حُرمتِ عدالت

آج کل وطنِ عزیز میں صبح وشام معزول وزیرِ اعظم نواز شریف کے حوالے سے توہینِ عدالت کی دُہائی دی جارہی ہے ، ان میں پیپلز پارٹی بھی شامل ہے ،جو آج تک جناب ذوالفقار علی بھٹو کی سزائے موت کو''عدالتی قتل‘‘ قرار دے رہی ہے ، اس کے الزامی معنی ہیں:منصفوں نے فیصلہ کرکے قتل کردیا ، ورنہ وہ باعزت رہائی کے حقدار تھے۔اس سے قطع نظر کہ عدالتی فیصلہ صحیح تھا یا غلط، یہ ریمارکس کس زُمرے میں آئیں گے؟نیب عدالت نے جناب زرداری کو باعزت بری کیا تو زندہ باد، ہائی کورٹ میں اپیل کردی تو مردہ باد۔اسی طرح جنابِ عمران خان نیب میں شریف فیملی کے پیش نہ ہونے کو توہینِ عدالت قرار دے رہے ہیں ،لیکن وہ خود جس عدالت کو مطلوب ہیں ،وہاں پیش نہیں ہورہے ،الیکشن کمیشن کے لتّے لے رہے ہیں ۔لاہور کے انتخابی جلسے میں جناب خان نے کہا: آپ لوگ سپریم کورٹ کے ساتھ کھڑے ہوں اور پی ٹی آئی کو ووٹ دیں، اس کے معنی یہ ہوئے کہ سپریم کورٹ کا بھی کوئی پولیٹیکل ایجنڈا ہے ، یہ اندازدرست نہیں ہے۔الغرض ایک ہی فعل ایک کے لیے عیب اور دوسرے کے لیے افتخار ہے ،شاعرنے کہا ہے:
تمہاری زلف میں پہنچی تو حُسن کہلائی
وہ تیرگی جو مرے نامۂ سیاہ میں تھی
سیاستدانوںکے ان رویوں سے قطع نظرہم اس مسئلے کا شرعی پہلو سے جائزہ لے رہے ہیں، اللہ تعالیٰ کا ارشاد ہے:''(اے نبی کریم!)تمہارے رب کی قسم !وہ مومن نہیں ہوسکتے تاوقتیکہ آپ کو باہمی تنازعات میں حاکم نہ مان لیں،پھر آپ کے فیصلے پراپنے دل میں کوئی تنگی محسوس نہ کریں اور (اُسے)خوش دلی سے تسلیم کرلیں ،(النسائ:65)‘‘۔ رسول اللہ ﷺ کی یہ خصوصیت ہے کہ آپ کے فیصلوں کو صرف قانوناً ماننا ہی کافی نہیں ،بلکہ انہیں خوش دلی سے قبول کرنا ایمان کے لیے شرطِ لازم ہے ،امام رازی اس آیت کی تفسیر میں لکھتے ہیں:''کیونکہ رسول اللہ ﷺ کے ہر فیصلے کو دل وجان سے تسلیم کرنا ہر مسلمان پر لازم ہے‘‘۔ رسول اللہ ﷺ کا فیصلہ وحیِ ربانی کے تابع ہے اور درحقیقت یہی اللہ کا فیصلہ ہے ،اس آیت کے شانِ نزول کی متعدد روایات میں سے ایک یہ ہے :
''ایک منافق اور یہودی کا جھگڑا ہوگیا، یہودی نے کہا: میرے اور تمہارے درمیان ابوالقاسم ﷺ فیصلہ کریں گے اور منافق نے کہا: میرے اور تمہارے درمیان کعب بن اشرف فیصلہ کریں گے، کیونکہ کعب بن اشرف رشوت خور تھا۔ اس مقدمہ میں یہودی حق پر اور منافق باطل پر تھا۔چونکہ میثاقِ مدینہ میں رسول اللہ ﷺ کو حاکمِ مدینہ تسلیم کیا جاچکا تھا، اس لیے یہودی یہ مقدمہ آپ کی عدالت میں لے جانا چاہتا تھا ۔ اس کے اصرار کے سبب وہ دونوں رسول اللہ ﷺ کے پاس گئے، رسول اللہ ﷺ نے ( شواہد کو دیکھ کر)یہودی کے حق میں فیصلہ کردیا۔ بظاہر کلمہ گو ،لیکن درحقیقت منافق اس فیصلہ سے راضی نہ ہوا اور کہا: میرے اور تمہارے درمیان عمرؓ فیصلہ کریں گے، دونوں حضرت عمر ؓکے پاس گئے ، یہودی نے بتایا:محمد ﷺ میرے حق میں اور اس کے خلاف فیصلہ دے چکے ہیں ،لیکن یہ نہیں مانتا۔ حضرت عمرؓ نے منافق سے پوچھا: کیا ایسا ہی ہے، اس نے کہا: ہاں! آپ نے فرمایا:ذرا رُکو! میں ابھی آتا ہوں، وہ گھر سے تلوار لے کر آئے اور اُس منافق کا سر قلم کردیا۔ پھر اس کے گھر والوں نے نبیﷺ سے حضرت عمر ؓ کی شکایت کی، رسول اللہ ﷺ نے حضرت عمر ؓسے صورتحال معلوم کی ۔حضرت عمرؓ نے کہا: یارسول اللہﷺ!اس نے آپ کے فیصلہ کو رد کردیا تھا۔ اسی وقت جبریل ِ امینؑ نازل ہوئے اور کہا :عمرؓفاروق ہیں، انہوں نے حق اور باطل کے درمیان فرق کردیا، نبی کریم ﷺ نے فرمایا:عمر! تم فاروق ہو،اس قول کی بناء پر طاغوت سے مراد کعب بن اشرف ہے،(روح المعانی، النساء :65)‘‘۔حضرت عمر فاروق ؓ نے رسول اللہ ﷺ کا حق پر مبنی فیصلہ رد کرنے پر اس منافق کو مرتد قرار دیا اور اس کا سر قلم کردیا اور رسول اللہﷺ نے اُن کے اس فیصلے کو برقرار رکھا اور کوئی مواخذہ نہ فرمایا۔
رسول اللہ ﷺ پرتو اللہ تعالیٰ وحی کے ذریعے حقائق کو آشکار فرمادیتا تھا،لیکن قاضی کوشواہد کی بنیاد پرفیصلے کرنے ہوتے ہیں ، ان سے دانستہ اورنا دانستہ خطا کے امکان کو رد نہیں کیا جاسکتا،اس لیے آپﷺ نے تعلیمِ امت کے لیے فرمایا:'' تم میرے پاس اپنے مقدمات لے کر آتے ہو، ہوسکتا ہے تم میں سے کوئی فریق اپنا موقف پیش کرنے میں زیادہ حجت باز ہو اور میں( دلائل سن کر) اُس کے بھائی کے حق میں سے کوئی چیز اُسے دے دوں ، تو(وہ یہ جان لے کہ)میں اُسے آگ کا ٹکڑا کاٹ کر دے رہا ہوں، پس وہ اسے (ہرگز)نہ لے، (بخاری: 2680)‘‘۔پس اگر کوئی شخص کسی چیز کا حقدار نہیں ہے ،تو قاضی کا فیصلہ حق میں آنے کے باوجودوہ اس چیز کونہ لے ، وہ اس کے لیے آخرت میں آگ کا ٹکڑا ثابت ہوگی۔
عام منصفین کا فیصلہ قانوناً تو نافذ ہوجاتا ہے ،لیکن متاثرہ فریق کا اُسے دل وجان سے تسلیم کرنا لازم نہیں ہے ۔اگر ہر حاکم کا فیصلہ خطا سے مُبَرّاہوتا، تو ہمارے نظامِ عدل میں عدالتی مدارج ایک سے زیادہ نہ ہوتے۔ اس کی حکمت یہی ہے کہ اگر ماتحت عدالت کے کسی جج سے فیصلہ کرنے میں بشری کمزوری کے سبب خطا ہوجائے تو عدالتِ عالیہ یا عدالتِ عُظمیٰ اس کی غلطی کا ازالہ کرے تاکہ حقدار کو حق مل جائے ۔البتہ جو قاضی جان بوجھ کر غلط فیصلہ کرے، اس کے بارے میں حدیثِ پاک میں شدیدوعید ہے،آپ ﷺ نے فرمایا: ''قاضیوں کی تین قسمیں ہیں، ایک جنت میں اور دو دوزخ میںہوں گے، جو حق کو سمجھتا ہے اور حق کے مطابق فیصلہ کرتا ہے، وہ جنتی ہے ۔ جوحق کوسمجھتا ہے،لیکن ظلم پر مبنی فیصلہ کرتا ہے، وہ جہنمی ہے اور جو (حق کوجانے بغیر)جہل پر مبنی فیصلہ کرتا ہے،وہ بھی جہنمی ہے،(سنن ابودائود:3573)‘‘۔الغرض منصبِ عدل پر فائز ہونا پل صراط پر چلنے کے مترادف ہے، استقامت کے ساتھ صحیح سمت میں چلا تو سامنے جنت ہے اور پائے ثبات میں ذرہ بھرلغزش آئی تو اس کا ٹھکانا جہنم ہے ،آپ ﷺ نے فرمایا:''جس کولوگوں کے درمیان قاضی بنایا گیا، گویا اُسے چھری کے بغیر ذبح کردیا گیا، (سنن ترمذی: 1325)‘‘۔
