وبائی امراض اور نبوی تعلیمات

ان دنوں دنیا کئی مُہلک جرثوموں کی زَد میں ہے‘ان میں سے اکثر جان لیوا ثابت ہوتے ہیں۔ڈینگی ‘ کانگو‘نگلیریاکے بعد ایک اور خطرناک وائرس ''کورونا‘‘ نے دنیا کو دہشت زدہ کر دیا ہے ۔ماضی میں ایسی مُہلک وبائوں کا شکار اکثر پسماندہ اور ترقی پذیر ممالک ہوتے تھے‘ لیکن عجیب اتفاق ہے کہ اس بار اولین مرحلے پرترقی یافتہ ممالک اس کا شکار ہوگئے ہیں اور ان میں سے چین سب سے زیادہ متاثر ہے۔ جاپان‘تھائی لینڈ ‘سنگاپور‘تائیوان ‘کینیڈا ‘جرمنی اور کسی حد تک امریکہ بھی اس کی زد میں ہے‘یعنی وہاں اس وائرس کی تصدیق ہوچکی ہے۔کوروناوائرس کی نصف درجن سے زائد اقسام دریافت ہوچکی ہیں‘ جب اس کا خوردبین سے جائزہ لیا گیا تویہ نصف دائرے کی شکل میں نظر آیا اور کنارے پر ایسا اُبھار نظرآیا جوتاج کی شکل کے مشابہ ہے‘رومن زبان میں تاج کو کرائون کہتے ہیں ‘ اسی بنا پراس کا نام کورونا رکھ دیا گیاہے ۔اب تک زیادہ تر جاندار مثلاً خنزیر اور مرغیاں اس سے متاثر ہوتے رہے ہیں ‘لیکن اب یہ وائرس اپنی شکل بدل کر انسانوں کو متاثر کرسکتا ہے اور کر رہا ہے۔ 1960ء کے عشرے میں کورونا وائرس کا نام دنیا نے پہلی بارسنا اور اب تک اس کی 13اقسام سامنے آچکی ہیں‘ان میں سے سات اقسام انسانوں میں منتقل ہوکر انہیں متاثر کرسکتی ہیں۔ان میں سے Novel Coronavirus 2019 اور Severe acute respiratory syndrome (SARS) چین میں دریافت ہوئے ہیں اور (MERS) Middle East Respiratory Syndrome شرقِ اوسط میں دریافت ہوا ہے۔

کورونا وائرس سانس کی اوپری نالی پر حملہ کرتے ہوئے سانس کے داخلی نظام کو متاثر کرتا ہے اورانسان جان لیوا نمونیا یا فلُو میں مبتلا ہوجاتا ہے۔ 2003ء میں سارس وائرس سے چین میں 774افراد ہلاک اور 8000متاثر ہوئے تھے‘مرس اس سے بھی زیادہ ہولناک تھا۔اس وائرس سے متاثر مریضوں میں بخار‘ کھانسی اور گلے کی خراش کی علامات ظاہر ہوتی ہیں اور شدید حملے کی صورت میں سانس لینے میں دشواری ہوتی ہے۔چین کے مرکز برائے انسدادِ امراض واحتیاطی تدابیرکے ڈائریکٹر گاو فو نے کہا ہے کہ''یہ وائرس ووہان کی ایک سمندری خوراک کی مارکیٹ میں جنگلی جانوروں سے پھیلا۔اس مارکیٹ میں مختلف قسم کے جنگلی جانور مثلاً لومڑی‘ مگرمچھ‘ بھیڑیے اور سانپ وغیرہ فروخت کیے جاتے تھے‘‘۔صحت کے عالمی ادارے کے مطابق وائرس کا شکار ہونے سے دو ہفتے کے اندر اس کی علامات سامنے آتی ہیں۔چینی محکمہ صحت نے ووہان سے نمودار ہونے والے وائرس کا جینوم (جینیاتی ڈرافٹ)معلوم کرکے اسے دنیا کے سامنے پیش کیا ہے‘ اب تک اس کی کوئی اینٹی وائرل دوا یا ویکسین دریافت نہیں ہوسکی ۔دسمبر 2019ء میں نیا وائرس سامنے آیا اور ماہرین اس کی ظاہری علامات کے مطابق ہی اس کا علاج کررہے ہیں۔یہ ایک متعدی مرض ہے اوراس کا وائرس حیوان سے انسان میں منتقل ہونے‘ انسان کو بیمار کرنے اوردوسرے انسانوں میں منتقل ہونے کی صلاحیت رکھتا ہے اور یہی اس کے متعدی (Infectious)ہونے کی علامت ہے ۔

