جناح سکوائرانڈر پاس مقررہ مدت میں مکمل،مارگلہ روڈ سگنل فری بنایا جائے:وزیرداخلہ
اسلام آباد(نیوز ایجنسیاں ) وفاقی وزیر داخلہ محسن نقوی نے رات گئے جناح سکوائر مری روڈ انڈر پاس پراجیکٹ کا دورہ کیا۔ انہوں نے شاہین چوک مارگلہ روڈ اور فیض آباد انٹرچینج کا بھی معائنہ کیا ،انہوں نے جناح سکوائر مری روڈ انڈر پاس پر تعمیراتی کام پر پیشرفت کا جائزہ لیا اور کام کی رفتار پر اطمینان کا اظہار کیا۔
انہوں نے جناح سکوائر مری روڈ انڈر پاس پراجیکٹ کو مقررہ مدت میں مکمل کرنے کی ہدایت کرتے ہوئے کہا کہ ریکارڈ مدت میں منصوبے کی تکمیل کے لیے تمام تر توانائیاں بروئے کار لائی جائیں۔ وزیر داخلہ نے جناح سکوائر سے فیض آباد چوک تک شاہراہ کو ماڈل روڈ بنانے کی ہدایت کی اور کہا جناح سکوائر سے فیض آباد چوک تک شاہراہ پر خوبصورت لائٹس لگائی جائیں اور لینڈ سکیپنگ کی جائے ۔ انہوں نے مارگلہ روڈ پر شاہین چوک کا بھی دورہ کیا اور کہا ٹریفک کے رش کے خاتمہ کیلئے مارگلہ روڈ کو مرحلہ وار سگنل فری بنایا جائے ۔ وزیر داخلہ نے فیض آباد انٹرچینج کی ری ماڈلنگ پر کام جلد شروع کرنے کی ہدایت کرتے ہوئے کہا کہ فیض آباد انٹرچینج کو کشادہ کیا جائے ۔ چیئرمین سی ڈی اے محمد علی رندھاوا نے منصوبوں سے متعلق وزیر داخلہ کو بریفنگ دیتے ہوئے کہا کہ جناح سکوائر مری روڈ انڈر پاس پراجیکٹ پر کام تیزی سے جاری ہے ، ان شا اللہ منصوبے کو مقررہ وقت میں مکمل کیا جائے گا۔
