36ایکڑ رقبہ پر 13 ہزار پودے لگا کرشجرکاری مہم کا افتتاح
بھکر(ڈسٹرکٹ رپورٹر )ڈپٹی کمشنر محمد اشرف نے کہا ہے کہ درخت زمین کا حسن، ماحول کی بقا اور انسانی صحت کے ضامن ہیں۔۔۔
جنگلات نہ صرف آلودگی کم کرنے میں مدد دیتے ہیں بلکہ پانی کے ذخائر میں اضافہ، زمین کی زرخیزی اور موسمی شدت کو متوازن رکھنے میں بھی کلیدی کردار ادا کرتے ہیں۔ ان خیالات کا اظہار انہوں نے جنگلات کے عالمی دن کے موقع پر فتح میجر مائنر کے مقام پر ڈی پی او شہزاد رفیق اعوان کے ہمراہ 13ہزار پودے لگانے کی خصوصی تقریب سے خطاب کرتے ہوئے کیا۔اس موقع پر اے ڈی سی ریونیو عبد القدیر،ڈی ایف او محمد ثاقب، ماحولیاتی ماہرین اور مقامی سکولوں کے بچے بھی کثیر تعداد میں موجود تھے ۔ ڈپٹی کمشنر محمد اشرف نے کہا کہ حکومت پنجاب شجرکاری مہم کے ذریعے صوبے بھر میں لاکھوں درخت لگانے کے عزم پر کار بند ہے تاکہ ماحولیاتی مسائل پر قابو پایا جا سکے ،اس موقع پر شرکاء نے 36 ایکڑ رقبہ پر مختلف اقسام کے 13 ہزار سے زائد پودے لگائے ۔بچوں اور سول سوسائٹی کے نمائندگان نے بھی شجرکاری میں بھرپور حصہ لیا اور درختوں کی دیکھ بھال کے عزم کا اظہار کیا۔
