منی لانڈرنگ :نصرت شہبازپرآئندہ پیشی پرفردجرم
احتساب عدالت میں تین مختلف ریفرنسز پر سماعت،شہباز،حمزہ پیش
لاہور(اپنے خبر نگارسے )اپوزیشن لیڈر شہبازشریف کی اہلیہ نصرت شہباز نے منی لانڈرنگ ریفرنس میں ٹرائل جوائن کرلیا ،احتساب عدالت نے آئندہ سماعت پر نصرت شہباز کو نمائندے کے ذریعے فرد جرم کی کارروائی کے لیے طلب کر لیا ۔ دیگر مقدمات میں ملزمان کی حاضری کے بعد سماعت ملتوی کر دی گئی۔ احتساب عدالت میں شہبازشریف خاندان کے خلاف نیب کے تین مختلف ریفرنسز پر سماعت ہوئی۔اپوزیشن لیڈر شہباز شریف ،حمزہ شہباز سمیت دیگر ملزمان عدالت کے روبرو پیش ہوئے ۔شہبازشریف کی اہلیہ نصرت شہباز نے اپنے نمائندے کے ذ ریعے ٹرائل جوائن کیا ۔عدالت نے نمائندے کو ریفرنس کی کاپیاں فراہم کرتے ہوئے آئندہ سماعت پر فرد جرم کی کارروائی کے لیے طلب کرلیا ۔ادھر احتساب عدالت نمبر پانچ کے جج ساجد علی نے رمضان شوگر ملز اور آشیانہ اقبال ریفرنس پر سماعت کی، نیب پراسیکیوٹر نے عدالت سے استدعا کی کہ شہباز شریف خاندان کے ریفرنس الگ الگ تاریخ میں مقرر کیے جائیں۔ پراسیکیوٹر نے عدالت کو بتایا کہ تینوں ریفرنسز میں گواہوں کے بیانات ریکارڈ ہونے ہیں، ایک ہی روز تاریخ مقرر کرنے سے سماعت متاثر ہوسکتی ہے ۔عدالت نے ریمارکس د ئیے کہ آئندہ سماعت پر اس کو دیکھیں گے ۔عدالت نے کارروائی یکم اکتوبر تک ملتوی کردی ۔ اپوزیشن لیڈر شہباز شریف کی احتساب عدالت میں پیشی کے موقع پر سکیورٹی کے سخت انتظامات کیے گئے تھے ۔
