سابق رجسٹرار سمیت 23 ملزمان کی گرفتاری کا حکم
کراچی(این این آئی)اینٹی کرپشن کورٹ نے 29 جائیدادوں پر جعلسازی کے مقدمے میں سابق رجسٹرار سمیت 23 ملزمان کی گرفتاری اور انہیں فوری طور پر عدالت میں پیش کرنے کا حکم دے دیا ہے ۔
مقدمے کے مطابق ملزمان پر الزام ہے کہ انہوں نے 29قیمتی جائیدادیں اپنے ، اپنے بھائیوں اور دیگر رشتہ داروں کے نام منتقل کروا کر جعلسازی کی۔ عدالت کو بتایا گیا کہ جائیدادوں کی منتقلی میں استعمال ہونے والے انگوٹھوں کے نشان بھی ملزمان کے اہل خانہ سے میچ کرتے ہیں۔ذرائع کے مطابق تمام ملزمان کا تعلق پنوعاقل سے ہے اور وہ ایک ہی خاندان کے افراد ہیں۔ عدالت نے اس سنگین مقدمے میں تفتیشی افسر سے مقدمے کا حتمی چالان بھی طلب کرلیا ہے تاکہ قانونی کارروائی آگے بڑھائی جا سکے ۔عدالت نے اینٹی کرپشن حکام کو ہدایت کی ہے کہ تمام ملزمان کو جلد از جلد گرفتار کرکے عدالت میں پیش کیا جائے تاکہ قومی اثاثوں پر ناجائز قبضے جیسے جرائم کو بے نقاب کیا جا سکے ۔
