نماز تراویح میں تلاوت ہونے والے پارے کا تفسیری خلاصہ

ساتویں پارے کے مضامین

حضرت ابن عباس رضی اللہ عنہما نے فرمایا : جب نبی ﷺ کے اصحاب نجاشی کے پاس پہنچے اور انہوں نے قرآن کریم پڑھا اور ان کے علماء اور راہبوں نے قرآن مجید سنا ‘ تو حق کو پہچاننے کی وجہ سے ان کے آنسو بہنے لگے‘ اس کیفیت کو ساتویں پارے کی ابتدائی آیات میں بیان کیا گیاکہ '' اور جب وہ اس( قرآن کو سنتے ہیں )‘ جو رسول کی طرف نازل کیا گیا ‘ تو حق کو پہچاننے کی وجہ سے آپ ان کی آنکھوں سے آنسوؤں کو بہتا ہوا دیکھتے ہیں ‘ وہ کہتے ہیں : اے ہمارے رب! ہم ایمان لائے ‘ تو ہمیں (حق کی) گواہی دینے والوں کے ساتھ لکھ لے‘‘۔اس کے بعد ان کے لئے اجرِ آخرت اور دخولِ جنت کی نعمتوں کا ذکر ہے ۔

آیت: 89میں قسم کا حکم بیان کیا گیا ہے ‘یعنی کوئی شخص مستقبل میں کسی کام کے کرنے یا نہ کرنے کی قسم کھائے ‘ اگر وہ اس قسم پر قائم رہتاہے ‘ تو فقہی اعتبار سے کہا جاتاہے کہ وہ قسم میں بری ہے اور اگر وہ قسم کو توڑ دیتا ہے ‘ یعنی جو کہا ہے‘ اس کے برعکس کرتاہے ‘ تو فقہی اعتبار سے اسے ''حانث‘‘ ہونا کہتے ہیں ۔ اس آیت میں قسم کا کفارہ بیان ہوا ہے‘جو دس مسکینوں کو اپنے اوسط معیار کے مطابق دو وقت کا کھانا کھلانایا ان کو لباس دینا یا غلام آزاد کرناہے (آج کل غلامی کا رواج نہیں ) اگر کوئی ان چیزوں پر قادر نہ ہو تو تین دن کے روزے رکھنا ہے۔ اللہ تعالیٰ نے یہ بھی فرمایا کہ اپنی قسموں کی حفاظت کروتاکہ کفارے کی نوبت نہ آئے۔

آیت:90اور 91میں فرمایا : ''اے مومنو! شراب ‘ جوا ‘ بتوں کے پاس (قربانی کے لئے) نصب شدہ پتھر اور فال کے تیر محض ناپاک شیطانی کاموں سے ہیں ۔ سو‘ تم ان سے اجتناب کرو ‘تاکہ تم فلاح پاؤ۔ شیطان تو بس یہ چاہتاہے کہ شراب اور جوئے کے ذریعے تمہارے درمیان بغض اور عداوت پیدا کرے اور تمہیں اللہ کے ذکر اور نماز سے روک دے‘تو کیا تم باز آنے والے ہو؟‘‘۔

آیت :100میں رسول اللہ ﷺ سے غیر ضروری سوالات کرنے سے منع فرمایا گیاکہ اگر بہت سی باتیں تم پر ظاہر ہوجائیں تو تمہیں ناگوار گزریں ۔ زمانۂ جاہلیت میں مشرکوں نے بعض حلال جانوروں کو بتوں کے نام پر وقف کرکے ان کا دودھ دوہنا‘ ان پر سامان لادنا اور ان کا گوشت کھانا ممنوع قرار دے رکھا تھا۔ اﷲتعالیٰ نے فرمایا : ''کافر اللہ پر بہتان تراشتے ہیں ‘‘ یعنی حرام وحلال قرار دینا یہ اللہ تعالیٰ اور اس کے رسولِ مکرم ﷺ کا اختیار ہے ‘ بندے کا یہ اختیار نہیں کہ وہ کسی حلال کو حرام قرار دے دے۔

