ممکنہ ہیٹ ویو:عوامی مقامات پر ہنگامی کولنگ سنٹرز بنانے کی ہدایت
راولپنڈی(نیوز رپورٹر)ڈسٹرکٹ ایمرجنسی آپریشن سینٹر راولپنڈی نے پی ڈی ایم اے کی ہدایات کی روشنی میں ممکنہ ہیٹ ویو سے بچاؤ اور حفاظتی انتظامات کے حوالے سے ضلعی انتظامیہ اور متعلقہ اداروں کو مراسلہ جاری کر دیا۔
عوامی مقامات بشمول بس سٹینڈز، ریلوے سٹیشن، تعلیمی اداروں اور ہسپتالوں میں ایمرجنسی کولنگ سنٹرز قائم کرنے کی ہدایت کی گئی جہاں پینے کے پانی، پنکھے، سایہ دار جگہ پر بیٹھنے کے انتظامات اور طبی سہولیات کی فراہمی یقینی بنانے کے احکامات جاری کیے گئے۔ سی ای او ڈسٹرکٹ ہیلتھ اتھارٹی اور ہسپتالوں کے میڈیکل سپرنٹنڈنٹس کو ہدایت کی گئی ہے کہ ممکنہ طور پر ہیٹ ویو سے متاثرہ مریضوں کیلئے وارڈ مختص کریں اور طبی سہولیات کی فراہمی یقینی بنائیں۔ مراسلے میں انتظامیہ کو ہدایت کی گئی کہ ہیٹ ویو سے بچاؤ کیلئے عوام کو مساجد، تعلیمی اداروں،سوشل پلیٹ فارم اور میڈیا کے ذریعے آگاہی دی جائے، ہیٹ ویو سے بچاؤ کیلئے تمام متعلقہ ادارے پلان مرتب کریں۔
