چیئرمین سی ڈی اے کا دورہ جی سکس امام بارگاہ ، 9 محرم کے جلوس کی خود نگرانی کی
اسلام آباد(دنیا رپورٹ)چیئرمین سی ڈی اے، چیف کمشنر اسلام آباد اور ڈی جی سول ڈیفنس محمد علی رندھاوا نے مرکزی امام بارگاہ اثنا عشری جی سکس کا اچانک دورہ کیا۔
اس موقع پر آئی جی پی، ڈی جی اسلام آباد واٹر، ڈی جی ایمرجنسی اینڈ ڈیزاسٹر مینجمنٹ، سی ڈی اے، ڈسٹرکٹ مینجمنٹ کے اے ڈی سی جی، متعلقہ علاقے کے اسسٹنٹ کمشنرز، سی ڈی اے، ضلعی انتظامیہ اور پولیس کے دیگر اعلیٰ افسران بھی موجود تھے۔ چیئرمین کو سکیورٹی پلان کے بارے میں بریفنگ دی گئی جسے وفاقی وزیر داخلہ محسن نقوی کی سربراہی میں تمام سٹیک ہولڈرز کی جانب سے پوری تندہی کے بعد تیار کیا گیا تھا ۔ آئی جی پی اسلام آباد نے بتایا کہ وفاقی وزیر داخلہ کی ہدایات اور چیئرمین سی ڈی اے کی نگرانی میں سکیورٹی کے فول پروف انتظامات امام بارگاہ اثنا عشری جی سکس کی انتظامیہ کی مشاورت سے مکمل کیے گئے ہیں ۔ جلوس اپنے مقررہ وقت پر شروع ہوکر مقررہ وقت پر اختتام پذیر ہوا، جلوس کے روٹ کی کلیئرنس کے علاوہ پولیس کی بھاری نفری کی تعیناتی کے ذریعے فول پروف سکیورٹی انتظامات کو یقینی بنایا گیا ، چیف کمشنر اسلام آباد نے 9محرم الحرام کو اسلام آباد میں تمام جلوسوں کی خود نگرانی کی، انہوں نے ہدایت کی کہ سیف سٹی کیمروں کے ذریعے بھی جلوس کی مناسب نگرانی کی جائے۔ چیئرمین سی ڈی اے کی ہدایت پر سی ڈی اے، ایم سی آئی، ڈی ایم اے اور آئی سی ٹی کی ٹیمیں 9 محرم کے جلوس کے روٹ پر موجود رہیں، سی ڈی اے کے صفائی، نکاسی آب، اسلام آباد کے واٹر، ایمرجنسی، ڈیزاسٹر مینجمنٹ کے محکمے اور دیگر متعلقہ ٹیمیں بھی ساتھ رہیں۔
