8ماہ:مشینری کی درآمدات 5.80ارب ڈالر تک جا پہنچیں
کراچی(بزنس رپورٹر )صنعتی سرگرمیاں متاثر ہونے کے باوجود بڑے پیمانے پر مشینری درآمدات کا سلسلہ جاری ہے ۔معاشی ماہرین کے مطابق مسلسل مہنگی مشینوں کی درآمد سے ملکی تجارتی خسارہ بھی بڑھنے لگا ہے ۔
ادارہ شماریات کی جانب سے جاری کردہ رپورٹ کے مطابق مالی سال 25ء کے پہلے 8 ماہ کے دوران مشینری کی درآمدات میں سالانہ 16 فیصد کا اضافہ ہوا جب کہ مالی سال 25ء کے 8 ماہ میں مشینری کی درآمدات 5ارب 80 کروڑ ڈالر تک پہنچ گئیں ۔ دوسری جانب فروری 2025ء میں مشینری کی درآمدات میں سالانہ 12 فیصد کا اضافہ ہوا ہے ۔ فروری 24 سے فروری 25 تک مشینری کی مجموعی درآمدات 77 کروڑ 30 لاکھ ڈالر پر پہنچ گئیں ۔ اعدادوشمار کے مطابق پاور جنریٹنگ مشینری کی درآمدات سالانہ 115 فیصد کی نمو سے 4 کروڑ 90 لاکھ ڈالر رہی جب کہ ٹیکسٹائل مشینری کی درآمدات سالانہ 38 فیصد اضافے سے 2کروڑ ڈالر رہیں ،اس کے علاوہ الیکٹریکل مشینری کی درآمدات سالانہ 12 فیصد بڑھ کر 30 کروڑ 20 لاکھ ڈالر رہیں اور زرعی مشینری کی درآمدات سالانہ 81 فیصد بڑھ کر 80 لاکھ ڈالر ریکارڈ کی گئیں۔
