اولڈ سٹی ایریا:70کروڑ سے زائد کے ترقیاتی منصوبوں کا سنگ بنیاد
جوڑیا بازار، بولٹن مارکیٹ، میٹھادر اور کھارادر میں سڑکوں، پیور بلاکس، وئیرنگ ایریاز اور سیوریج لائنز کی بحالی شامل ترقیاتی منصوبے مقررہ مدت میں شفاف اور معیاری انداز میں مکمل کیے جائیں گے ،میئر مرتضیٰ وہاب کی میڈیا سے گفتگو
کراچی (اسٹاف رپورٹر) میئر کراچی بیرسٹر مرتضیٰ وہاب نے کہا ہے کہ تاریخی اولڈ سٹی ایریا کی ترقی اور بحالی کے لیے بلدیہ عظمیٰ کراچی عملی اور ٹھوس اقدامات کر رہی ہے اور سال 2026 کو ترقیاتی منصوبوں کی تکمیل کا سال قرار دیا گیا ہے ، اولڈ سٹی ایریا کو جدید شہری سہولیات سے آراستہ کرنا بلدیہ عظمیٰ کراچی کی اولین ترجیح ہے ، تمام ترقیاتی منصوبے مقررہ مدت میں شفاف اور معیاری انداز میں مکمل کیے جائیں گے اور 30 جون تک اولڈ سٹی ایریا میں جاری ترقیاتی کام مکمل کرنے کا ہدف رکھا گیا ہے ، منصوبے کو 595 اعشاریہ 600 ملین روپے کی لاگت سے مکمل کیا جائے گا، جبکہ مجموعی طور پر تقریباً 70 کروڑ روپے بلدیہ عظمیٰ کراچی اولڈ سٹی ایریا پر خرچ کرنے جا رہی ہے ، ان منصوبوں کے تحت جوڑیا بازار، بولٹن مارکیٹ، میٹھادر اور کھارادر میں سڑکوں، پیور بلاکس، وئیرنگ ایریاز اور سیوریج لائنز کی بحالی شامل ہے ۔ ان خیالات کا اظہار انہوں نے اولڈ سٹی ایریا میں سڑکوں کی تعمیر، سیوریج سسٹم کی بحالی اور اسٹریٹ لائٹس و الیکٹریفکیشن کے مختلف ترقیاتی منصوبوں کا سنگِ بنیاد رکھنے کے بعد میڈیا کے نمائندوں سے گفتگو کرتے ہوئے کیا۔
میئر نے مزیدکہا کہ لی مارکیٹ تاریخی اور پرانی عمارت ہے ، جس کی بحالی 10 کروڑ روپے کی لاگت سے کی جائے گی۔ لی مارکیٹ کی بحالی کا کام تاجروں کے ساتھ مشاورت اور تعاون سے اصل حالت میں کیا جائے گا اور اس منصوبے کو 90 روز میں مکمل کیا جائے گا۔ انہوں نے کہا کہ یہ نہیں ہو سکتا کہ سڑکیں بنائی جائیں اور بعد میں کوئی ادارہ آ کر دوبارہ کھدائی کر دے ، اس حوالے سے بہتر ہم آہنگی پیدا کی جا رہی ہے ۔ اہلِ علاقہ اور تاجر برادری کو بھی ان ترقیاتی کاموں کی حفاظت کے لیے اپنا کردار ادا کرنا ہوگا۔ میئر کے مطابق اولڈ سٹی ایریا میں اسٹریٹ لائٹس اور الیکٹریفکیشن کا کام بھی سائٹ کی ضرورت کے مطابق مکمل کیا جائے گا، جس سے نکاسی آب، ٹریفک کی روانی اور عوامی سہولتوں میں نمایاں بہتری آئے گی۔ چار لاکھ اسکوائر فٹ پیور بلاک لگائے جائیں گے ، پاکستان پیپلز پارٹی ایک واضح سوچ اور منشور کے تحت عوام سے کیے گئے وعدوں کو پورا کر رہی ہے ۔میئر کراچی نے کہا کہ جماعت اسلامی سمیت دیگر جماعتوں کو بھی شہری مسائل پر سنجیدہ کردار ادا کرنا چاہیے ، اگر اپوزیشن تنقید کرے تو سوالات بھی ہونے چاہئیں کہ ٹاؤن کی سطح پر اربوں روپے کی روڈ کٹنگ کے باوجود سڑکیں کیوں نہیں بنتیں۔
