محسن نقوی،چینی ہم منصب کی ملاقات، باہمی تعلقات پرگفتگو
نیویارک (اے پی پی)وزیرداخلہ محسن نقوی نے چینی ہم منصب کیوآئی یانجن سے اہم ملاقات کی جس میں پاک چین تعلقات اور سکیورٹی امور پر تبادلہ خیال کیا گیا ۔
ملاقات نیویارک میں اقوام متحدہ میں چینی مشن کے دفتر میں ہوئی ۔ سکیورٹی اداروں کی ٹریننگ اور جدید آلات و ٹیکنالوجی کے استعمال پرگفتگو ہوئی۔ کیوائی یانجن نے اسلام آباد میں غیر ملکیوں خصوصاًچینی شہریوں کی حفاظت کیلئے ایس پی یو کے قیام کو سراہا اور ایس پی یو کی ٹریننگ اور دیگر امور میں بھرپور تعاون کی یقین دہانی کراتے کہا پاکستان چین ہر موسم کے دوست ہیں۔ پاک چین دوستی فولاد سے زیادہ مضبوط ہے ۔چین پاکستان کے سکیورٹی اداروں کی ٹریننگ و استعدادکار بڑھانے کیلئے بھرپور تعاون کرے گا۔ محسن نقوی نے داسو میں افسوسناک واقعہ پر پیشرفت سے آگاہ کیا جس پر چینی وزیر داخلہ نے اطمینان کا اظہار کیا۔ چینی ہم منصب نے محسن نقوی کو ستمبر میں چین میں ہونے والی گلوبل سکیورٹی فورم میں شرکت کی دعوت دی جو انہوں نے قبول کرلی،وزیرداخلہ نے کہاچین کی وزارت داخلہ کا ایڈوائزری گروپ جلد پاکستان کا دورہ کرے گا۔چین سے دوستی پر فخر ہے ۔پاک چین دوستی اقوام عالم کیلئے مثال ہے ۔
