موسم سرما کا آغاز،انڈوں کے نرخ میں ہوشربا اضافہ
فارمی170،دیسی250روپے فی درجن میں فروخت ہورہے ہیں ،منصور احمد
کراچی (بزنس رپورٹر)موسم سرما شروع ہوتے ہی انڈوں کی قیمت میں ہوشربا اضافہ ہوگیا اور کراچی میں انڈوں کی قیمت170 روپے فی درجن تک پہنچ گئی جبکہ دیسی انڈے 250 روپے فی درجن کے حساب سے فروخت ہو رہے ہیں،جنرل سیکریٹری سندھ ایگز ڈیلرز ایسوسی ایشن منصور احمد نے بتایا کہ پاکستان میں انڈے کے 40فیصد پروڈیوسرز نے اپنی پیداوار بند کردی ہے ، اس وقت پاکستان میں انڈے کی پیداوار بہت کم رہ گئی ہے اور سردیوں کی وجہ سے طلب میں اضافہ ہو رہا ہے۔ انہوں نے کہا کہ انڈے کی قیمت میں اضافہ پیداواری لاگت میں اضافے کے سبب ہوا ہے ، انڈوں کی قیمت کم کرنے کیلئے پیداوار میں اضافہ کرنا ہوگا جس کیلئے پیداواری لاگت کا کم ہونا ضروری ہے ۔واضح رہے کہ کراچی میں ایک ہفتے کے دوران انڈے کی قیمت میں50 روپے اضافہ ہوا ہے ۔ انڈے کی قیمتوں میں اچانک اضافے سے متعلق پولٹری ایسوسی ایشن کے صدر مشتاق اعوان کا کہنا ہے کہ فیڈ مہنگی ہونے اور کورونا کے سبب بریڈنگ صحیح نہ ہونے سے انڈے مہنگے ہوئے ہیں۔