حدیثِ پاک میں ہے:''نبی کریمﷺنے فرمایا:کوئی مرض( اپنی ذات سے) مُتعدی نہیں ہوتا‘(بخاری: 5773)‘‘۔ مریض سے تندرست آدمی میں مرض کے منتقل ہونے کو''عُدْوٰی‘‘ کہتے ہیں‘بعض لوگوں نے اس کا مفہوم یہ لیا ہے کہ کوئی بھی مرض متعدی نہیں ہے اور و ہ مہلک امراض سے بچائو کے لیے حفاظتی تدابیرکو توکل کے خلاف سمجھتے ہیں‘ یہ فہم درست نہیں ہے۔ رسول اللہ ﷺ نے مہلک امراض سے بچاؤکے لیے حفاظتی تدابیر اختیار کرنے کی تعلیم فرمائی ہے۔(1): حضرت اُسامہ بن زیدؓ روایت کرتے ہیں : رسول اللہﷺ نے فرمایا: ''طاعون ایک صورتِ عذاب ہے ‘جسے اللہ تعالیٰ نے تم سے پہلی اُمّتوں یا بنی اسرائیل پر مُسلط فرمایا ‘سوجب کسی جگہ یہ بیماری پھیل جائے ‘تووہاں کے لوگ اُس بستی سے باہر نہ جائیں اور جو اُس بستی سے باہرہیں ‘وہ اُس میں داخل نہ ہوں‘( مسلم:2218)‘‘۔ (2):حضرت عمر ؓ شام کے سفر پر جا رہے تھے‘ سَرغ نامی بستی سے اُن کاگزر ہوا ‘ حضرت ابوعبیدہ بن جراحؓ اور اُن کے ساتھیوں نے بتایا کہ اس بستی میں طاعون کی وباپھیل گئی ہے ۔حضرت عمر فاروقؓ نے مہاجرین وانصار صحابۂ کرام اورغزوۂ فتحِ مکہ میں شریک اکابرِ قریش سے مشورہ کیا ‘پھر اجتماعی مشاورت سے اُنہوں نے بستی میں داخل نہ ہونے کا فیصلہ کیا۔ حضرت ابوعبیدہ بن جراحؓ نے کہا :امیر المومنین! اللہ کی تقدیر سے بھاگ رہے ہو ‘انہوں نے جواب دیا : ہاں! اللہ کی تقدیر سے بھاگ کر اللہ کی تقدیر کی آغوش میں پناہ لے رہاہوں ۔پھر حضرت عبدالرحمن بن عوفؓ آئے اور اُنہوں نے کہا: اس حوالے سے میرے پاس رسول اللہ ﷺ کی ہدایت موجود ہے ‘آپ ﷺ نے فرمایا:'' جب تم کسی بستی میں اس وباکے بارے میں سنو ‘ تووہاں نہ جاؤ اور اگر تم پہلے سے وہاں موجود ہو اوریہ وبا پھیل جائے تو وہاں سے بھاگ کر نہ جاؤ‘‘۔یہ سن کر حضرت عمر بن خطاب ؓنے اللہ کا شکر اداکیا اور اپنا سفر آگے کی طرف جاری رکھا‘( مسلم‘ مُلخصاً:2219)‘‘۔

