کوشش ہے مویشی منڈی کے راستوں پرکوئی واردات نہ ہو،ڈی آئی جی
کراچی (اسٹاف رپورٹر )ڈی آئی جی ویسٹ عرفان بلوچ نے ایس ایس پی ویسٹ طارق الہی مستوئی اور دیگر قانون نافذ کرنے والے اداروں کے ہمراہ مویشی منڈی ناردرن بائی پاس کا دورہ کیا اور سیکورٹی انتظامات کا جائزہ لیا۔
ڈی آئی جی ویسٹ عرفان بلوچ نے میڈیا سے گفتگو کرتے ہوئے کہا کہ ہماری کوشش ہے کہ مویشی منڈی آنے والے راستوں پر ایک بھی واردات نہ ہو ، نادرن بائی پاس پر لگنے والی مویشی منڈی کو تیسرا سال ہے پچھلے سال بھی پولیس نے احسن اقدام کیے ، ایک بھی واردات نہیں ہوئی، ایک ہزارسے زائد پولیس اہلکار اور پولیس کمانڈوز مویشی منڈی کے راستوں پر تعینات کیے جائینگے ۔عرفان بلوچ کا کہنا تھا کہ ایڈمنسٹریشن مویشی منڈی کے ساتھ مسلسل رابطے میں ہیں،گلشن معمار،ناردرن بائی پاس سمیت تمام راستوں پر سیکورٹی تعینات ہوگی ہم نے کنٹرول روم قائم کردیا ہے ،رینجرز بھی پولیس کے ساتھ سیکورٹی کے فرایض سرانجام دے گی،سی ٹی ڈی اور اسپیشل برانچ کے اہلکار بھی سیکورٹی پر تعینات ہوں گے ،ناردرن بائی پاس کو لگنے والے اضلاع کو بھی سیکورٹی سسٹم میں شامل کریں گے ۔ایڈمنسٹریٹر شہاب علی نے کہا کہ سندھ میں راستے بند ہونے کی وجہ سے بیوپاریوں کے جانور راستوں میں پھنسے ہوئے ہیں جو کراچی ناردرن بائی پاس مویشی منڈی آنا چاہتے ہیں،کراچی آنے والے سندھ کے راستے بند ہیں۔
