لوگوں میں مرض سے پیشگی بچاؤ کیلئے شعور پیدا کرنا ضروری:ڈاکٹر خرم
فیصل آباد (نیوزرپورٹر)مرض کے علاج کی بجائے لوگوں میں مرض سے پیشگی بچاؤ کیلئے شعور پیدا کرنے کی ضرورت ہے اور اس سلسلہ میں فیصل آباد چیمبر آف کامرس اینڈانڈسٹری غیر سرکاری تنظیموں سے ملکر کام کرنے کیلئے تیار ہے ۔ یہ بات فیصل آباد چیمبر کے صدر ڈاکٹر خرم طارق نے ٹرانسپرنٹ ہینڈز فاؤنڈیشن یو ایس اے کے ایک وفد سے ملاقات کے دوران بتائی۔
وفد میں فاؤنڈیشن کی چیف ایگزیکٹو آفیسررمیزہ معین، ڈائریکٹر آپریشن راحیل عباس اور ہیڈ کارپوریٹ افیئرز محمد فیصل حمید شامل تھے ۔ ڈاکٹر خرم طارق نے کہا کہ پاکستان میں صحت کارڈ کی سہولت کے ساتھ ساتھ رجسٹر ڈ محنت کشوں کو سوشل سکیورٹی اور سرکاری ہسپتالوں کی سہولت بھی دستیاب ہے ۔ اس صورتحال میں غیر سرکاری رفاعی تنظیموں کی طرف سے طبی سہولتوں کی فراہمی دوہرے پن کا باعث بن سکتی ہے ۔ انہوں نے مزید کہا کہ پاکستان جیسے ملک میں وسیع پیمانے پر بیماریوں سے بچاؤ کا شعور پیدا کرنے کی ضرورت ہے تاکہ کم سے کم لوگ بیمار ہوں اور اُن کے علاج پر آنے والے اخراجات کو کم کیا جا سکے ۔
