سعودی عرب کے مفتی اعظم شیخ عبدالعزیز انتقال کر گئے
ریاض (دنیا نیوز، مانیٹرنگ ڈیسک) سعودی عرب کے مفتی اعظم شیخ عبدا لعزیز بن عبداللہ آل الشیخ انتقال کر گئے ۔سرکاری خبر رساں ادارے الاخباریہ کے مطابق شاہی عدالت نے منگل کو سعودی عرب کے۔۔۔
مفتی اعظم اور سینئر علما کونسل کے سربراہ شیخ عبدالعزیز آل الشیخ کے انتقال کا اعلان کیا۔ان کی نماز جنازہ بعد نماز ظہر ریاض کی امام ترکی بن عبداللہ مسجد میں ادا کی گئی۔1999 میں شیخ عبدالعزیز آل الشیخ کو مفتی اعظم کے عہدے پر تعینات کیا گیا تھا۔ انہوں نے مملکت میں اعلیٰ ترین مذہبی سکالر کے طور پر خدمات انجام دیں، شریعت کی تشریح اور قانونی اور معاشرتی امور پر فتوے جاری کیے ۔سعودی ولی عہد و وزیراعظم شہزادہ محمد بن سلمان نے منگل کو مفتی اعظم اور سینئر علما کونسل کے سربراہ شیخ عبدالعزیز آل شیخ کی نماز جنازہ میں شرکت کی ۔ نماز جنازہ بعد نماز ظہر ریاض کی امام ترکی بن عبداللہ مسجد میں ادا کی گئی۔علاوہ ازیں مسجد الحرام مکہ مکرمہ اور مسجد نبوی مدینہ منورہ میں مفتی اعظم کی غائبانہ نماز جنازہ ادا کی گئی۔ سعودی شاہی دیوان نے کہا شیخ عبدالعزیز کے انتقال کے ساتھ ہی مملکت اور اسلامی دنیا ایک جلیل القدر عالم دین سے محروم ہو گئی جنہوں نے اسلام اور مسلمانوں کی خدمت کے لیے نمایاں خدمات انجام دیں۔خادم حرمین شریفین شاہ سلمان اور ولی عہد شہزادہ محمد بن سلمان بن عبدالعزیز آل سعود نے ان کے اہل خانہ، سعودی عوام اور اسلامی دنیا سے تعزیت کا اظہار کیا ہے ۔صدر آصف علی زرداری نے شیخ عبدالعزیز کے انتقال پر گہرے دکھ اور افسوس کا اظہار کیا ہے ۔صدر نے کہا شیخ عبدالعزیز کی دینی خدمات اور علمی رہنمائی ہمیشہ یاد رکھی جائیں گی۔وزیراعظم شہباز شریف نے مفتی اعظم شیخ عبدالعزیز کی وفات پر رنج و الم کا اظہار کرتے ہوئے کہا یہ نہ صرف سعودی عرب بلکہ پوری امت مسلمہ کے لیے لمحہ غم ہے ۔اپنے پیغام میں وزیراعظم نے کہا ان کی مسلم امہ کے اتحاد کے لیے کاوشیں اور علمی بصیرت ہمیشہ یاد رکھی جائیں گی۔وزیر اعلیٰ پنجاب مریم نواز نے بھی مفتی اعظم شیخ عبد العزیز کے انتقال پر افسوس کا اظہار کیا ہے ۔ وزیراعلیٰ نے کہا سب سے زیادہ خطبہ حج مفتی اعظم شیخ عبد العزیز کا منفرد اعزاز ہے ۔حجاج کرام مفتی اعظم شیخ عبد العزیز کی کمی تادیر محسوس کریں گے ۔ امیر جماعت اسلامی حافظ نعیم الرحمن نے سعودی عرب کے مفتیِ اعظم شیخ عبدالعزیز بن عبداللہ آل الشیخ کی وفات پر گہرے دکھ اور افسوس کا اظہار کیا ہے ۔ اپنے ایک تعزیتی بیان میں انہوں نے کہا کہ شیخ عبدالعزیز کی وفات امتِ مسلمہ کے لیے ایک عظیم سانحہ اور لمحہ غم ہے ۔ حافظ نعیم الرحمن نے کہا کہ مرحوم کی مسلم امہ کے اتحاد کے لیے کی گئی کاوشیں اور ان کی علمی و دینی بصیرت ہمیشہ یاد رکھی جائیں گی۔
