پمپنگ اسٹیشن لوڈشیڈنگ سے مستثنیٰ کیے جائیں،واٹربورڈ
کراچی (اسٹاف رپورٹر) واٹر بورڈ اور کے الیکٹرک کے مشترکہ تعاون سے ہی شہریوں کو فراہمی و نکاسی آب کی بہتر سہولتیں فراہم کی جا سکتی ہیں۔
اس ضمن میں کے الیکٹرک انتظامیہ ماہ رمضان المبارک کے دوران صارفین کو بہتر سہولتیں فراہم کرنے کیلئے واٹر بورڈ کے ساتھ بھرپور تعاون کرتے ہوئے واٹر بورڈ کے تمام پمپنگ اسٹیشنز کو بجلی کی لوڈ شیڈنگ سے مستثنیٰ قرار دینے کیلئے موثر اقدامات کرے۔ ان خیالات کا اظہار منیجنگ ڈائریکٹر اورسی ای او واٹر بورڈ انجینئر سید صلاح الدین احمد نے کیا۔ ایم ڈی واٹر بورڈ کا مزید کہنا تھا کہ واٹر بورڈ کے مختلف پمپنگ اسٹیشنز پر روزمرہ لوڈ شیڈنگ، کیبل فالٹ اور پی ایم ٹی میں فنی خرابیوں کی وجہ سے سخت متاثر ہورہے ہیں، جس کے باعث شہر میں پانی کی بلا تعطل فراہمی میں مشکلات سامنا کرنا پڑ رہا ہے ۔ انہوں نے مزید کہا کہ اس ضمن میں کے الیکٹرک انتظامیہ ماہ رمضان المبارک کے دوران صارفین کی پریشانی کو مدنظر رکھتے ہوئے واٹر بورڈ کے تمام پمپنگ اسٹیشنز کو بجلی کی لوڈ شیڈنگ سے مستثنیٰ قرار دینے کیلئے ہنگامی بنیادوں پر اقدامات کرے تاکہ شہریوں کو بلا تعطل پانی فراہم کیا جا سکے ۔ ان کا کہنا تھا کہ شہریوں کی پریشانی ہماری اپنی پریشانی ہے، اس لئے ہمیں محدود وسائل کے باوجود تمام تر اقدامات مکمل کرکے ماہ رمضان المبارک کے دوران شہریوں کو بہتر سہولتیں فراہم کرنی چاہئیں کیونکہ یہ ہماری ذمہ داری اور فریضے میں شامل ہے۔