مؤدّبانہ گزارش ہے کہ ہماری اعلیٰ عدالتوں کے معزز جج صاحبان کے رویّوں میں تضادات ہیں ،جب بھی کوئی ہائی پروفائل کیس عدالتوں میں زیر سماعت ہوتا ہے ،تو سپریم کورٹ کے باہر اور ٹیلی ویژن اسٹوڈیوز میں متوازی عدالتیں چل رہی ہوتی ہیں ۔ فاضل جج صاحبان نہ ان پر کوئی گرفت فرماتے ہیں، نہ کوئی روک ٹوک عائد کرتے ہیں، اس کے لیے کوئی ضابطہ مقرر ہونا چاہیے۔ بجائے اس کے کہ ہر کوئی جج صاحبان کے ریمارکس اور عدالتی کارروائی کی من پسند تشریح کرے ، عدالت کی جانب سے میڈیا کے لیے آئی ایس پی آر کی طرزپر ایک پریس اسٹیٹمنٹ جاری ہونا چاہیے ۔عدالتی ریمارکس یافیصلوں پر ردِّعمل دینے والے بعض افراد کی سرزنش کرنااور بعض کو کھلا چھوڑ دینا ، شفاف عدل کے منافی ہے ۔ رسول اللہ ﷺ کی ذاتِ اقدس تو خطا سے معصوم تھی، لیکن ہر قاضی خطا سے مبرّا نہیں ہوتا۔
جدید فلسفۂ قانون بھی یہی ہے کہ عدالت جب ایک مرتبہ فیصلہ صادر کردے ،تو وہ پبلک پراپرٹی ہوتا ہے ،اس پر تبصرہ ہوسکتا ہے ، اُسے آئینی وقانونی معیارات پر پرکھا جاتا ہے ،پس عدالتی فیصلوں کے سُقُم کوبیان کرنا توہینِ عدالت نہیں ہے ۔ لازم ہے کہ عدالت ایک باقاعدہ تنبیہ جاری کرے کہ جو لوگ ازخود عدالت کی ناموس کے محافظ اور ترجمان بن جاتے ہیں ، وہ اپنے لیے کوئی اور مصروفیت تلاش کریں، آئین وقانون میں عدالت کی حرمت کی ضمانت دی گئی ہے اور اس پر اِقدام کرنا خود عدالت کا دائرۂ اختیار ہے۔ ماہرینِ آئین وقانون اصولوں کی بنیاد پر عدالتی فیصلوں پر تبصرے کرتے ہیں ، یہ نہ سمجھا جائے کہ ہر صورت میں یہ اشخاص کسی فریق کے حامی ہیں ، ہر ذی شعور شہری کا اس بارے میں فکر مند ہوناقابلِ فہم ہے کہ آیا ہمارا عدالتی نظام مسلّمہ معیارات پر پورا اترتا ہے؟ ۔
ابوبردہ ؓسے عبداللہ بن عمرؓ نے کہا: تمہیں معلوم ہے میرے باپ نے تمہارے باپ سے کیا کہا تھا؟، میں نے کہا:مجھے نہیں معلوم، عبداللہ بن عمر ؓنے کہا: میرے با پ نے تمہارے باپ سے کہا تھا: ''اے ابوموسیٰ ؓ!ہم رسول اللہ ﷺ پر ایمان لائے، آپ کے ساتھ ہجرت کی ،آپ کے ہمراہ جہاد کیا اور جتنے بھی نیک اعمال کیے ،کیا تمہیں پسند ہے کہ یہ ہمارے لیے وسیلۂ نجات بن جائیں اورجو نیک اعمال ہم نے آپ ﷺ کے بعد کیے ،اُن کے بارے میں ہم آخرت میں برابربرابر چھوٹ جائیں ‘‘،تو تمہارے باپ نے میرے باپ سے کہا:واللہ!نہیں، ہم نے آپ ﷺ کے بعد جہاد کیا ،نمازیں پڑھیں، روزے رکھے ،بہت سارے نیک کام کیے ،ہمارے ہاتھ پر بڑی تعداد میں لوگ مسلمان ہوئے ،ہم ان اعمال پر بھی اجر کے امیدوار ہیں ،میرے باپ نے کہا: اس ذات کی قسم جس کے قبضہ وقدرت میں عمر کی جان ہے ، میری آرزو تویہ ہے کہ رسول اللہ ﷺ کی معیت میں ہم نے جو نیک کام کیے، وہ ہمارے لیے وسیلۂ نجات بن جائیں اور وہ تمام اعمالِ خیر جو ہم نے آپ کے بعد کیے ،ان کے حساب کتاب میں برابر چھوٹ جائیں ،اس پر میں نے کہا:بے شک تمہارے باپ ،میرے باپ سے مرتبے میں بڑے تھے، (بخاری:3915)‘‘۔ حضرت عمرؓ ایسی بے مثال شخصیت اس امت کو پھر نصیب نہیں ہوئی ،ان کا لقب فاروق تھا ،لیکن ان کواُخروی حساب کی بہت فکر تھی ۔ ایک عاشق رسول پرقتلِ عمد سے بھی بڑھ کر دہشت گردی کی دفعہ لگا کرسادہ لوح مسلمانوں سے یہ توقع رکھنا عبث ہے کہ وہ ایسے فیصلوں کو دل وجان سے تسلیم کریں، خدارا! اتنا غضب تو نہ ڈھائیں ، اگر یہاں نہیں ، آخرت میں توضروررسول اللہ ﷺ کا سامنا ہوگا،ہرشخص جانتا ہے کہ اس فعل کا مُحَرِّک کوئی ذاتی انتقام، نفسانی جذبہ یا فساد فی الارض نہیں تھا ۔