آیت :104میں بتایا گیا کہ جب اہلِ کتاب اور دین سے انحراف کرنے والوں کو دعوت دی جاتی ہے کہ اللہ کے نازل کردہ دین اور رسول کی طرف اتباع کے لئے چلے آؤ‘ تو وہ کہتے ہیں کہ ہم نے اپنے آباواجداد کو‘اسی روش پر پایا ہے اور ہم اپنے آبائواجداد کے شِعار کو کیسے چھوڑ سکتے ہیں ‘ خواہ ان کے آبائواجداد جاہل اور راہِ ہدایت سے بھٹکے ہوئے ہوں ۔ظاہر ہے کہ رسول اللہﷺ کو اس رویے سے تکلیف پہنچتی تھی ‘ تو اللہ تعالیٰ نے اہلِ ایمان کی تسلی کے لئے فرمایاکہ جب تک تم خود ہدایت پر ہو کسی کی گمراہی تمہارے لئے نقصان دِہ نہیں ہے ۔

آیت :106میں وصیت کے لئے دو عادل گواہ مقرر کرنے کا حکم دیا‘تاکہ بعد میں تنازع پیدا نہ ہو اور یہ بھی حکم دیا کہ حق کی گواہی کو چھپانا نہیں چاہیے ۔ ابتدائے اسلام میں وصیت کو فرض قراردیاگیاتھا‘لیکن احکام وراثت نازل ہونے کے بعد صرف اس کی اِباحت اور خیر کے کاموں کیلئے استحباب باقی ہے ۔

آیت :110اور 111میں اللہ تعالیٰ نے عیسیٰ علیہ السلام پر اپنی نعمتیںبیان کیں: (1) روح القدس سے مدد کرنا(2) گہوارے میں لوگوں سے کلام کرنا(3) کتاب وحکمت ‘تورات اور انجیل کی تعلیم (4) عیسیٰ علیہ السلام کے معجزات‘ مثلاً: اذنِ الٰہی سے مٹی سے پرندہ بنا کرجان ڈالنا ‘ مادر زاد اندھے اور برص کے مریض شفایاب کرنا ‘ مردے کو زندہ کرنا‘ بنی اسرائیل کی ایذارسانی سے بچانا ‘وغیرہ ۔

آیت:112 عیسیٰ علیہ السلام کے حواریوںکا اُن سے استدعا کرناکہ اللہ آسمان سے ہماری لئے تیار خوانِ نعمت نازل کرے ‘ اس سے ہم کھائیں اور قلبی اطمینان پائیں ‘ عیسیٰ علیہ السلام نے اللہ سے دعا کی۔ اللہ عزّوجل نے فرمایا : ''میں یہ نعمت نازل تو کردوں گا‘ مگر پھر جو شخص (مطلوبہ نشانی دیکھنے کے بعد) کفر کرے گا تو اسے ایسا عذاب دوں گا ‘ جو جہان والوں میں سے کسی کو بھی نہ دوں گا‘‘۔

اس کے بعد کی آیات میں نصاریٰ پر حجت قائم کرنے کے لئے فرمایا کہ ''اے عیسیٰ ! کیا آپ نے لوگوں کو یہ کہا تھا کہ مجھے اور میری ماں کو اللہ کے سوا دو خدا بنالو‘‘۔ ظاہر ہے کہ عیسیٰ علیہ السلام نے اس سے برأ ت کا اظہار کیا۔

