مدرسے کے استاد کی غیر اخلاقی ویڈیو وائرل،طالبعلم کی مقدمہ کیلئے درخواست
مقامی مدرسے کے بزرگ استاد مفتی عزیز الرحمان کی غیراخلاقی ویڈیو وائرل ہونے پر مدرسہ انتظامیہ نے ذمہ داریوں سے ہٹادیا
لاہور (نیوز رپورٹر ،مانیٹرنگ ڈیسک)ویڈیو میں استاد کو مدرسے کے طالبعلم کے ساتھ زیادتی کرتے دکھایا گیا ہے ،طالب علم نے مقدمہ کیلئے پولیس کو درخواست دیدی ، طالبعلم نے الزام لگایا کہ مفتی عزیز الرحمان کے بیٹے بلیک میل کر رہے ہیں اور جان سے مارنے کی دھمکی بھی دے رہے ہیں، اگر انصاف نہ ملا تو خود کشی کر لوں گا، مدرسے کے مہتمم اسد اللہ فاروق کا کہنا ہے کہ مفتی عزیز الرحمان کو مدرسے سے فارغ کردیا ہے اور ان کے بیٹے کو مدرسے سے چلے جانے کا کہہ دیا ہے ،ادارہ ان کے کسی قول و فعل کا ذمہ دار نہیں،وفاق المدارس نے بھی ان کوذمہ داری سے فارغ کردیا ہے اور مدرسے کا الحاق بھی ختم کردیا ہے ۔جے یو آئی لاہور کے سیکرٹری جنرل نے بھی ایک نوٹس جاری کیا ہے جس میں کہا گیا ہے کہ ویڈیو کے بعد جے یو آئی نے بھی مفتی عزیز کی رکنیت معطل کر دی ہے اور تحقیقات مکمل ہونے تک ان کو سبکدوش کر دیا ہے ۔دوسری طرف مفتی عزیز الرحمان نے اپنے بیان میں کہا ہے ویڈیو ڈھائی تین سال پرانی ہے اور طالبعلم کو میرے خلاف استعمال کیا گیا ہے ، مجھے نشہ آور چیز پلائی گئی، میں ہوش و حواس میں نہیں تھا۔مفتی عزیز نے دعویٰ کیا ہے کہ کیس کا مرکزی کردار صابر شاہ فرار ہے ۔پولیس کا کہنا ہے کہ طالبعلم تاحال غائب ہے ، اگر اس نے مقدمہ درج نہ کرایا تو پولیس اپنی مدعیت میں کارروائی کرے گی۔ایس پی کینٹ صاعد عزیزکا کہنا ہے کہ متاثرہ طالبعلم کی درخواست آگئی ہے جس میں طالبعلم نے الزام لگایا ہے کہ عزیرالرحمان نے مجھے پہلے بھی کئی بارزبردستی زیادتی کا نشانہ بنایاہے اس پرمقدمہ درج کررہے ہیں۔
