کپاس اگیتی کاشت کا ہدف تیسری بار تبدیل،35لاکھ ایکڑ مقرر
ملتان (وقائع نگار خصوصی ) صوبہ پنجاب میں رواں سیزن کپاس کی کاشت کا ہدف تیسری بار تبدیل کرکے 35 لاکھ ایکڑ مقرر کر دیا گیا ہے۔۔
،اگیتی کاشت کا دوسرا نظرثانی شدہ ہدف 37لاکھ ایکڑ مقرر کیا گیا تھا جس حاصل نہ کیا جاسکا،دوسری جانب سیکرٹری زراعت پنجاب افتخار علی سہو نے کپاس کی صورتحال کے سلسلہ میں ایگریکلچر ہاؤس میں منعقدہ اعلیٰ سطحی جائزہ اجلاس کی صدارت کرتے ہوئے کہا ہے کہ کپاس کی کاشت کا ہدف ہر صورت حاصل کیا جائے ، سیکرٹری زراعت پنجاب نے کہا کہ کپاس کی کاشت کے ہدف کے حصول کے لئے تمام ممکنہ وسائل و ذرائع بروئے کار لائے جا رہے ہیں۔فیلڈ فارمیشنز کو 15 مئی تک سو فیصد ہدف کے حصول کا ٹاسک سونپ دیا گیا ہے ۔ بروقت اور خصوصی مہم کے نتیجہ میں کل ہدف کا 28 فیصد حاصل کر لیا گیا ہے ۔انھوں نے مزید کہا کہ کپاس کی اگیتی کاشت کے نگہداشتی اُمور بارے فنی راہنمائی کا سلسلہ جاری ہے ۔کپاس کے علاقوں میں نہری پانی کی دستیابی کے لئے عملی اقدامات اٹھائے جا رہے ہیں۔سیکرٹری زراعت پنجاب نے واضح کیا کہ کپاس کی کاشت کے کل ہدف کا50 فیصد بہاولپور ڈویژن سے حاصل کیا جائے گا۔رواں سال کپاس کی کاشت کے رحجانات نہایت حوصلہ افزاء ہیں۔ ذرائع کے مطابق حکومت کی جانب سے گندم خریداری سے اجتناب کے باعث کاشتکار کاٹن کاشت کرنے سے بھی گریزاں ہیں۔
