جنابِ بزدار :وسیلۂ روزگار

ہمارے الیکٹرانک اور پرنٹ میڈیا کے شہسوار کبھی دبے الفاظ میں اور کبھی صاف بتاتے ہیں کہ وہ دبائو میں ہیں ‘ سچ بولنے اور لکھنے کی آزادی نہیں ‘سچ بولنے پر انہیں آف اسکرین کردیا جاتا ہے‘وغیرہ‘ ہمیں حقیقتِ حال معلوم نہیں ہے ‘ کیونکہ ہم غیب کی باتیں نہیں جانتے‘ واللہ اعلم بالصواب ‘ البتہ عربی کا مقولہ ہے: ''صَاحِبُ الْبَیْتِ اَدْریٰ بِمَا فِیہ‘‘ یعنی گھر کا مالک اپنے اندرونی معاملات کو بہتر جانتا ہے ۔تاہم ہمیں اتنا معلوم ہے کہ اگر اسلامی اَقدار پر یلغار کرنی ہے ‘تو میڈیا کو مکمل آزادی ہوتی ہے ‘ اس پر کوئی پابندی نہیں ہوتی ‘آف سکرین تو دور کی بات ہے ‘ آن سکرین اپنی فتح کا اعلان کرتے ہیں ‘جیساکہ پشاور میں طالبات کے حجاب کے مسئلے پر مناظر دیکھنے کو ملے ۔سو کن شعبوں میں پابندی ہے اور کس کس وادی میں قدم رکھنے سے پائوں جلتے ہیں ‘کھل کر کوئی نہیں بتاتا‘محض استعارات ‘کنایات اور بین السطور سے کام لیا جاتا ہے۔

مذہب اور مذہبی اقدار کی طرح جس شعبے میں کالم نگاروں اور اینکرپرسنز کو اپنے قلم اور طلاقتِ لسانی کے جوہر دکھانے کا کھلا موقع ملتا ہے ‘وہ وزیرِ اعلیٰ پنجاب جنابِ عثمان بزدار کی شخصیت ہے ‘جب تک ان کا عہدِ اقتدار جاری ہے ‘ہمارے میڈیا کے دوستوں کا روزگاربھی چلتا رہے گا‘کیونکہ جب موضوعات کا قحط ہو ‘ماحول سائیں سائیں کرتا ہو‘مختلف رہگزاروں پر ''داخلہ ممنوع ہے‘‘ کا غیر مرئی بورڈ لگا ہو ‘ایسے میں جنابِ سردار عثمان بزدار کام آتے ہیں‘ وہ بے ضرر آدمی ہیں ‘ناراض بھی نہیں ہوتے‘ حتیٰ کہ قدرت نے ان کا چہرہ تاثّرات سے عاری بنایا ہے اوران کی فیس ریڈنگ یعنی ''رُو خوانی ‘‘بھی آسان نہیں ہے‘ فارسی کا مقولہ ہے: ''گندم اگر بہم نہ رسد بھس غنیمت است‘‘۔ اس کے علاوہ رویتِ ہلال جیسے موضوعات تو فقط ایک پروگرام کی غذا ہوتی ہے‘اس کے بعد پھر موضوعات کا قحط اور فاقوں پہ فاقے ۔

جنابِ عثمان بزدار کو میرا مشورہ ہے کہ وہ ایک ماہر قلم کار کی خدمات مستعار لیں اور ان کی شان میں جو کچھ لکھا اور بولا جارہا ہے‘ اس سارے مواد کو جمع کریں ‘ان کے دورانیے کے اختتام پر ایک ضخیم کتاب مرتب ہوجائے گی ‘اسے اہتمام سے شائع کریں اور اس کا عنوان رکھیں:''بزدار: وسیلۂ روزگار‘‘۔ اس کتاب کا پیش لفظ زبان و بیان پر گرفت رکھنے والے اردو کے ماہرین سے لکھوایا جائے‘ کتاب شاہکار ہوگی اور ہاتھوں ہاتھ بکے گی ‘اس میں جنابِ عثمان بزدار اپنی یادداشتوں اور تجربات کا تڑکہ بھی لگاسکتے ہیں۔جنابِ بزدار علامہ اقبال کے ایک شعر میں معنوی تصرف کرکے اور جنابِ عمران خان کو دل ہی دل میں مخاطَب کر کے اپنے بارے میں یہ بھی کہہ سکتے ہیں :

