شدید گرمی میں لوڈشیڈنگ،شہریوں کی زندگی اجیرن
کراچی(این این آئی)کراچی میں شدید گرمی کے باوجود بجلی کی طویل بندش نے شہریوں کی مشکلات میں کئی گنا اضافہ کر دیا ہے ۔ شہر کے مستثنیٰ قرار دیے گئے علاقے بھی لوڈشیڈنگ کی لپیٹ میں آ گئے ہیں، جہاں فالٹ کے نام پر کئی کئی گھنٹے بجلی بند کی جا رہی ہے ۔
ناظم آباد، رضویہ سوسائٹی، سولجر بازار سمیت دیگر ایسے علاقے ، جو پہلے لوڈشیڈنگ سے مستثنی تھے ، اب کئی گھنٹوں تک بجلی کی بندش جھیلنے پر مجبور ہیں۔ بعض علاقوں میں تو لوڈشیڈنگ کا دورانیہ 12 سے 14 گھنٹے تک جا پہنچا ہے ، جس سے معمولات زندگی درہم برہم ہو کر رہ گئے ہیں۔گولیمار، لیاقت آباد، سرجانی ٹاؤن، اورنگی ٹاؤن ،شاہ فیصل کالونی اور کورنگی کے رہائشی بدترین بجلی بحران کا شکار ہیں۔ اسی طرح گارڈن، بفرزون، نارتھ کراچی، لیاری اور اولڈ سٹی ایریا میں بھی گھنٹوں بجلی غائب رہتی ہے ، جس کی وجہ سے شہری شدید گرمی میں اذیت ناک صورتحال کا سامنا کر رہے ہیں۔شہریوں نے بجلی فراہم کرنے والے اداروں پر شدید غم و غصے کا اظہار کرتے ہوئے مطالبہ کیا ہے کہ فوری طور پر لوڈشیڈنگ کا خاتمہ کیا جائے ، فالٹ کے بہانے بجلی بند کرنے کا سلسلہ روکا جائے ۔متاثرہ صارفین کا کہنا تھا کہ بھاری بلوں کی بروقت ادائیگی کے باوجود اعلانیہ اور غیر اعلانیہ لوڈشیڈنگ کا عذاب برداشت کرنا پڑتا ہے ،بجلی چوروں کی سزا عام صارف کودینا ناانصافی ہے ۔ ادھر کے الیکٹرک کی جانب سے بدترین لوڈشیڈنگ پر کوئی موثر وضاحت یا متبادل پلان سامنے نہیں آ سکا۔
