تعمیراتی کام میں کوالٹی پر کوئی سمجھوتہ نہیں کیا جائے گا،کمشنر
سرگودھا(سٹاف رپورٹر)کمشنر سرگودہا ڈویژن جہانزیب اعوان کی زیر صدارت ایک اعلیٰ سطحی اجلاس منعقد ہوا، جس میں سرگودہا، خوشاب اور بھکر اضلاع میں روڈ سیکٹرز اور وزیراعلیٰ پنجاب کے خصوصی ترقیاتی پروگرام کے تحت جاری لوکل گورنمنٹ سکیموں پر پیشرفت کا تفصیلی جائزہ لیا گیا۔
اجلاس کو بریفنگ دیتے ہوئے بتایا گیا کہ لوکل گورنمنٹ کے 251 ترقیاتی منصوبے زیر تکمیل ہیں، جن پر مجموعی طور پر 2 ارب 92 کروڑ 26 لاکھ روپے خرچ کیے جا رہے ہیں۔ ان میں سرگودہا کی 231، خوشاب کی 17 اور بھکر کی 3 سکیمیں شامل ہیں۔ مزید بتایا گیا کہ تمام سکیمیں تکمیل کے آخری مراحل میں ہیں اور انہیں 30 جون تک مکمل کرنے کا ہدف مقرر کیا گیا ہے ۔ کمشنر نے ترقیاتی منصوبوں کے معیار پر زور دیا۔ دیتے ہوئے کہا کہ تعمیراتی کام میں کوالٹی پر کوئی سمجھوتہ نہیں کیا جائے گا۔ انہوں نے کہا کہ عوام کے ٹیکسوں کی ایک ایک پائی کو شفاف اور ذمہ دارانہ انداز میں استعمال یقینی بنایا جائے ۔ کمشنر نے متعلقہ افسران کو ہدایت کی کہ بعض سکیموں کے کوالٹی ٹیسٹ فوری طور پر مکمل کر کے رپورٹ پیش کی جائے اور واضح کیا کہ وہ خود بھی جلد بعض منصوبوں کا موقع پر جا کر معائنہ کریں گے تاکہ کام کی رفتار اور معیار کا براہ راست جائزہ لیا جا سکے ۔
