نواز شریف کو کسی شخصیت کا نام لیکر بیانیہ نہیں بنانا چاہیے :ترین
لاہور (مانیٹرنگ ڈیسک)استحکام پاکستان پارٹی کے بانی جہانگیر ترین نے کہا ہے کہ نواز شریف کو کسی شخصیت کا نام لیکر بیانیہ نہیں بنانا چاہیے ،ہمیں لیول پلیئنگ فیلڈ بارے شکایت نہیں، الیکشن میں سب کوبرابرموقع ملنا چاہیے ۔
انہوں نے پی ٹی آئی کی سابق رکن قومی اسمبلی منزہ حسن کی استحکام پاکستان پارٹی میں شمولیت کے موقع پر لاہور میں پریس کانفرنس سے خطاب کرتے ہوئے کہا کہ نواز شریف کو سابق آرمی چیف اور آنے والے چیف جسٹس کا نام نہیں لینا چاہیے تھا۔انہوں نے کہا ہے کہ اگر نواز شریف نے کسی کے ساتھ معاملات طے کرنے ہیں تو پہلے ملک واپس آئیں۔ہمیں لیول پلیئنگ فیلڈ کے حوالے سے کوئی شکایت نہیں، الیکشن ناگزیر ہے ، ہر حال میں ہونے چاہئیں، استحکام پاکستان پارٹی تمام امیدیں پوری کرے گی۔انہوں نے کہا کہ خوشی ہے کہ پارٹی میں ایک اہم شمولیت ہو رہی ہے ، منزہ حسن کو دل کی گہرائیوں سے خوش آمدید کہتا ہوں۔ الیکشن میں تمام جماعتوں کو برابری کا موقع ملنا چاہیے ، پاکستان کی بہتری کیلئے کوشش کریں گے ۔
