کھارادر میں خالی کرائی گئی عمارت کے مکین بے سہارا
کراچی(مانیٹرنگ ڈیسک)کھارادر میں مخدوش قرار دے کر خالی کرائی جانے والی عمارت کے مکین دوسرے روز بھے کھلے آسمان تلے بے یارو مددگا پڑے رہے ، متاثرین کا کہنا ہے کہ عمارت مخدوش نہیں اسے ایک بلڈر کے ایما پر محض 24 گھنٹوں کے نوٹس پر ہم سے خالی کرالیا گیا۔
مکینوں کا کہنا ہے کہ انہیں متبادل جگہ دیے بغیر بے دخل کر دیا گیا، ان کے ساتھ دھوکے بازی کی جا رہی ہے ان کی عمارت حاجرہ منزل نہ تو مخدوش ہے اور ناقابل رہائش ہے ، ان کی بلڈنگ کسی بلڈر کے ایما پر خالی کرائی گئی ہے ۔ان کا کہنا تھا کہ عمارت کی بجلی و گیس منقطع کر کے میٹر نکال کر مرکزی گیٹ کو سیل کردیا گیا، حاجرہ منزل کے پلر اور بیم مضبوط ہیں ان میں کوئی دراڑ نہیں ہے ، حاجرہ منزل کے برابر والی عمارت عرصہ دراز سے خالی پڑی ہے اور وہ ایک مٹی کا ڈھیر بنی ہوئی ہے ، خالی عمارت جو مٹی کا ڈھیر ہے ادارے نے اسے مخدوش قرار دیکر نوٹس لگایا اور وہی نوٹس پندرہ نمبر پلاٹ والا ہماری بلڈنگ 14 نمبر پر بھی چسپاں کر دیا، صرف 12 گھنٹے کے نوٹس پر ہم سے عمارت خالی کرائی۔مکینوں نے کہا کہ خواتین اور بچوں کو دھکے دیکر گھروں سے باہر نکال دیا ، ہمارا سامان بھی گھروں میں ہے اسے بھی نکالنے کی اجازت نہیں دی گئی ، کچھ عرصہ قبل ہم سے ایک بلڈر نے 15 لاکھ روپے دے کر فلیٹ خالی کرنے کو کہا تھا جبکہ اس فلیٹ کی مالیت 70 سے 80 لاکھ روپے ہے۔
