ڈائریکٹر لائیوسٹاک کا ویٹرنری ہسپتالوں ، کیٹل فیڈ مل کا دورہ
فیصل آباد (خصوصی رپورٹر)ڈائریکٹر لائیوسٹاک ڈاکٹر سید ندیم بدر نے ضلع فیصل آباد کی تحصیل فیصل آباد اور تحصیل جڑانوالہ کے مختلف ویٹرنری ہسپتالوں اور کیٹل فیڈ مل کا دورہ کیا۔
انہوں نے سول ویٹرنری ہسپتال عباس پور، ٹھیکری والا،213 ر ب اور گرینش کیٹل فیڈ مل کے دورے کے دوران حاضری رجسٹر، او پی ڈی، صفائی ستھرائی، کسان لائیوسٹاک بیٹھک ریکارڈ، وزیر اعلی پنجاب لائیوسٹاک ریکارڈ، سپلائی چین، ادویات و ویکسین کا ریکارڈ اور مصنوعی نسل کشی (AI)سے متعلق ریکارڈ کی جانچ کی۔اس موقع پر فیلڈ سٹاف کو ہدایت کی گئی کہ پی ایل سی فیزII پر خصوصی توجہ دی جائے ، ہسپتالوں میں کاشتکاروں کے بیٹھنے کیلئے بہتر انتظامات کئے جائیں، صفائی اور تازہ پانی کی فراہمی یقینی بنائی جائے ، تمام اینٹی بایوٹکس و ویکسین دستیاب ہوں، جاری ویکسینیشن بروقت مکمل کی جائے ۔ڈائریکٹر لائیوسٹاک نے کہا کہ اے ڈی آر ایس فارمر ایپ کے استعمال کو فروغ دیا جائے اور ایس ایم ایس 9211 پر ڈیٹا بروقت اپلوڈ کیا جائے ۔مزید براں انہوں نے ویٹرنری ہسپتالوں سے ملحقہ دیہات میں کاشتکاروں سے ملاقات بھی کی ۔
