اسکروٹنی میں انٹربورڈ کے 97 فیصد نتائج درست قرار
کراچی(آن لائن)کراچی انٹر بورڈ کے گیارہویں جماعت کے طلبا کی اکثریت فیل ہونے کا معاملے پر سندھ اسمبلی کی پارلیمانی کمیٹی کی ہدایت پر 26 ہزار طلبا کے پرچوں کی اسکروٹنی کا عمل مکمل کرلیا گیا۔
اسکروٹنی نتائج میں 97 فیصد طلبا کے نتائج درست قرار پائے ، مجموعی طور پر صرف 830 طلبا کے نتائج میں معمولی تبدیلی آئی۔ذرائع کے مطابق سندھ اسمبلی کی پارلیمانی کمیٹی کی ہدایت پر 26 ہزار طلبا نے پرچوں کی اسکروٹنی کروائی، اسکروٹنی نتائج میں 97 فیصد طلبا کے نتائج درست قرار پائے ۔ذرائع نے کہاکہ سائنس گروپ میں 6 ہزار 174 امیدواروں کے نتائج کی دوبارہ چانچ کی گئی، میڈیکل گروپ کے 10 ہزار 302 امیدواروں کے نتائج دوبارہ چیک کیے گئے جبکہ انجینئرنگ گروپ کے 9 ہزار سے زائد امیدواروں کے نتائج کی دوبارہ جانچ ہوئی۔ذرائع کے مطابق طلبا کو ماہر اساتذہ و والدین کی موجودگی میں کاپیاں بھی چیک کروائی گئیں، اسکروٹنی نتائج پارلیمانی کمیٹی و محکمہ بورڈز کو ارسال کیے جائیں گے ۔