ان احادیث سے معلوم ہواکہ مسلمانوں کومتعدی وباسے بچنے کے لیے حفاظتی تدابیر اختیار کرنی چاہئیں اور حفاظتی تدابیر کا اختیار کرنا توکُّل اورتقدیر پر ایمان کے منافی نہیں ہے ‘بلکہ توکُّل کی حقیقت یہی ہے کہ اسباب کو اختیار کیاجائے ‘لیکن اَسباب کو مؤثِّر بِالذّات ماننے کے بجائے خداوندِمُسبّب الاسباب پر ایمان رکھاجائے‘ کیونکہ اسباب میں تاثیر اُسی نے پیداکی ہے اور اُسی کے حکم سے یہ مؤثر ہوتی ہے‘تقدیرپر ایمان کا تقاضا بھی یہی ہے ‘آپ ﷺکا فرمان ہے''بیمار کو تندرست سے الگ رکھاجائے‘ ( مسلم: 2221)‘‘اس میںIsolation Unitکی ہدایت موجود ہے۔خلاصۂ کلام یہ کہ وبائی امراض سے بچنے کے لیے احتیاطی تدابیر اختیار کی جائیں ‘ایک اورموقع پر آپ ﷺ نے فرمایا:'' جذام کے مریض سے بچوجیسے تم شیر سے بچتے ہو ‘ (بخاری:5707)‘‘۔ دوسری حدیث میں ہے : ''رسول اللہ ﷺ نے جذام کے مریض کو اپنے ساتھ بٹھاکر ایک برتن میں کھانا کھلایا ‘ (ابن ماجہ: 3542)‘‘۔ آپ ﷺ کے اس شِعار کا مقصد یہ ہے کہ کسی وبائی مرض میں مبتلا مریض سے احتیاط تو کی جائے‘ لیکن اُس سے نفرت نہ کی جائے تاکہ اُسے حوصلہ ملے اور اُس کے دل میں احساسِ محرومی پیدانہ ہو ؛چنانچہ آج بھی احتیاطی تدابیر اختیار کرتے ہوئے ڈاکٹر اورطبی عملہ ایسے مریضوں کا علاج کرتے ہیں ۔

حدیث میں یہ فرمان کہ ''کوئی مرض متعدی نہیں ہوتا‘‘ اس کی شرح میں علامہ نووی لکھتے ہیں : '' بظاہر ان حدیثوں میں تعارض ہے کہ ایک جگہ مریض سے بچنے کا حکم ہے اوردوسرا جذام کے مریض کے ساتھ کھانا کھانے کے حوالے سے آپ کا فعلِ مبارک ہے‘ اس سے کوئی مرض کے متعدی نہ ہونے کا نتیجہ نکال سکتا ہے‘ ان حدیثوں میں تطبیق کی صورت یہ ہے کہ امراض میں متعدی ہونے کی تاثیر اللہ ہی کی پیداکی ہوئی ہے‘لیکن وہ اللہ کی مشیت سے مؤثر ہوتی ہے ‘کسی چیز میں کوئی تاثیر ذاتی نہیں ہوتی‘ اگرایسا ہوتا تودوااستعمال کرنے والا اور طبیب سے رجوع کرنے والا ہرمریض شفایاب ہوجاتا ‘لیکن ہمارا مشاہدہ ہے کہ ایسا نہیں ہوتا‘پس جس کے لیے اللہ کا حکم ہوتاہے ‘اُس کے حق میں ڈاکٹر کی تشخیص درست اور دوا وسیلۂ شفابن جاتی ہے ؛چنانچہ جب رسول اللہ ﷺ نے مرض کے بذاتہٖ مُتعدی ہونے کی نفی فرمائی تو ایک اَعرابی نے سوال کیا : یارسول اللہ ﷺ! اُونٹ ریگستان میں ہرن کی طرح اُچھل کود کررہے ہوتے ہیں کہ کوئی خارش زَدہ اُونٹ ریوڑ میں گھس جاتاہے اور اُس کے نتیجے میں سارے اُونٹ خارش کی بیماری میں مبتلا ہوجاتے ہیں ‘آپ ﷺ نے فرمایا: پہلے اُونٹ کو خارش کہاں سے لگی‘( مسلم:2220)‘‘۔اس کا مطلب یہ ہے کہ رسول اللہ ﷺ نے مرض کے مُتعدی ہونے کی نفی نہیں فرمائی ‘بلکہ اللہ تعالیٰ کی قدرت کی طرف متوجہ فرمایا اور بتایا کہ عالَم اسباب مُسبِّبُ الاسباب کے حکم کے تابع ہے ‘لہٰذا تدبیر کے طور پراسباب کو اختیار کیاجائے ‘لیکن سب چیزوں کو قادرِ مُطلق کے حکم کے تابع سمجھاجائے ۔محض سبب اور مُسبّب اور علت اور معلول کے تانے بانے کوہی مؤثرِ حقیقی ماننا الحاد ہے اور ایسے ہی لوگوں کوملحدکہاجاتاہے ‘ الغرض یہ جانور توہر دور میں رہے ہیں اور رہیں گے‘ لیکن ایک خاص موقع پر ایسے وائرس کا پیدا ہونا اور انسانوں میں منتقل ہونا ہر سلیم الفطرت انسان کو یہ سوچنے پر مجبور کرتا ہے کہ وہ اللہ تعالیٰ کی مشیت اور تقدیر کی کارفرمائی کو تسلیم کرے۔پس صحت کے ماہرین کی ہدایات اور ان کی بتائی ہوئی حفاظتی تدابیر پر عمل کرنا لازم ہے۔چونکہ اس مرض کا تعلق سانس سے ہے ‘اس لیے ایسی امراض کے بچائو کے لیے منہ اور ناک پر ماسک پہننے کا مشورہ دیا جاتا ہے تاکہ کسی مریض سے سامنا ہو تووائرس کی زَد سے بچ سکیں۔لازم نہیں ہے کہ ہر شخص مرض کے وبائی اثرات کا شکار ہوجائے ‘جیسے بعض متعدی امراض ایک گھر میں داخل ہو جاتے ہیں‘ بعض کو تو اپنی لپیٹ میں لے لیتے ہیں اور بعض دیگر افراد ان سے محفوظ رہتے ہیں‘کیونکہ ہر ایک کی مدافعتی قوت جدا جدا ہوتی ہے ۔عالمی ادارۂ صحت نے اس ضمن میں باتصویر ہدایات جاری کی ہیں ‘جن کا خلاصہ یہ ہے:بار بار اچھے صابن سے ہاتھ دھوئیں‘نزلہ اور زکام کے مریضوں سے دور رہیں‘ کھانستے اور چھینکتے وقت منہ اور ناک کوڈھانپیں‘ جانوروں سے دور رہیں‘ کھانا پکانے سے قبل اور بعد میں ہاتھوں کو اچھی طرح دھوئیں‘کھانا اچھی طرح پکائیں اور اسے کچا نہ رہنے دیں‘ کسی کی بھی آنکھ ‘ چہرے اور منہ کو چھونے سے گریز کریں۔جو شخص پانچ مرتبہ دن میں نماز کا اہتمام کرتا ہے اور کھانے سے پہلے اور بعد میں ہاتھ دھونے کی سنت پر عمل کرتا ہے‘ اس کے لیے ان تدابیر پر عمل کرنا آسان ہے ‘احتیاطی تدابیر کے ساتھ ساتھ روحانی تدابیر پر بھی عمل کریں ۔