تونے غضب کیامجھ کو بھی فاش کردیا

میں ہی تو اک راز تھا سینۂ کائنات میں

ہمارے ایک دوست علامہ محمد اعظم سعیدی خاکہ نگاری اور نقد ونظرمیں مہارتِ تامّہ اور یدِ طُولیٰ رکھتے ہیں۔برسوں سے اُن سے ملاقات نہیں ہوئی اور ان کا رابطہ نمبر بھی میرے پاس نہیں ہے ‘ وہ کبھی سرائیکی تحریک میں بھی متحرک رہے ہیں ‘ پتھر کو ہیرا اور ہیرے کو پتھر ثابت کرنا اُن کے بائیں ہاتھ کا کام ہے ‘اُن کا حافظہ غضب کا ہے ‘سب کے انساب بھی انہیں ازبر رہتے ہیں ‘پاتال کی تہہ سے بھی جوہر کشید کر کے لے آتے ہیں‘ وہ اس تحریر کو اشتہار سمجھیں اورسردار عثمان بزدار سے رابطہ کریں ‘اُن کی بہت ضرورت ہے۔ وہ بزدار صاحب کا ایسا خاکہ مرتّب کریں گے کہ اپنی مثال آپ ہوگا‘اگرچہ وہ اب ہماری طرح کراچی وال ہیں‘ لیکن ان کا آبائی تعلق سرائیکی علاقے سے ہے ۔

