سی ڈی اے ملازمین کو طبی سہولیات کی فراہمی اولین ترجیح،محمد علی رندھاوا
اسلام آباد(دنیارپورٹ ) چیئرمین سی ڈی اے و چیف کمشنر اسلام آباد محمد علی رندھاوا کی زیرِ صدارت ایک اجلاس منعقد ہوا جس میں سی ڈی اے بورڈ ممبران سمیت دیگر سی ڈی اے کے سینئر افسران ، راولپنڈی اور اسلام آباد کے معروف ہسپتالوں کے نمائندوں نے شرکت کی۔
چیئرمین سی ڈی اے نے کہا کہ سی ڈی اے ملازمین کو طبی سہولیات کی فراہمی اولین ترجیح ہے ، سی ڈی اے ہسپتال سی ڈی اے ملازمین کو علاج و معالجہ کی نہ صرف بہترین سہولیات فراہم کررہا ہے بلکہ اسلام آباد اور راولپنڈی کے معروف ہسپتالوں کے ساتھ اپنے ملازمین کے کم نرخوں پر شراکت داری کیلئے کوشاں ہے تاکہ سی ڈی اے ملازمین کو جدید طبی آلات، ماہر ڈاکٹرز اور کم اخراجات پر اعلیٰ معیار کی علاج و معالجہ کی سہولیات میسر آسکیں۔ انہوں نے کہا ہمارا مقصد صرف ہسپتالوں تک رسائی ہی نہیں بلکہ ہماری کوشش ہے کہ سی ڈی اے کے ہر فرد کو بہتر سے بہترین علاج معالجہ کی سہولیات فراہم کی جائیں، سی ڈی اے نے مختلف ہیلتھ انشورنس پالیسی آرگنائزیشن سے بھی رابطہ کرکے ان سے بھی سی ڈی اے ملازمین کے علاج معالجہ کے کم نرخوں پر ریٹس منگوائے ہیں۔ انہوں نے مزید کہا کہ ہیلتھ انشورنس پالیسیوں میں ملازمین کے اہل خانہ کیلئے خصوصی پیکیجز شامل ہیں۔چیئرمین نے کہا کہ ملازمین کے لئے طبی اخراجات کو کم سے کم کرنے کے علاوہ علاج معالجہ کی بہترین سہولیات فراہم کرنے کیلئے تمام دستیاب وسائل بروئے کار لارہے ہیں اور ہم چاہتے ہیں کہ کوئی بھی ملازم مالی مجبوریوں کی وجہ سے علاج سے محروم نہ رہے ۔ انہوں نے کہا کہ اس سلسلے میں جلد ہی ایک نئے ڈیجیٹل پلیٹ فارم کا آغاز کیا جائے گا اور اس پلیٹ فارم کے ذریعے ملازمین اپنے میڈیکل ریکارڈز اور سبسڈی کی درخواستیں براہ راست ٹریک کرسکیں گے ۔ سی ڈی اے اسلام آباد کے تمام ہسپتالوں کے ساتھ مل کر ایک جامع ہیلتھ نیٹ ورک تشکیل دینے کیلئے کوشاں ہے جس کا مقصد صرف علاج نہیں بلکہ بیماریوں سے بچاؤ اور صحت مند زندگی کی تربیت بھی فراہم کرنا ہے ۔
