سینئر اداکار انور علی انتقال کر گئے
لاہور(شوبز ڈیسک) سٹیج ٹی وی اور فلم کے 71 سالہ سینئر اداکار انور علی طویل علالت کے بعد انتقال کر گئے ۔ انور علی پھیپھڑوں اور گردوں کے عارضے میں مبتلا تھے اور کئی دنوں سے زیرِ علاج تھے ۔تاہم گزشتہ شب انہیں طبیعت خراب ہونے پر رائیونڈ روڈ کے ہسپتال میں داخل کرایاگیا جہاں پر انہوں نے اپنی آخری سانسیں لیں۔
ان کی نماز جنازہ آج ظہر کے وقت لنک روڈ ماڈل ٹاؤن مسجد میں ادا کی جائیگی،انور علی کو پاکستان کی فلم اور تھیٹر کی تاریخ کے بہترین مزاح نگاروں اور اداکاروں میں سے ایک سمجھا جاتا ہے ۔ اپنے منفرد انداز اور بے مثال طنز و مزاح سے انہوں نے لاکھوں لوگوں کے دل جیتے ۔انور علی نے پی ٹی وی کے درجنوں مقبول ڈراموں میں شاندار کردار ادا کیے جب کہ انہوں تھیٹر ڈراموں میں بھی کام کیا۔ان کے مشہور ڈراموں میں ابابیل، ہوم سویٹ ہوم،اندھیرا اجالا،چوکی 420 ،سونا چاندی،جنجال پورہ و دیگر شامل ہیں۔ انہیں بیسٹ کامیڈین کے لکس سٹائل ایوارڈ ،پی ٹی وی کے لائف ٹائم اچیومنٹ ایوارڈ،پنجاب آرٹس کونسل کے ایکسی لینس ایوارڈ سے بھی نوازا گیا، جبکہ انور علی ٹی وی چینلز کے ڈراموں میں بھی کام کرتے رہے ، تاہم کافی عرصہ پہلے انہوں نے شوبز کی دنیا کو خیرباد کہہ دیا تھا اور ان کا رجحان مکمل طور پر مذہب کی طرف ہوچکا تھا۔ مداحوں اور شوبز انڈسٹری سے تعلق رکھنے والی ساتھی شخصیات کی جانب سے انور علی کے انتقال پر دُکھ کا اظہار کیا جارہا ہے ۔