حضرت عمر فاروق ؓبیان کرتے ہیں‘رسول اللہ ﷺنے فرمایا:جو شخص کسی مصیبت زدہ کو دیکھے اوریہ دعا پڑھے:''اَلْحَمْدُ لِلّٰہِ الَّذِیْ عَافَانِی مِمَّا ابْتَلاَکَ بِہٖ وَفَضَّلَنِیْ عَلٰی کَثِیرٍ مِمَّنْ خَلَقَ تَفْضِیلاً ‘‘ترجمہ''سب تعریف اللہ کے لیے ہے جس نے مجھے اس مصیبت سے بچایاجس میں تجھے مبتلاکیا اور مجھے اپنی بہت سی مخلوقات پرفضیلت دی‘‘تو وہ زندگی بھر اس وباسے محفوظ رہے گا ‘(ترمذی:3431)‘‘۔آپ ﷺ نے مسلمانوں کواللہ تعالیٰ سے عافیت کی دعا مانگنے کی تعلیم فرمائی ہے:''اے اللہ!میں تجھ سے دنیا و آخرت میں عافیت کا طلبگارہوں‘ اے اللہ!میں تجھ سے عفو و درگزر ‘ اپنے دین و دنیا‘ اہل و عیال اور مال میں عافیت کی التجاکرتا ہوں‘ اے اللہ!ہماری ستر پوشی فرما‘ہماری شرمگاہوں کی حفاظت فرما اور ہمیں خوف و خطرات سے محفوظ اورمامون فرما‘ اے اللہ!تو ہمارے آگے اور پیچھے سے‘ دائیں اور بائیں سے‘ اوپر سے حفاظت فرما اور میں اس بات سے تیری عظمت کی پناہ میں آتاہوں کہ میں اچانک اپنے نیچے سے پکڑ لیا جائوں‘ (ابودائود:5074)‘‘۔ ایک اورموقع پررسول اللہﷺنے فرمایا: ''اَللّٰہُمَّ إِنِّیْ اَعُوْذُ بِکَ مِن البَرَصِ وَالْجُنُوْنِ وَالْجُذَامِ وَمِنْ سَیِّئِ الْاَسْقَامِ ‘‘ترجمہ:اے اللہ!میں برص‘جنون‘کوڑھ اور تمام مُہلک بیماریوں سے تیری پناہ میں آتا ہوں‘(ابودائود:1554)‘‘۔

روزنامہ دنیا ایپ انسٹال کریں