کمپیوٹرائزڈ اسلحہ لائسنس کی تجدید و ترمیم کیلئے خصوصی کاؤنٹر قائم
لاہور (سپیشل رپورٹر) لاہور ریجن میں کمپیوٹرائزڈ اسلحہ لائسنس کی تجدید و ترمیم کے لئے خصوصی کاؤنٹر قائم کر دیا گیا۔
نادرا لاہور ریجن میں شہریوں کو سہولت اور آسانی کیساتھ کمپیوٹرائزڈ اسلحہ لائسنس کے اجرا کیلئے 11 خصوصی کاؤنٹرز کام کررہے ہیں۔وفاقی وزارت داخلہ اورپنجاب حکومت کی طرف سے جاری کئے گئے اسلحہ لائسنس کی تجدید و ترمیم کیلئے ضلع لاہور میں ساندہ روڈ، ایبٹ روڈ،پیکوروڈ اور جوہر ٹاؤن لاہور سمیت شیخوپورہ، ننکانہ، نارووال، سیالکوٹ، گوجرانوالہ، اوکاڑہ ا ور قصور اضلاع کی خصوصی نادرا مراکز میں 11 کاؤنٹرز قائم کئے گئے ہیں،اس خصوصی اقدام کی بدولت شہریوں کو سوموار سے جمعہ صبح ساڑھے آٹھ بجے سے ساڑھے تین بجے تک کمپیوٹرائزڈ اسلحہ لائسنس کے بآسانی اجرا کے لئے تمام خدمات ایک چھت تلے فراہم کی جا رہی ہیں۔ نادرا کی جانب سے شہریوں کو آگاہ کیا گیا ہے کہ وہ اس سلسلے میں کسی بھی قسم کی معلومات اور رہنمائی کے لئے نادرا ہیلپ لائن نمبر (051-111-786-100) پر رابطہ کر سکتے ہیں۔