الانعام

سورت کے آغاز میں اللہ تعالیٰ کی قدرت کا بیان ہے کہ اس نے آسمانوں ‘ زمین ‘ ظلمت اور نور کو پیدا کیا ‘ اسی نے انسان کو مٹی سے پیدا کیا‘ پھر اس کے لئے ایک مدتِ حیات اور قیامت کا وقت مقرر فرمایا‘ لیکن کافر پھر بھی اپنے رب کے ساتھ شریک ٹھہراتے ہیں اور اس کی قدرت کے بارے میں شک میں مبتلا ہوتے ہیں؛ حالانکہ وہ ظاہر وباطن اور انسان کے ہر عمل کوجانتا ہے۔ منکروں کا ایک شِعار یہ ہے کہ اللہ کی قدرت کی نشانیاں آنے کے باوجود ان میں غور نہیں کرتے۔ اللہ تعالیٰ فرماتاہے کہ تم سے پہلے بھی کئی قوموں کو ہم نے زمین میں اقتدار عطا کیا ‘ ان پر موسلا دھار بارشیں برسائیں ‘ ان کیلئے باغات کے نیچے نہریں جاری کیںاور پھر ان کے گناہوں کی پاداش میں انہیں ہلاک کردیا۔

آیت :07میں فرمایا کہ کافروں کا حال تو یہ ہے کہ اگر لکھی ہوئی کتاب ان کے پاس اتار دی جائے ‘ جسے وہ اپنے ہاتھوں سے چھو کر دیکھ لیں ‘ تو پھر بھی ایمان نہ لائیں {بلکہ اسے جادو قرار دیں‘ اسی طرح اگر ان کے پاس فرشتہ اتر کر آجائے ‘ تو ملکوتی شکل میں تو وہ دیکھ نہ پائیں اور ؛اگر بشری لباس میں آئے‘ تو پھر وہ کہیں گے کہ یہ تو ہم جیسا بشر ہے ۔ رسول اللہ ﷺ کو تسلی دیتے ہوئے اللہ تعالیٰ نے فرمایا کہ ہر دور کے کفار اپنے نبیوں کا مذاق اڑاتے رہے ہیں ‘ آپ زمین میں مشاہدہ کر لیں ‘ گزشتہ امتوں کے تباہ شدہ آثار ‘ ان کے انجام کا پتادیتے ہیں ۔

آیت :14میں رسول اللہﷺ کو حکم ہوا کہ آپ کافروں اور مشرکوں کو بتائیں کہ کیا میں زمین وآسمان کے خالق اور سب کے روزی رساں کو چھوڑ کر کسی اور کو اپنا کارساز مان لوں ؟ آپ کہہ دیں کہ میں سب سے پہلے اسلام لانے والا ہوں ۔ اللہ جس کوضرر پہنچائے ‘ اس کے سوا کوئی نجات دینے والا نہیں ‘ وہ ہر خیر کا مالک ہے۔ مجھے اس بات کا حکم دیا گیا ہے کہ میں ہر مخاطَب کو اللہ کے عذاب سے ڈراؤں اور اس کی توحیدکی دعوت دوں اور شرک سے برأت کا اعلان کروں۔

آیت: 22میں فرمایا کہ قیامت کے دن ہم سب مشرکوں کو جمع کریں گے اور پوچھیں گے کہ تمہارے باطل معبود اب کہاں ہیں ‘ تو وہ اپنے ماضی کو جھٹلائیں گے ۔ آیت :25میں اللہ تعالیٰ فرماتا ہے کہ منکرین آپ کی بات کو توجہ سے سنتے ہیں‘ لیکن ان کی بداعمالیوں کے سبب ان کے دلوں پر پردے پڑے ہوئے ہیں اور ان کے کانوں میں بندش ہے۔ آخرت میں وہ تمنا کریں گے کہ کاش ہمیں واپس دنیا میں بھیج دیا جائے اور ہم ایمان لانے والوں میں سے ہوجائیں ‘ لیکن اس دنیا میں رہتے ہوئے وہ حیات بعد الموت کے منکر ہیں ۔

