ڈالر کی قدر میں اضافہ،تولہ سونا 4ہزارروپے مہنگا
کراچی(بزنس رپورٹر)زرمبادلہ کی دونوں مارکیٹوں میں پیر کو ڈالر کی قدربڑھ گئی ،ادھرسونے کی قیمتوں میں ایک بار پھر اچانک بڑا اضافہ دیکھا گیا۔۔
جس سے سونے کی فی تولہ قیمت ایک بار پھر3لاکھ روپے کی سطح عبورکرگئی۔اسٹیٹ بینک کے مطابق انٹربینک میں ڈالر 17 پیسے کے اضافے سے 279.21 روپے پر جاپہنچا۔فاریکس رپور ٹ کے مطابق اوپن مارکیٹ میں ڈالر15پیسے بڑھ کر 280.99روپے کاہوگیا۔ماہرین کے مطابق عالمی تحقیقی ادارے ٹریس مارک کی فروری میں ڈالر کے انٹربینک ریٹ 280روپے پر آنے کی پیشگوئی، زرمبادلہ کی طلب بڑھنے اور غیرملکیوں کی مارکیٹ ٹریژری بلوں سے سرمائے کے انخلا کے باعث زرمبادلہ کی دونوں مارکیٹوں میں ڈالر مہنگا ہوگیا۔ دوسری جانب عالمی بلین مارکیٹ میں سونا 42ڈالرکے اضافے سے 2903ڈالر فی اونس کا ہوگیا۔بین الاقوامی مارکیٹ میں سونے کے نرخ میں اضافے کے باعث مقامی سطح پربھی فی تولہ سونا 4ہزار روپے کے اضافے سے ملکی تاریخ میں پہلی بار 3لاکھ 3ہزار روپے کی بلند ترین سطح پر جاپہنچا،اسی طرح دس گرام سونا 3429روپے بڑھ کر 2لاکھ 59ہزار 773روپے کی بلند سطح پر پہنچ گیا۔دریں اثنا چاندی کی کی فی تولہ قیمت 43روپے کے اضافے سے 3ہزار 373روپے ہوگئی۔
