گورنرکالیاری متاثرین کیلئے پلاٹس اور روزگار کا اعلان
کراچی(این این آئی)لیاری کے علاقے بغدادی میں عمارت گرنے کے افسوسناک واقعے پر گورنر سندھ کامران ٹیسوری نے جائے وقوعہ کا دورہ کیا اور میڈیا سے گفتگو کرتے ہوئے کہا کہ اچھی بات ہے سندھ حکومت نے فوری ردعمل دیا، ڈی جی کو ہٹایا، لیکن صرف چہرے بدلنے سے نظام نہیں بدلا جا سکتا، ہمیں عمارت کے گرنے کی وجوہات تلاش کرنا ہوں گی کہ یہ کب بنی اور کیسے منظور ہوئی۔
کامران ٹیسوری نے اس عزم کا اظہار کیا کہ ہم اس مسئلے پر سیاست نہیں کریں گے بلکہ متاثرین کو انصاف دلائیں گے ۔ شہر میں کئی جگہوں پر 80 گز کے پلاٹس پر ناقص تعمیرات کی گئیں، ان سب کا ازسرنو جائزہ لیا جائے گا۔ گورنر سندھ نے اعلان کیا کہ وہ گورنر ہاؤس میں ہیلپ لائن 1133 کا انعقاد کر رہے ہیں اور جن عمارتوں کو خطرناک قرار دیا جا چکا ہے ، ان کے متاثرہ مکینوں کو 80 گز کے متبادل پلاٹس دیے جائیں گے ۔انہوں نے سندھ بلڈنگ کنٹرول اتھارٹی کے ڈی جی کو ہدایت دی کہ وہ فوری طور پر شہر کی تمام مخدوش عمارتوں کا سروے کروائیں۔ انہوں نے متاثرہ افراد کے لیے روزگار اور نوکریوں کے مواقع پیدا کرنے کا وعدہ بھی کیا۔ دوسری جانب گرنے والی عمارت کے قریبی مکینوں نے احتجاج کیا اور بتایا کہ چار روز سے انہیں گھروں میں داخل نہیں ہونے دیا جا رہا، جبکہ انتظامیہ نے صرف ایک گھنٹے کے لیے عمارت خالی کرانے کا کہا تھا۔ متاثرہ خاندان رشتہ داروں کے گھروں میں رہنے پر مجبور ہیں۔