آیت:31میں اللہ تعالیٰ نے فرمایا کہ انہوں نے اللہ کے حضور پیش ہونے کی حقیقت کو جھٹلایا‘ وہ اپنی بداعمالیوں کا بوجھ اپنی پُشت پر اٹھائے ہوئے ہیں اور جب اچانک قیامت آپہنچے گی تووہ اپنی کوتاہی پر افسوس کریں گے ۔ رسول اللہ ﷺ کو تسلی دیتے ہوئے اللہ تعالیٰ نے فرمایا : آپ غمگین نہ ہوں ‘ یہ آپ کو نہیں جھٹلارہے بلکہ در حقیقت آیاتِ الٰہی کا انکار کررہے ہیں اور آپ سے پہلے بھی رسولوں کو جھٹلایا گیا اور انہوں نے صبر کیا۔اگر اللہ تعالیٰ چاہتا تو سب کو جبراً ہدایت پر جمع فرما دیتا‘ لیکن بندے کو اختیار دے کر آزمانااور جزا وسزا کا نظام قائم کرنا ‘ اس کی حکمت کا تقاضا تھا۔ آیت :46میں فرمایا کہ اگر اللہ تعالیٰ تمہاری سننے اور دیکھنے اور سمجھنے کی صلاحیتوں کو سَلب فرما لے ‘ تو کون ہے جو تمہیں نعمتیں عطا کرسکتاہے۔مشرک رسول اللہ ﷺ سے طرح طرح کے فرمائشی مطالبات کرتے تھے ‘ تو اللہ نے فرمایا: آپ کہہ دیں میں نے کبھی یہ دعویٰ نہیں کیا کہ میرے پاس اللہ کے خزانے ہیں اور نہ میں از خود غیب جانتاہوں اور نہ میں نے یہ دعویٰ کیا ہے کہ میں فرشتہ ہوں ‘ میں تو فقط اسی چیز کی پیروی کرتاہوں ‘ جس کی مجھے وحی کی جاتی ہے۔ رسول اللہ ﷺ اگرچہ اللہ کے بتانے پر غیب کی باتیں جانتے تھے ‘ مگر عالِم الغیب علی الاطلاق اﷲتعالیٰ کا خاصہ ہے‘ نبی کے سارے امور اللہ تعالیٰ کی عطا سے ہیں ۔

آیت:59میں فرمایا:''اور غیب کی کنجیاں اُسی کے پاس ہیں ‘ اِس کے سوا (از خود) ان کو کوئی نہیں جانتا‘وہ ہر اُس چیز کو جانتا ہے ‘ جو خشکی اور سمندر میں ہے‘ وہ درخت سے گرنے والے ہر پتے کو جانتا ہے اور زمین کی تاریکیوں میں ہر دانہ کو جانتاہے اور تر اورخشک ہرچیز لوحِ محفوظ میں لکھی ہوئی ہے ۔آیت :61میں فرمایا: اللہ اپنے بندوں پر غالب ہے اور وہ اُن پرنگرانی کرنے والے فرشتے بھیجتاہے اور جب کسی کی موت کا وقت آجائے ‘تووہ فرشتے کسی کوتاہی کے بغیر اُس کی رُوح کو قبض کرلیتے ہیں ۔آیت:63میں فرمایاکہ بَر وبحر کی ظلمتوں میں کون تمہیں نجات دیتاہے ‘جس کو تم عاجزی سے اور چپکے چپکے پکارتے ہوکہ اگر وہ ہمیں اِس مصیبت سے بچالے توہم ضرور شکر گزاروں میں ہوجائیں گے ‘ اے رسول! کہہ دیجئے اللہ ہی تم کو اِس مصیبت اور ہرتکلیف سے نجات دیتاہے‘ پھربھی تم اُس کے ساتھ شرک کرتے ہو ۔آیت :64میں فرمایا : اللہ اِس پر قادر ہے کہ تمہارے اوپر سے اور تمہارے پاؤں کے نیچے سے تم پر عذاب بھیجے اور تمہیں ایک دوسرے سے بھڑادے اور تمہیں ایک دوسرے سے لڑائی کا مزا چکھادے۔ آیت :73میں فرمایا: اللہ وہ ہے ‘جس نے آسمانوں اور زمینوں کو برحق پیداکیا اوروہ‘ جس دن کسی فنا شدہ چیز کو فرمائے گا کہ ہوجا‘ تو وہ ہو جائے گی۔ آیت:74تا81حضرت ابراہیم علیہ السلام کا ذکر ہے۔

روزنامہ دنیا ایپ انسٹال کریں