بارسلونا میں پاکستان زندہ باد،پاک فوج زندہ باد کانفرنس کا انعقاد
اسلام آباد (دنیا رپورٹ) سپین کے شہر بارسلونا میں ای یو پاک فرینڈشپ فیڈریشن کے زیراہتمام پاکستان زندہ باد، پاک فوج زندہ باد کانفرنس کا انعقاد کیا گیا۔۔
جس کی صدارت صدر ای یو پاک فرینڈ شپ فیڈریشن سپین کامران خان نے کی۔ کانفرنس میں محب وطن پاکستانیوں کی بڑی تعداد نے شرکت کی۔ کانفرنس سے چودھری پرویز اقبال لوسر، کامران خان، فیض اللہ ساہی، راجہ مختار احمد سونی، چودھری اشتیاق احمد، حاجی راجہ اسد حسین، مرزا ندیم بیگ، ڈاکٹر قمر فاروق نے خطاب کیا۔ شاہد احمد شاہد نے نظامت کے فرائض انجام دئیے، کانفرنس میں پاکستان کا قومی ترانہ بجایا گیا جس کے احترام میں تمام لوگ کھڑے رہے۔ اوورسیز پاکستانیوں نے سول نافرما نی کی تحریک کو مسترد کر دیا اور سول نافرمانی کی تحریک نامنظور کے نعرے لگائے، شرکا نے پاکستان اور افواج پاکستان سے اپنی وفا داری کا عہد کیا اور جنرل سید عاصم منیر زندہ باد، پاک فوج زندہ باد کے فلک شگاف نعرے بلند کیے۔ ڈاکٹر پرویز اقبال لوسر نے کہا پاکستان زندہ باد، پاک فوج زندہ باد کانفرنس کا آج سے مارچ تک یورپ بھر میں انعقاد کیا جائے گا۔ پاکستان اور پاک فوج کے خلاف کسی قسم کا پراپیگنڈا برداشت نہیں کیا جائے گا، پارلیمنٹ، عدلیہ اور پاک فوج کا احترام لازم ہے، یورپ بھر میں ای یو پاک فرینڈشپ فیڈریشن کے زیراہتمام سول نافرمانی کے خلاف تحریک چلائیں گے۔