جنابِ عمران خان اس منصب تک پہنچے ہیں تو ان کی ذہانت تسلیم کرلینی چاہیے ‘پنجاب سیاسی طاقت کا مرکز ہے ‘ ارتکازِ اقتدار انسان کی فطرت ہے اور مرکزِ اقتدار کو اپنے ذاتی تصرف میں رکھنا صاحبِ اقتدار کی ضرورت ہے‘ سو اس مقصد کے حوالے سے جنابِ عثمان بزدار بہترین انتخاب ہیں ۔ جنابِ عمران خان صوبۂ خیبرپختونخوا کے پچھلے دورانیے میں جنابِ پرویز خٹک کا تجربہ کرچکے ہیں ‘وہ گھاٹ گھاٹ کا پانی پیے ہوئے تھے ‘ منصب کے آئینی وانتظامی اختیارات کو بھی خوب جانتے تھے ‘ سیاسی جوڑ توڑ کے بھی ماہر تھے ‘ اکثریت نہ رکھنے کے باوجود انہوں نے اپنے اقتدار کے تسلسل کو جاری رکھا اور اپوزیشن کے ساتھ بھی ایک مستور اور غیر عَلانیہ مفاہمت قائم رکھی۔پس جناب عمران خان کو اپنے زیرِ نگیں کسی صوبے میں ایسا مردِ باکمال نہیں چاہیے تھا ‘اس لیے انہوں نے خیبرپختونخوا کے لیے بھی جنابِ محمود خان کا انتخاب کیا۔جنابِ عمران خان کو جَنبے کی سیاست اور گروپنگ کرنے والا وزیرِ اعلیٰ نہیں چاہیے تھا۔ ایسا وزیرِ اعلیٰ جو اپنے قدموں پہ نہ کھڑا ہو‘ اتحادیوں کے لیے بھی قابلِ قبول ہوتا ہے‘ یہی وجہ ہے کہ جنابِ پرویز الٰہی بھی جنابِ عثمان بزدار کے پشت پناہ ہیں اور عَلانیہ ان کی حمایت کرتے ہیں ‘ کیونکہ ان کے ضروری کام بھی نکل آتے ہوں گے۔لیکن اگر کوئی عیّار ‘ تجربہ کار ‘ اختیار واقتدار کی سائنس جاننے والا وزیرِ اعلیٰ آگیا تو اتحادیوں کے لیے بھی مشکلات پیدا ہوجاتی ہیں‘ سو اتحادیوں کی بابت بھی یہی کہاجاسکتا ہے ''دیوانہ بکارِ خویش ہوشیار‘‘جبکہ جنابِ چودھری پرویز الٰہی دیوانہ نہیں‘ بلکہ فرزانہ ہیں۔ کبھی کبھی جنابِ عثمان بزدار اختیارات کی جھلک بھی دکھاتے ہیں ‘ وہ انگریزی کے اس مقولے کا مظہر ہوتی ہے:I am Master of this house and I am saying this with the permission of my wife۔سو جنابِ خان نے جنابِ بزدار کو اتنا اختیار تو ضرور دیا ہوگا۔ایسے ہی ہمارے ایک وزیر اعظم جناب محمد خان جونیجو بھی تھے‘ جب وہ خوبیٔ قسمت اور تقدیرِ الٰہی سے وزیر اعظم بن گئے اور پھر ان ہائوس ''پاکستان مسلم لیگ‘‘ بناکر اس کے صدر بھی بن گئے ‘ توارکانِ اسمبلی نے اُن سے کہا''ہماری طرح آپ بھی ایک سیٹ پر جیت کر آئے ‘پھر آپ ہمارے ووٹوں سے منتخب ہوکر وزیرِ اعظم بن گئے ‘ اب آپ مختارِ کُل اور ہم سراسر بے اختیار ٹھہرے‘ یہ کیسا انصاف اورکہاں کا انصاف ہے!‘‘۔ جنابِ محمد خان جونیجو بظاہر سیدھے اور سادہ نظر آتے تھے ‘لیکن ذہین انسان تھے‘ انہوں نے آئینی اور قانونی موشگافیوں کا سہارا نہیں لیا‘ بلکہ پارلیمنٹ کے ارکان اور صوبائی اسمبلیوں کے ممبران کے لیے ڈویلپمنٹ بجٹ کے نام سے کوٹہ مقرر کیا‘ جو اُن کی صوابدید پر اوراُن کی نگرانی میں سکیموں پر خرچ ہوتا تھا ‘ نیز ایک طرح سے انہوں نے صوبائی اسمبلی کے ممبران کو اپنے اپنے حلقے کے لیے بالفعل یعنی ڈی فیکٹووزیر اعلیٰ بنادیا تھا‘ ان کے علاقے میں مختلف محکموں کے سرکاری ملازمین کا تقرر ‘تبادلہ اور معزولی ان کی مرضی سے ہوتی تھی۔پس ارکانِ پارلیمنٹ واسمبلی جتنے جنابِ محمد خان جونیجو کے دور میں شاداں و فرحاں رہے ‘ایسی شان انہیں کسی اور دور میں نصیب نہ ہوئی ‘ اگرچہ کسی حد تک جنرل پرویز مشرف اورجنابِ یوسف رضا گیلانی کے دور میں بھی یہ روایت جاری رہی‘لیکن جولوگ پارٹی ٹکٹ پر جیت کر آتے ہیں‘پارٹی قیادت کو یہ زعم ہوتا ہے کہ وہ اُن کی مقبولیت اور حمایت کے سبب جیتے ہیں‘اگرچہ وہ بھی قابلِ انتخاب کے محتاج ہوتے ہیں۔

ظاہر ہے یہ روایت آئیڈیل نظامِ حکومت یا سائنس آف گورننس یا نظامِ آئین وقانون سے مطابقت نہیں رکھتی تھی‘ لیکن جب ایک بار ایک روش معمول بن جائے ‘تو اس سے چھٹکارا مشکل ہوتا ہے؛ چنانچہ جنابِ عمران خان نے بارہا اسے یکسر ختم کرنے کا اعلان کیا‘لیکن اب وہ بھی دبائو میں ہیں ‘اخبارات سے معلوم ہوتا ہے کہ وہ اپنے ارکانِ پارلیمنٹ کے حلقہ ہائے انتخاب کے لیے ترقیاتی فنڈز مختص کر چکے ہیں یا ایسا سوچ رہے ہیں ‘فرق فقط اتنا ہے کہ وہ ان نوازشات کو اپنی جماعت پی ٹی آئی اور اتحادیوں تک محدود رکھنا چاہتے ہیں اور اپوزیشن کو محروم رکھنا چاہتے ہیں ‘جبکہ ماضی میں ارکانِ پارلیمنٹ واسمبلی کے ترقیاتی فنڈحزبِ اقتدار واختلاف کے لیے کسی تمیز کے بغیر تھے۔ انصاف کا تقاضا بھی یہی ہے کہ جس طرح حکومتی ارکان اور ان کے اتحادی اپنے اپنے حلقوں سے منتخب ہوکر آئے ہیں‘ اسی طرح اپوزیشن کے ارکان بھی اپنے اپنے حلقوں سے منتخب ہوکر آئے ہیں اور ان حلقوں کے عوام کابھی سرکاری وسائل پر اتنا ہی حق ہے جتنا حکمراں جماعت کے ارکان کے حلقوں کے عوام کاہے۔وزیرِ اعظم کی حزبِ اختلاف کے ارکان سے نفرت قابلِ فہم ‘ مگر اس نفرت کی زد اُن کے حلقے کے عوام پر نہیں پڑنی چاہیے‘ انصاف اچھی چیز ہے‘ آپ کو دوبارہ ان حلقوں میں بھی ووٹ مانگنے کے لیے جانا ہوگا۔

