عامر ابراہیم کو ڈیجیٹل اور مالی شمولیت کے فروغ پر ہلالِ امتیاز سے نوازا گیا
کراچی(بزنس ڈیسک) پاکستان کے ڈیجیٹل اور مالیاتی منظرنامے میں ان کے نمایاں کردار کے اعتراف میں، جاز کے سی ای او اور موبی لنک بینک کے چیئرمین عامر حفیظ ابراہیم کو صدرِ پاکستان کی جانب سے ہلالِ امتیاز سے نوازا گیا، جو ملک کے اعلیٰ ترین سول اعزازات میں شامل ہے۔۔۔
یہ اعزاز ان کی بصیرت افروز قیادت کو تسلیم کرتا ہے ، جس کے تحت انہوں نے ڈیجیٹل شمولیت، مالیاتی خودمختاری، اور قومی ترقی کے لیے بے مثال اقدامات کیے۔ ان کی قیادت میں جاز ایک ٹیلی کام کمپنی سے ترقی کرکے پاکستان کا سب سے بڑا ڈیجیٹل آپریٹر بن چکا ہے ، جو 10 کروڑ سے زائد پاکستانیوں کی خدمت کے ساتھ تیز اور قابلِ بھروسہ موبائل براڈ بینڈ کی سہولت فراہم کر رہا ہے ۔موبی لنک بینک اور پاکستان کے سب سے بڑے ڈیجیٹل والیٹ جاز کیش-جس کے رجسٹرڈ صارفین کی تعداد 4.8 کروڑ سے تجاوز کر چکی ہے -کے ذریعے عامر ابراہیم نے مالی شمولیت کو بڑے پیمانے پر فروغ دیا ہے ۔ انہوں نے خواتین، نوجوانوں اور چھوٹے و درمیانے درجے کے کاروباروں (ایس ایم ایز)کو ضروری مالیاتی سہولتیں فراہم کرکے انہیں جدید معیشت میں مؤثر شرکت کے مواقع دیے ۔ روزمرہ کے لین دین کو ڈیجیٹل بنا کر اور عوام کو رسمی مالیاتی نظام کا حصہ بنا کر، ان کی کاوشیں پاکستان کو کیش لیس اور ڈیجیٹل معیشت کی جانب لے جا رہی ہیں۔ عامر حفیظ ابراہیم نے کہا کہ یوم پاکستان کے موقع پر یہ اعزاز حاصل کرنا میرے لیے انتہاء فخر کی بات ہے ۔ یہ اس حقیقت کا اعتراف ہے کہ ڈیجیٹل ٹیکنالوجی اور مالیاتی شمولیت پاکستان کے ہر شہری کو-خواہ وہ کہیں بھی ہوں یا کسی بھی پس منظر سے تعلق رکھتے ہوں-ترقی کے مواقع فراہم کر سکتی ہیں۔ ترقی کا راستہ یہی ہے : ایک جُڑا ہوا، کیش لیس، اور جامع پاکستان، جہاں ہر شہری کو آگے بڑھنے کا موقع میسر ہو۔ میں اس سفر کا حصہ بن کر خود کو خوش نصیب سمجھتا ہوں اور پہلے سے زیادہ جذبے کے ساتھ ملک کی خدمت کے لیے پرعزم ہوں۔
ہلالِ امتیاز
