انقرہ کے قریب طیارہ حادثہ، لیبیا کے آرمی چیف عملے کے 4 افراد سمیت جاں بحق
انقرہ: (دنیا نیوز) ترکیہ میں انقرہ سے طرابلس کیلئے اڑان بھرنے والا طیارہ گر کر تباہ ہو گیا، طیارہ حادثے میں لیبیا کے فوجی سربراہ سمیت عملے کے 5 افراد جاں بحق ہوگئے۔
ترک وزیرداخلہ نے بتایا کہ طیارہ شام 8 بجکر 10 منٹ پر راونہ ہوا جبکہ 8 بجکر 52 منٹ پر رابطہ منقطع ہوا، طیارے کی جانب سے حیمانہ کے قریب ہنگامی لینڈنگ کی اطلاع ملی جس کے بعد طیارے سے دوبارہ رابطہ قائم نہ ہو سکا، اس کے بعد ترک میڈیا نے تصدیق کی کہ طیارے کے ملبے تک رسائی حاصل کر لی گئی ہے۔
ترک میڈیا کے مطابق ترکیہ کے دارالحکومت انقرہ میں ایسن بوغا ایئرپورٹ سے لیبیا کے دارالحکومت طرابلس کیلئے اڑان بھرنے والے والے طیارے میں اچانک تکنیکی خرابی پیدا ہوگئی، اڑان بھرنے کے 30 منٹ بعد طیارے کا ایئر ٹریفک کنٹرولر سے رابطہ منقطع ہوگیا جس کے بعد طیارے نے دوبارہ انقرہ کی جانب رخ موڑنے کی کوشش کی تاہم لینڈنگ سے قبل ہی حادثے کا شکار ہوگیا۔
طیارے میں مجموعی طور پر 5 افراد سوار تھے، حادثے کا شکار ہونے والے طیارے میں لیبیا کے فوجی سربراہ کے سوار ہونے کی بھی اطلاعات سامنے آ رہی تھیں جن کی اب تصدیق کر دی گئی ہے۔
— عبدالحميد الدبيبة Abdulhamid AlDabaiba (@Dabaibahamid) December 23, 2025
لیبیا کے وزیراعظم نے آرمی چیف محمد علی احمد الحداد کے جاں بحق ہونے کی تصدیق کرتے ہوئے کہا کہ آرمی چیف انقرہ سے طرابلس جاتے ہوئے حادثے کا شکار ہوئے، حادثے میں بریگیڈیئر جنرل محمود القتاوی، مشیر الاساوی بھی جاں بحق ہوگئے، لیفٹیننٹ جنرل الفطوری بھی حادثے کا شکار ہونے والے طیارے میں سوار تھے۔
