف سکیورٹی اداروں نے آپریشن کے طریقۂ کار کو تبدیل کیا۔

اگرمیاں صاحب کو مستقبل میں کراچی سے سیاسی حمایت کی ضرورت پیش آئی بھی، تو ممکن ہے، اُن کا انتخاب فاروق ستار گروپ ٹھہرے۔ممکن ہے، وقت کی بساط پراِس بار نئی چالیں چلی جائیں۔ممکن ہے، اس بار ایک نئی تصور ابھر آئے۔