چیلیانوالہ میں سیٹلائٹ اراضی ریکارڈ سنٹر کا قیام
تمام اقسام کی فرد کے اجرا اور انتقالات کی سہولت میسرہو گی:ڈپٹی کمشنر
منڈی بہاؤ الدین (نامہ نگار )ڈپٹی کمشنر طارق علی بسرا نے کہا ہے کہ سیٹلائٹ اراضی سنٹر حکومت پنجاب کا انقلابی اقدام ہے جہاں عوام کو تمام اقسام کی فرد کے اجرا اور ہر قسم کے زمینوں اور جائیدادوں کے انتقالات کی سہولت میسرہو گی۔ ان خیالات کا اظہار انہوں نے چیلیانوالہ میں سیٹلائٹ اراضی ریکارڈ سنٹر کے افتتاح کے موقع پر کیا ۔ اس موقع پر ایڈیشنل ڈپٹی کمشنر توقیر الیاس چیمہ،اسسٹنٹ کمشنر ملک کاشف نواز، احسن بابااور دیگر بھی موجود تھے ۔ ڈپٹی کمشنر نے کہا کہ پنجاب حکومت کرپشن کے خاتمے کیلئے زیرو ٹالرنس پالیسی پر عمل پیرا ہے ،ریونیو کے حوالے سے عوام کی شکایات کے ازالے کیلئے بنیادی اصلاحات کی جا رہی ہیں۔ انہوں نے کہا کہ ضلع منڈی بہاؤالدین کے دیہی علاقوں میں قائم کئے گئے سیٹلائٹ اراضی ریکارڈ سنٹرز پر شہری فرد ریکارڈ، ضمانت ، بجلی و گیس کنکشن کیلئے ضلعی ہیڈکوارٹرز جانے کے بجائے متعلقہ قانونگوئی ، پٹوار سرکل سے حاصل کرتے تھے لیکن اب وہیں پر ہر قسم کی زمینوں اور جائیدادوں کے انتقالات کی سہولت مہیا کر دی گئی ہے ۔اس موقع پر ڈپٹی کمشنر نے اراضی ریکارڈ سنٹر پر آئے سائلین کو اپنی نگرانی میں فردیں جاری کرائیں۔
