سکھر میں مقابلہ،دو ڈکیت مارے گئے ،مسروقہ رقم برآمد
سکھر،پنگریو (بیورو رپورٹ، نمائندہ دنیا) سکھر میں تھانہ ائیرپورٹ کی حدود جاگیر موڑ کے قریب پولیس اور ڈاکوؤں میں مقابلہ ہوا جس کے نتیجے میں دو ڈاکو ہلاک ہو گئے ۔
اطلاعات کے مطابق ناکہ بندی کے دوران پولیس نے موٹر سائیکل سوار ملزمان کو رکنے کا اشارہ کیاتو انہوں نے ناکہ توڑ کر فرار ہونے کی کوشش کی، جس پر پولیس نے تعاقب کیا،تاہم ملزمان نے فائرنگ شروع کردی اور پولیس کی جوابی فائرنگ میں دو ڈاکو ہلاک ہوئے ، ہلاک ڈاکوؤں کے پاس سے دو ٹی ٹی پستول، ایک موٹر سائیکل اور رقم سے بھرا بیگ برآمد ہوا ۔ ذرائع کے مطابق ہلاک ملزموں کی شناخت عبدالخالق سولنگی اور مختیار سولنگی کے نام سے ہوئی۔ہلاک ملزمان نے ایک ہفتہ قبل تھانہ بی سیکشن کی حدود بندر روڈ پر ڈکیتی کی اور موبائل کمپنی کی گاڑی کو گن پوائنٹ پر لوٹ کر بھاری رقم لے کر فرار ہوگئے تھے ، ہلاک ڈاکوؤں کے بیگ سے مسروقہ رقم گیارہ لاکھ پچیس ہزار روپے بھی برآمد کرلیے گئے ۔دوسری جانب ایس ایس پی سکھر نے پولیس پارٹی کو شاباش دیتے ہوئے سی سی تھرڈ اور کیش ایوارڈ دینے کا اعلان کیا ۔ پنگریو سے نمائندے کے مطابق ضلع بدین میں پولیس کاروائیوں کے دوران تین جرائم پیشہ اور 14 منشیات فروشوں کو گرفتار کرکے بھاری مقدار میں گٹکے اور اسلحہ برآمد کرلیاگیا ۔پولیس نے ملزموں کے خلاف مقدمات درج کرلیے ۔ بدین پولیس نے ملزم صدام حسین اور عزیز احمد کھوسو ، ضمیر علی شیدی، غلام رسول لونائی، رسول بخش ملاح کو حراست میں لیکر ملزمان کے قبضے سے 1250 گٹکے برآمد کرلیے۔
