شرجیل میمن کیخلاف کرپشن کا کیس دوبارہ شروع : احتساب عدالت
کراچی (سٹاف رپورٹر )احتساب عدالت نے سابق صوبائی وزیر شرجیل میمن کے خلاف محکمہ اطلاعات سندھ میں 5 ارب 76 کروڑ روپے کے کرپشن ریفرنس سے متعلق نیب ترمیم کے تحت عدالت کا دائرہ اختیار چیلنج کرنے کی درخواست مسترد کردی۔
منگل کو احتساب عدالت کے روبرو محکمہ اطلاعات سندھ میں 5 ارب 76 کروڑ روپے کے کرپشن ریفرنس کی سماعت ہوئی۔ شرجیل میمن سمیت دیگر ملزمان عدالت میں پیش ہوئے ۔ عدالت نے نیب ترمیم کے تحت عدالت کا دائرہ اختیار چیلنج کرنے کی درخواست مسترد کردی۔ عدالت نے کہا کہ نیب ترامیم سے متعلق سپریم کورٹ کے احکامات کے بعد درخواست غیر موثر ہوچکی ہے ۔ کل سپریم کورٹ کا حکم نامہ ملا ہے ۔ سپریم کورٹ کے احکامات پر عمل کیا جائے گا، اب تو نیب ترامیم ختم کردی گئی ہیں ، سپریم کورٹ کا حکم نامہ بھی سامنے ہے ۔ کیس کا ٹرائل جہاں رکا تھا وہیں سے شروع کیا جائے گا۔ عدالت نے آئندہ سماعت پر گواہان اور ملزمان کو پیش ہونے کا حکم دے دیا ۔ عدالت نے سماعت 5 اکتوبر تک ملتوی کردی۔
