پاکستان اور مراکش کے مابین خوشگوار تعلقات :گورنرپنجاب
لاہور( سپیشل رپورٹر )گورنر پنجاب محمد بلیغ الرحمٰن سے مراکش میں تعینات پاکستان کے سفیر سمیع ملک نے گزشتہ روز گورنر ہاؤس لاہور میں ملاقات کی۔ ملاقات کے دوران باہمی دلچسپی کے امور سمیت مختلف شعبوں میں دو طرفہ تعاون کو فروغ دینے پر تبادلہ خیال کیا گیا۔
گورنر پنجاب نے مراکش میں پاکستان کے نئے تعینات ہونے والے سفیر سمیع ملک کو مبارکباد دی اور نیک خواہشات کا اظہار کیا۔ اس موقع پر گفتگو کرتے ہوئے گورنر نے کہا کہ پاکستان اور مراکش کے مابین خوشگوار تعلقات ہیں۔ انہوں نے اس امید کا اظہار کیا کہ مراکش میں تعینات پاکستانی سفیر سمیع ملک ان تعلقات کو مختلف شعبوں بالخصوص تعلیم ، تجارت اور سیاحت میں نئی بلندیوں تک لے کر جائیں گے ۔ دونوں ممالک کے درمیان سٹوڈنٹس ایکسچینج پروگرام شروع کرنے کی ضرورت ہے ۔ گورنر پنجاب نے مراکش میں تعینات پاکستانی سفیر سمیع ملک سے ویزہ کے حصول میں مشکلات اور تاخیر کے مسئلے کو حل کرنے کے حوالے سے بھی بات کی۔ مراکش میں تعینات پاکستانی سفیر نے اس حوالے سے ہر ممکن تعاون کی یقین دہانی کرائی۔