اللہ تعالیٰ کا ارشاد ہے ''اے ایمان والو! انصاف کے ساتھ گواہی دیتے ہوئے اللہ کے حکم پر خوب قائم ہوجائو اور تمہیں کسی قوم کی دشمنی بے انصافی پر ہرگز نہ ابھارے ‘انصاف کرو ‘انصاف خدا خوفی کے سب سے زیادہ قریب ہے اور اللہ سے ڈرو ‘اللہ تمہارے ہر کام سے باخبر ہے‘ (المائدہ:8)‘‘۔حضرت عبداللہ بن عباس رضی اللہ عنہما اس کی شرح میں فرماتے ہیں: اللہ تعالیٰ نے مومن کو حکم فرمایاہے کہ حق بات کہو ‘خواہ وہ تمہارے اپنے خلاف ہو یا تمہارے باپ دادا کے خلاف ہو یا تمہاری اولاد کے خلاف ہواور (انصاف کرنے میں )نہ دولت مندی کے سبب مالدار سے محبت کرو اور نہ محتاجی کے سبب مسکین پر رحم کرو ‘ ‘(تفسیر طبری:10679)‘‘۔نیز اللہ تعالیٰ کا ارشاد ہے''اے ایمان والو!انصاف پر مضبوطی سے قائم رہنے والے اور اللہ کے لیے گواہی دینے والے بن جائو‘خواہ یہ گواہی خود تمہارے خلاف یا والدین اورقریبی رشتے داروں کے خلاف ہو‘جس کے بارے میں گواہی دو وہ غنی ہو یا فقیر ‘ بہر حال اللہ ان کا تم سے زیادہ خیر خواہ ہے‘ تم خواہشِ نفس کی پیروی میں عدل سے انحراف نہ کرو اور اگر تم نے گواہی میں ہیر پھیر کیا یا اعراض کیا تو بے شک اللہ تمہارے سب کاموں کی خبر رکھنے والا ہے‘ (النساء:135)‘‘۔ رسول اللہ ﷺ نے فرمایا ''سات قسم کے اشخاص ایسے ہیں کہ اللہ قیامت کے دن ان پر اپنی رحمت کا سایا فرمائے گا‘ جبکہ اس کے سایۂ رحمت کے سوا کوئی جائے پناہ نہ ہوگی‘ (اُن میں سے سب سے پہلا طبقہ)عادل حکمران ہیں‘ (صحیح البخاری:660)‘‘۔ عدل اور شہادت لازم وملزوم ہیں‘ کیونکہ حقدار کے حق میں عادلانہ فیصلہ کرنے کا مدار سچی شہادت پر ہے ؛چنانچہ اللہ تعالیٰ نے فرمایا ''اور گواہی کو نہ چھپائو‘ پس جو اسے چھپائے گا تو اس کا دل گناہگار ہے‘(البقرہ:283)‘‘۔ رسول اللہ ﷺ نے فرمایا: اللہ تعالیٰ چار اشخاص پر غضب فرمائے گا: جھوٹی قسمیں کھاکر سودا بیچنے والا‘ متکبر فقیر‘ بوڑھا زانی اور ظالم حکمران‘ (سنن نسائی:2576)‘‘۔ اللہ تعالیٰ کا ارشاد ہے''ظالم عنقریب جان لیں گے کہ (انجامِ کار) کس کروٹ پلٹتے ہیں‘ (الشعراء:227)‘‘۔

روزنامہ دنیا ایپ انسٹال کریں