فیروزوالا:امتحانی سپرنٹنڈنٹ طلبہ کی مدد کرتے پکڑا گیا
لاہور (ایجوکیشن رپورٹر) امتحانات میں شفافیت یقینی بنانے کیلئے پنجاب بھر میں ٹیمیں متحرک ہیں اور امتحانی سنٹرز کی مانیٹرنگ کے علاوہ خفیہ نگرانی بھی کی جا رہی ہے ۔
وزیر تعلیم کی نمائندگی کرتے ہوئے چیئرمین ٹاسک فورس فار ایجوکیشن مزمل محمود نے فیروز والا کے امتحانی سنٹر کا اچانک دورہ کیا جہاں انہوں نے طلبہ کی شکایات پر چیکنگ کے دوران سپرنٹنڈنٹ کے موبائل فون سے بعض امیدواروں کی مدد اور مورل سپورٹ کے بارے میں وائس چیٹ اور رول نمبر سلپ برآمد کرلی۔ چیئرمین ٹاسک فورس نے سپرنٹنڈنٹ سے 17 ہزار روپے اور رقم منتقلی کے ثبوت بھی حاصل کر لئے ۔ مزمل محمود نے کہا علی رضا دوسرے سنٹر کے سپرنٹنڈنٹ سے رول نمبرز کے تبادلے میں بھی ملوث پایا گیا ۔ انہوں نے سپرنٹنڈنٹ کو فوری طور پر معطل کر کے ایف آئی آر درج کر ا دی۔ مزمل محمود نے سپرنٹنڈنٹ کو پولیس کے حوالے کرنے کے علاوہ محکمانہ انکوائری کا حکم بھی دے دیا ۔
