انتظامیہ کے دعوے جھوٹ ثابت،مہنگائی بے قابو ، سبزی اور گوشت کے من مانے نرخ
کراچی (مانیٹرنگ ڈیسک)کراچی میں مہنگائی کا جن بے قابو ہوگیا کمشنر کراچی اور ضلعی انتظامیہ کے تمام تر دعووں کے باوجود سبزی اور گوشت کی قیمتیں آسمان سے باتیں کرنے لگیں دکاندار من مانے نرخ وصول کرنے لگے ۔۔۔
مہنگائی سے پریشان شہریوں نے کمشنری نظام کے ایکشن اور جرمانے کے اعداد و شمار کو ڈرامہ قرار دے دیدیا ۔ مختلف علاقوں میں مہنگائی کا جن مکمل طور پر بے قابو ہوگیا ہے برنس روڈ ، رنچھوڑ لائن، کھارادر، نارتھ ناظم آباد ، ایف بی ایریا،شاہ فیصل کالونی اور گلشن اقبال میں سبزی اور گوشت کے من مانے ریٹس وصول کیے جانے لگے ہیں شہر کے مختلف بازاروں میں آلو سو سے ایک تیس روپے ، پیاس ڈیڑھ سو سے 160روپے کلو، ٹماٹر 190سے دو 210 روپے کلو فروخت کیے جارہے ہیں۔ شہریوں کا کہنا ہے کہ بڑھتی مہنگائی کے سبب غریب اور مڈل کلاس طقبے کیلئے سبزی خریدنا بھی مشکل بن گیا ہے اس کے علاوہ شہر میں گوشت فروشوں نے بھی گائے اور بکرے کے خود ساختہ ریٹس وصول کرنا شروع کردیئے ہیں۔ گلشن اقبال ، برنس روڈ اور صدرسمیت مختلف علاقوں میں گائے کا گوشت 1200 سے 1400 روپے کلو جبکہ بکرے کا گوشت 2200 سے 2400 روپے کلو فروخت کیا جارہا ہے ۔شہریوں کا کہنا ہے کہ کمشنر کراچی اور ضلع انتظامیہ صرف اور صرف سرکاری ریٹس نافذ کرنے کے دعوے کررہے ہیں شہر میں ہر جگہ دکاندار من مانے ریٹس وصول کررہے ہیں اور منافع خوری کے سامنے پوری انتظامیہ خاموش تماشائی بنی ہوئی ہے ۔
