سندھ حکومت بغضِ مہاجر میں اندھی ہوچکی ، آفاق احمد
کراچی(این این آئی)مہاجر قومی موومنٹ(پاکستان)کے چیئرمین آفاق احمد نے سہیون ڈیولپمنٹ اتھارٹی کے 38ملازمین کی سندھ بلڈنگ کنٹرول اتھارٹی میں تعیناتی کو متعصبانہ اقدام قرار دیتے ہوئے کہا کہ سندھ حکومت بغضِ مہاجر میں اتنی اندھی ہوچکی ہے کہ وہ سپریم کورٹ کے احکامات کو بھی ہوا میں اڑا رہی ہے۔
سپریم کورٹ حکم دے چکی ہے کہ کسی ادارے کا ملازم کسی دوسرے ادارے میں تعینات نہیں کیا جاسکتا، جب کے ایم سی کا ملازم کے ڈی اے میں تعینات نہیں ہوسکتا تو کسی دوسرے شہر کے ترقیاتی ادارے کا ملازم کس طرح ایس بی سی اے میں تعینات ہوسکتا ہے ۔اپنے بیان میں آفاق احمد نے کہا کہ لیاری میں بلڈنگ گرنے پر بعد 7مہاجر افسران فوری گرفتار کرلئے گئے جبکہ دو غیر مہاجر اب تک آزاد ہیں، صاف نظر آرہا ہے کہ انکو سندھ حکومت کا تحفظ حاصل ہے ، اسے میں تعصب نہ کہوں تو کیا کہوں۔ آفاق احمد نے کہا کہ اگر تبدیل کرنا ہی تھا تو ایس بی سی اے صرف حیدرآباد سے لاکر تعینات کردیتے ، سہیون ڈیویلپمنٹ اتھارٹی سے ٹرانسفر قبول ہے نہ قانون اسکی اجازت دیتا ہے ۔ آفاق احمد نے کہا کہ سندھ حکومت کے مسلسل مہاجر دشمنی پر مبنی اقدامات سے شہریوں میں شدید بے چینی پیدا ہورہی ہے ، اندیشہ ہے کہ کراچی کی شہریوں کی جانب سے شدید ردعمل آسکتا ہے ۔ انہوں نے مزید کہا کہ ہم مہاجر عوام کو تنہا نہیں چھوڑیں گے ، ان افسران کی تعیناتی کے خلاف آئینی و قانونی راستہ اختیار کریں گے ۔
